Чәчүне 5 сентябрьгә төгәлләргә!

Чәчүне 5 сентябрьгә төгәлләргә!
21 августта ТР Премьер–министры урынбасары, авыл хуҗалыгы һәм азык–төлек министры Марат Әхмәтов видеоконференция режимында үткәргән киңәшмәдә быелгы урак нәтиҗәләренә анализ ясады. Шулай ук региональ фондка ашлык әзерләү һәм көзге кыр эшләренә кагылышлы мәсьәләләр тикшерелде.
Марат Әхмәтов урып–җыюның югары темпта алып барылуы һәм оешкан төстә эшләү күп урыннарда уракны 20 августка төгәлләргә мөмкинлек бирүен билгеләп үтте. Иң зур тулай җыем 100 мең тоннадан артык, Актаныш, Арча, Азнакай, Буа, Яңа Чишмә, Минзәлә һәм Сарман районнарында. Республика буенча тулай җыем 3 млн. тонна тирәсе.
15 июльдән соң дүрт атна дәвамында урып–җыю өчен идеаль һава шартлары торды. Ә уракны төгәлли алмауның сәбәбе оешканлык җитмәүдә.
Рапс игү белән шөгыльләнүчеләр икеләтә ота. Бу культура бик табышлы һәм культуралар өчен яхшы элгәр дә.
Киңәшмәдә шулай ук региональ фондка ашлык әзерләү мәсьәләсе дә кискен куелды.
Аннан соң министр туфракны төп эшкәртүнең барышына тукталды. Таләп — һәр гектар урнаштырыла торган культурага бәйле рәвештә эшкәртелергә тиеш. Инде туфрак эшкәртүне төгәлләгән хуҗалыклар да бар. Туфрак эшкәртү өчен шартлар бик уңай.
Марат Әхмәтов бөртеклеләр мәйданының өчтән беренә көзге культуралар чәчеп, тулай җыемның яртысы чамасын шулардан җыйнап алуны киләчәккә бурыч итеп куйды. Бүгенге көндә көзге культуралар 129,6 мең гектарда чәчелгән. Арча, Минзәлә, Нурлат, Кукмара районнары югары темп белән эшли.
Муниципаль район башлыгы Алмас Назиров, ки-ңәшмәне дәвам итеп, күпчелек хуҗалыкларның игеннәрне вакытында җыйнап алуын билгеләп үтте. Әмма артка калучылар да бар, бигрәк тә “Вамин–Арча” ширкәте (уракка беренче булып төшкән иде) оешмаганлык күрсәтте.
Хәзер бөтен көчне көзге чәчүгә тупларга. 5 сентябрьдән соң бер генә агрегат та басуга чыгарга тиеш түгел. “Ак Барс–агро”, “Курса МТСы” инде чәчүне төгәлләү алдында.
Көзге культураларны яхшы элгәрләрдән соң гына чәчәргә кирәклеге, шулай эшләмәгәндә уңыш булмаячагы кабат–кабат әйтелә. Аеруча “Вамин” хуҗалыкларында бу мөһим агротехник таләп үтәлми, караш бик начар.
Туфракны төп эшкәртүнең торышы да борчылу тудыра. Әлегә 75897 гектарның 22428 гектары гына эшкәртелгән.
Район башлыгы региональ фондка ашлык тапшыру заданиеләрен үтәүгә җитди карарга кирәклеген искәртте. Һәр хуҗалык җитәкчесенә моның өчен хисап тотарга туры киләчәк.
Ильяс ФӘТТАХОВ