Бүген дә иң кадерле кеше

Бүген дә иң кадерле кеше
Яңа Кенәр авылында яшәүче Фәрит ага Шәмсетдинов олы тормыш һәм хезмәт юлы үткән кеше.
— 1941 елның 9 августында, сугышка китәргә хәбәр килгәндә, лобогрейка белән ашлык уруда идем, — дип сөйли ул. — Хәрби флотка алдылар, моряк булып хезмәт иттем, төрлесен күрергә туры килде.
Дошманны җиңеп кайтканнан соң да тынычлап яшәү насыйп булмый аңа. Шундый әзерлекле кешене участок инспекторы итеп билгеләүләре бик табигый хәл. Үзенә күрә бу да фронт инде. Тик дошман дигәннәре күренеп йөрми генә. “Минем карамакта 22 авыл, якын гына мари чиге, һәрвакыт уяу булырга кирәк. Һәр авылда ышанычлы кешеләр булдырдым, алар эшемдә бик ярдәм итте”.
Бер авыл кешесен хатынын үтергән өчен утырткан булалар, төрмәдән кача бу. Күзәтү оештырып, Фәрит Шәмсетдинов аны да эләктерә.
Мәскәүдә банк басуда катнашкан ир белән хатын, тыныч урын диптерме, шушы якларга килеп урнашалар, әмма алар биредә уяу инспектор эш итүен белми шул.
Тагын бер очрак. Фәрит Шәмсетдинов Яңа Кенәрдә күп халык катнашында үткән чара барышында башкалардан бер башка биек кешегә игътибар итә: “Йөзе ничектер таныш кебек тоелды, — дип искә алды ул әлеге вакыйганы. — Тиз генә өйгә кайтып “ориентировка”ны карадым — шул үзе! Кичекмәстән бүлеккә шалтыраттым. Ярдәм килеп җиткәнче артыннан күзәтеп йөрдем. Гаять куркыныч җинаятьче әнә шулай тотылды”.
— Сез безнең коллектив өчен иң кадерле һәм хөрмәтле кеше, — диде район эчке эшләр бүлеге җитәкчесе Айдар Баһавиев, Фәрит аганы 90 яшьлек юбилее белән котлап. — Сез нинди авыр елларда илне тышкы һәм эчке дошманнардан сакладыгыз, без Сезнең белән чиксез горурланабыз, арабызда Сезнең кебек ветеран булу безнең өчен зур бәхет.
Район эчке эшләр бүлегенең ветераннар советы рәисе Хәлил Хәбибуллин да юбилярга иң җылы сүзләрен ирештерде.
Фәрит агага карап бу кадәр яшьне берәү дә бирмәс. Гадәттә хатыннары әйбәт ирләр яхшы саклана, диләр. Бу очракта бу нәкъ шулай. Саймә әби белән 64 ел пар күгәрченнәрдәй гомер итәләр. Саймә әби дә Бөек Ватан сугышы ветераны. Балалары, оныклары, оныкчыклары да вакытсыз картайта торганнардан түгел. Аннан Фәрит ага үзе дә дөрес яшәү рәвеше белән гомер иткән кеше.
— Дөрес, бер ел тәмәке тарттым, — ди ул. — Кенәрне Әтнәгә кушкач, эш катлауланды, шунда борчылуларны басарга теләп тартып алдым. Тоткарланган кешене арбага, я чанага утыртып Әтнәгә илтергә туры килә иде. Ә бит алар арасында төрлесе бар...
Ильяс ФӘТТАХОВ