Мең ишеткәнче, бер күрүең яхшы

Мең ишеткәнче, бер күрүең яхшы
Август ае җитсә, кырларда игеннәр, бакчаларда яшелчә, җиләк–җимеш җыюда гына түгел, мәгариф, мәдәният өлкәсендә дә кызу урак өсте башлана: учреждениеләрнең яңа сезонга, кышка әзерлекләре тикшерелеп, махсус комиссия тарафыннан бәяләнә.
Составында муниципаль район башлыгы урынбасары Л.Осина, мәдәният идарәсе җитәкчесе И.Котдусов, район Мәдәният йорты белгечләре, үзәк китапханә методисты булган комиссия белән бер көнне без дә авылларга чыктык. Юлыбыз – Үрнәк авыл җирлегенә.
Районда “Һәр авыл җирлегендә үрнәк мәдәният учреждениесе” бәйгесе бара һәм шуның кысаларында мәдәният учреждениеләренең халәте, документлар белән эш итү тәртибе, янгын куркынычсызлыгы кагыйдәләрен үтәү, кышкы чорга әзерлек, түбәләрнең төзеклеге, территориянең чисталыгы, бизәлеше (әлбәттә, чәчәк клумбалары үстерү беренче чиратта тора) тикшерелә. Тикшерү барышында җитешмәгән яклар күренә, кимчелекләрнең нәрсәгә бәйле булуы ачыклана.
Көнне Казанбаш авылындагы учреждениеләрдән башладык. Казанбаш мәдәният йорты заманында гөр килеп торган булса, директор бүген биредә музыкаль аппаратураның, спорт инвентарьларының бөтенләй диярлек булмавыннан зарланды. Бу – илкүләм борчый торган тема.
Көтеклеләр клуб җитәкчесе булып Р.Латыйпов эшли башлагач хәлләрнең уңай якка үзгәрүенә сөенә, яшьләр дә клубка теләп йөри башлаган. Өлкәннәр өчен дә биредә мәдәни чаралар оештырып торалар икән. Иске Төрнәле клубы мәктәп, фельдшер–акушерлык пункты китапханә белән бер бинада урнашкан. Мәктәпнең спорт залы клуб фойесы буларак та хезмәт итә. Шунлыктан биредә еш кына күңелсезлекләр килеп чыга: яшьләр инвентарьларны саклау ди-гәнне белми, әйбер ватулар күзәтелә. Комиссия тарафыннан моның чарасын күрү, күзәтчелеккә алу бурычы куелды. Әнә бит, Кечкенә Төрнәле авылы клубындагы спорт җиһазларын инде ничә еллардан бирле ватмыйча, саклап кулланалар. Кечкенә авыл булса да, клубның эшләвенә куанып яши халык. Урта Пошалым авыл мәдәният йорты һәм китапханәсе электән әйбәт күрсәткечләре белән дан тота, һәрьяктан үрнәк. Биредә күзләрне камаштырырлык гүзәллек белән чәчәк клумбалары каршы ала. Гомумән, Үрнәк авыл җирлегенә караучы күпчелек мәдәният учреждениесе, китапханәсе каршында шундый гүзәллек. Дөньяны матурлык коткарыр дигән гыйбарәгә нигезләнеп эшли хезмәткәрләр. Түбән Пошалым клубы соңгы елларда мөдирләре белән мактана алмады, күптән түгел эшкә алынган яңа мөдирдә өмет бар, диде мәдәният белгечләре. Күлтәс клубында соңгы елларда уңай якка үзгәрешләр шактый. Мәдәни чараларда да халык теләп катнаша. Лесхоз мәдәният йорты районда югары дәрәҗәлеләрдән санала. Чөнки бистәдә яшәүче халыкның таләпләре гади генә түгел. Хезмәткәрләр гел сәнгать дөньясында кайнап яши биредә.
Ашытбаш, Лесхоз, Урта Курса, Хәсәншәех авыл мәдәният йортлары эш нәтиҗәләре буенча алдынгылар рәтендә дип билгеләп үтте Л.Осина. Бер уңайдан үрнәк итеп куярлыклары белән бергә начар эшләүче мәдәният учакларын да санап үтте. “Бизәлеш буенча Шушмабаш, Яңа Кырлай мәдәният йортлары, эш оештырылу буенча Симетбаш, Сарай–Чокырча авыл клублары тиешле таләпләргә җавап бирми. Мәдәният өлкәсе буенча мөдирнең махсус белеме булмаса да, җаваплылык булырга тиеш, эшкә алынгансың икән, җиренә җиткереп эшләргә кирәк. Мәсәлән, Якты Көндә без килгән чакта хәтта стенадагы кирпечне буйыйлар иде. Бинаны матур итеп тәртипләп тоту мөдирнең җаваплылыгыннан тора. Иске Чүриледә дә без килгәндә төзекләндерү эшләре төгәлләнмәгән иде. Биредә авырлыкларга карамый финанс мөмкинлеген дә хәл иткәннәр, материал да юнәткәннәр. Әйтик, Корайван клубы тыштан әкияттәге тавык аягындагы йорт сыман, ә эченә керсәң, искиткеч чисталык, тәртип. Чулпан авылында да шундый күңелле хәл. Барысы да эшкә алынган кешенең хезмәткә чын күңелдән бирелүенә, карашына бәйле. Эшләргә теләге, сәләте булган кеше мәсьәләне хәл итү өчен төрле юллар таба”, – дип фикерләре белән уртаклашты ул. Мондый рухтагы тикшерүләрдән соң мәдәният учакларындагы күп кенә проблемаларның хәл ителүен, авыл җирлеге органнары белән ныклы элемтә урнашуын да ассызыклады.
Комиссия нәтиҗәләре буенча районның барлык мәдәният учреждениеләре хезмәткәрләре белән берлектә мәдәният идарәсендә, сентябрь ахырында йомгак ясалып, киңәшмә үткәреләчәк. Җавапсыз хезмәткәрләргә карата чаралар күреләчәк, 14–15 август көннәрендә район мәдәният идарәсе барлык мәдәният хезмәткәрләрен алдынгы мәдәният учреждениеләренә алып барып, тәҗрибә уртаклашып кайттылар. Бәйге нәтиҗәләре газетабызның алдагы саннарында да яктыртылачак.
Розалия ЗИННӘТОВА