Хыяллар тормышка ашты

Хыяллар тормышка ашты
Арчаның икенче номерлы урта мәктәбенең 40 еллык тарихы бар. Ул, 1972нче елны сафка басып, беренче укучыларын кабул итә башлый. Шуннан бирле мәктәп яшь буынга ныклы белем һәм тәрбия бирә.
Күпме укучыларны олы тормыш юлына әзерләп чыгара ул шушы кырык ел эчендә. Анда тәҗрибәле, укучылар күңеленә ак юл салган, яшь укытучыларга күркәм остаз булган өлкән буын педагоглар белем бирде һәм кайберләре бүгенге көндә дә эшләрен дәвам итәләр. Аларга алмашка югары белемле, үз эшләренә тугрылыклы, балаларны яратучы яшь буын килә. Бүгенге көндә мәктәптә белем алучы 600дән артык балага 66 укытучы һәм тәрбияче белем бирә.
Шушы еллар эчендә мәктәпкә ел саен өлешләп ремонт ясалып, идәннәр, стеналар буялып торса да, бина искергән, ямьсезләнгән иде. Арчаның башка мәктәпләренә барып кайткач, “Их, безгә дә шундый матур мәктәпләрдә эшләргә язсын иде,” — дип хыяллана идек.
Мәктәбебезнең 2012нче елда кабул ителгән Республика күләмендәге нык-лап төзекләндерү программасына керүе барлык хыялларны тормышка ашырды. Бүген безнең мәктәп бөтенләй башка, өр-яңа. Капкасыннан ук яхшы сыйфатлы юл түшәлгән, тышкы яктан матур итеп тышланган, керү-чыгу юлы да танымаслык булып үзгәргән, коридорлар шул ук калса да, киңәеп киткән сыман. Беренче катта иркен китапханә, актлар залы, ашханә, спорт залы, башлангыч сыйныфлар өчен уку кабинетлары, медпункт булса, икенче һәм өченче катлар урта һәм өлкән сыйныф укучылары өчен заманча җиһазландырылган. Шунда ук химия, биология, физика фәннәре өчен бөтен уңайлыклары белән лабораторияләр урнашкан. Кайсы гына кабинетка килеп керсәң дә, эчендә нур уйный, стеналар күңелгә рәхәтлек, җылылык бирә. Алар күзләрне иркәли торган төсләргә буялган, әйтерсең һәр җирдә кояш балкый. Җылылык системасы, электр үткәргечләре барысы да заманча. Гомумән, балаларга белем һәм тәрбия алу, ә укытучыларга бар көчләрен биреп эшләрлек бөтен мөмкинлекләр тудырылган.
Ныклап төзекләндерүгә нәкъ менә безнең мәктәпне тәкъдим итүе, төзекләндерүнең барышы белән кызыксынып фикерләрен җиткерүе, матди һәм рухи яктан ярдәм итүе өчен мәктәбебез колективы район башлыгы Алмас Назировка рәхмәтле. Шулай ук мондый зур күләмле эшне курыкмыйча үз җилкәсенә алган “Арча КСМы” ширкәте җитәкчесе Рафаэль Муллагалиевка, көн буе аяк өсте торып, эшчеләрне материал белән тәэмин итеп торучы Азат Җәләлетдиновка һәм ару-талуны белмичә эшләүчеләрнең һәркайсына чиксез рәхмәтебезне белдерәбез.
Арчаның 2нче номерлы урта мәктәбе
коллективы