Көтеп ала торган кунаклар сез!

Көтеп ала торган кунаклар сез!
Соңгы елларда игеннәрне урып–җыю чорында республика язучылары һәм журналистларының районыбызга килүе матур традициягә әверелде. Иҗат кешеләре һәрберебез өчен изге булган икмәк үстерүчеләр белән очрашып, үзләре әйткәнчә, илһам чишмәләрен баета, шундый күренекле шәхесләр игътибарын тою райондашлар өчен дә зур мәртәбә.
Быел әлеге мәртәбәле делегация Татарстан Республикасы Язучылар берлегенең яңа рәисе, балалар шагыйре, драматург, Татарстан Республикасының атказанган сәнгать эшлеклесе, А.Алиш исемендәге премия лауреаты Рафис Корбанов җитәкчелегендә килде.
Делегация составында ТР Язучылар берлеге рәисе урынбасары Данил Салихов, күренекле язучылар һәм шагыйрьләр Нәбирә Гыйматдинова, Ркаил Зәйдулла, “Салават күпере”, “Сәхнә” журналлары мөхәррире Зиннур Хөснияр, драматург Гафур Каюмов (ул безнең якташ, Яңа Сәрдә авылында туган), ТРның атказанган мәдәният хезмәткәре, Х.Ямашев исемендәге һәм “Бәллүр каләм” премияләре лауреаты Асия Юнысова һ.б. бар иде.
Кунакларны муниципаль район башлыгы Алмас Назиров, район башкарма комитеты җи-тәкчесе урынбасары Надия Мифтахетдинова каршылады.
Алмас Әминович Рафис Корбановка гаять җаваплы яңа вазифасында уңышлар теләде, вакыт табып Арча җиренә килгәннәре өчен рәхмәт әйтте, кыскача район тормышы белән таныштырып үтте. Аннан соң кунаклар район буйлап сәяхәткә кузгалдылар.
Беренче тукталыш “Сервис–агро” ширкәтенең бодай басуында булды. Бүлекчә җитәкчесе Илнар Мәгъсүмов, баш агроном Марат Вахитов хуҗалыкның эшчәнлеге турында сөйләделәр. Инвестор ярдәмендә булган үзгәрешләрнең берсе күз алдында — басуда эшләүче комбайннарның барысы да чит илнеке, берсе–берсе 10 млн. сумнан артык тора. Аның каравы, алар кеше турында кайгыртып эшләнгән, комбайн тузан болыты эчендә йөрсә дә, кабинага аның бөртеге генә түгел, хәтта тавыш та керми, кондиционер тиешле температураны саклый.
— Элек районда уракта 400дән артык комбайн эшләсә, хәзер алар 100дән аз гына артык, — диде муниципаль район башлыгы Алмас Назиров. — Хәзерге бер комбайн ул вакыттагы дүрт комбайнны алыштыра.
“Ак Барс–агро” ширкәтенә барышлый кунаклар юлдан үткәндә үк игътибарны җәлеп итеп торган Сарай–Чокырча башлангыч мәктәбенә тукталды. Медпунктны да үзенә сыендырган бу бина ничә килсәң дә балкып, җылылык бөркеп торыр. Кечкенә генә коллектив бөтен күңелен биреп хезмәт итә монда, тирә–ягы чәчәкләргә күмелгән, бакчалары яшелчә белән тулы. Бина үзе дә, эче дә әле яңа гына төзеп тапшырылган кебек.
— Авылларны менә шушы мәктәпләр саклап калды да инде, — дип үз бәясен бирде шагыйрь, Г.Тукай исемендәге дәүләт премиясе лауреаты Ркаил Зәйдулла.
— Бездә бөтен авылларда да мәктәпләр шундый, — дип сүзгә кушылды авыл җирлеге башлыгы Рәмзия Вафина.
Әдипләр мәктәпкә китапларын бүләк итеп калдырдылар.
“Ак Барс–агро” ширкәтенең Сикертән сөтчелек комплексына сәяхәт тә зур кызыксыну тудырды. Ширкәт җитәкчесе Шәйдулла Сәлахов аның күпмегә төшүе, ничә кеше эшләве, аларның хезмәт хаклары турында сөйли барды. “Авыл хуҗалыгы соңгы вакытта бик нык алга атлады”, — дип нәтиҗә ясады биредә күргәннәрдән кунаклар.
Ширкәтнең басуларында да куәтле чит ил техникасы эшли. Монда да корылыкка карамый әйбәт уңыш үстерә беләләр.
Бу якларга килгән кеше республикабызның халык язучысы Мөхәммәт Мәһдиев музее-на керми калмый. Бүген дә шулай булды. Хәзер инде Гөберчәккә юллар да асфальт, тик туган ягы өчен үлеп торган Мөхәммәт ага үзе генә юк. Ул туып–үскән нигездәге ишегалдына да кереп чыктык, анда да нидер җитми, моңсулык...
Галиәсгар Камал исемендәге Сикертән мәктәбенең дә ниндидер үзенә тартып тора торган көче бар. Аңа кергәндә ике яклап тезелеп киткән каеннар каршы ала һәм чыкканда озатып кала. Каеннар арасында балалар кулы белән ясалган әкият дөньясы, суда аккошлар йөзә, аларны күргәч, күңелләр тагын да ачылып китә. Иҗат кешеләре мондый гозурлыкны бәяли белә инде. Мәктәпнең чын хуҗалар кулында булуы эченнән дә, тышыннан да күренеп тора.
Чиратта — Арча шәһәре. Районыбыз иң күп төзүчеләр-нең иң алгы рәтендә. Алмас Әминович кунакларга федераль, республика программаларының районда ничек үтәлүе турында сөйләде, соңгы елларда шәһәребез йөзе танымаслык булып үзгәрде, аның кайсы урамыннан гына үтмә — һәркайда мәһабәт яңа йортлар, биналар. Тегендә–монда күзгә чалынучы краннар төзелешләрнең әле дә кайнап торуына шаһит. “Бәләкәч” программасы буенча төзелгән балалар бакчасы, ветераннар өчен салынган йортлар, башка объектлар архитектура ягыннан да аерылып тора.
Кунаклар Арчада чәчәкләр күплеккә дә игътибар итте. Ул шәрык өлешендәге балалар бакчасы ишегалдына керсәң, чыгасың килерлек түгел — анда нинди генә чәчәкләр юк! Уен мәйданчыклары исең китәрлек!
“Кырлай” ширкәтенә баргач, без мәрхүм Туфан ага Миңнуллинны да искә алдык. Арча якларына еш килә иде ул, шул исәптән урып–җыю вакытында да. Узган ел Иске Кырлай фермасында татарча язылган такталарны күреп: “Менә бу арчаларча!” — дигән иде. Аннан сугарулы бәрәңге басуына бардык, уңышны күреп исләре китте, учак көлендә пешкән “мундирлы” бәрәңге ашадык...
Быел да шушы маршруттан үтелде. Иске Кырлайда зур үзгәрешләр ясап яталар, терлек тораклары заманча итеп яңартылган, терлекләр-нең баш саны, продукция алу арта, эшләгән кеше әйбәт хезмәт хакы ала.
Быел сугарылып үстерелә торган бәрәңге мәйданнары арткан, гектардан 450 центнер уңыш чыга. Кунаклар, бер төптә үскән бүлбеләрнең ишен, эрелеген күреп, моның чынлыгына инандылар. Тәме дә телне йотарлык — көлдә пешерелгәне бигрәк тә!
Кунаклар район тормышы белән шулай иркенләп танышу мөмкинлеге тудырган өчен муниципаль район башлыгы Алмас Назировка рәхмәт әйттеләр, арчалыларга киләчәктәге эшләрендә яңа уңышлар теләделәр.
Ильяс ФӘТТАХОВ