Киңәшле эш таркалмас

Киңәшле эш таркалмас
24 августта мәгариф хезмәткәрләренең традицион август киңәшмәсе узды. Пленар утырышта узган уку елына йомгак ясалып, нәтиҗәләр чыгарылды, заман куйган таләпләр ачыкланды, киләсе уку елына максатлар, бурычлар куелды.
Район Мәдәният йорты каршында һәм фойеда мәгариф учреждениеләренең бүгенгесен чагылдырган бай эчтәлекле һәм зәвык белән эшләнгән күргәзмә беркемне дә битараф калдырмады (рәсемдә).
Киңәшмәдә муниципаль район башлыгы Алмас Назиров, ТР Мәгариф һәм фән министрлыгының өстәмә һөнәри белем бирү бүлеге җитәкчесе Елена Попова, РОСТО (ДОСААФ) республика оешмасы идарәсе рәисенең беренче урынбасары Любовь Фәтхуллина катнашты.
Узган уку елының йомгаклары һәм киләчәккә куелган бурычлар турында доклад белән район мәгариф идарәсе җитәкчесе Рина Бәдриева чыгыш ясады.
— Районыбызның белем бирү учреждениеләрендә гражданнарның мәҗбүри бушлай гомуми белем алуы өчен барлык шартлар да булдырылган, бүгенге мәгариф учреждениеләре челтәре белем алу хокукын тулысынча тормышка ашырырга мөмкинлек бирә. Мәгарифне модернизацияләү проекты кысаларында әлеге максаттан 368 мең сумлык спорт, 773 мең сумлык медицина җиһазлары алынды, укучыларны база мәктәпләренә йөртү өчен 6 автобус бирелде, муниципаль бюджеттан мәктәп җиһазлары өчен 7 млн. сум тотылды, республика программасы кысаларында Арчаның 2нче номерлы урта мәктәбе ныклап төзекләндерелде, Арчаның 3нче номерлы башлангыч мәктәбендә төзелеш эшләре бара, — диде ул.
Быел август киңәшмәсе “Дәресләрдән соң — мәктәп” темасына багышланды. Укучыларга мәктәптә үк башлангыч һөнәри белем бирү буенча безнең уңышларыбыз да бар. Узган уку елында Арча РОСТО (ДОСААФ) оешмасы белән берлектә район мәктәпләрендә оешкан автоклассларда укып, 143 укучы “В”, 130 укучы “С” категорияле машина йөртүче, ә 42 укучы тракторчы таныклыгы алды.
Любовь Фәтхуллина Арча районының әлеге юнәлештәге эш тәҗрибәсен югары бәяләде һәм Алмас Әминовичка РОСТО (ДОСААФ) республика идарәсенең бүләген тапшырды.
Мәгариф һәм фән министрлыгы вәкиле Елена Попова да районда мәгариф өлкәсенә булган игътибарның башкалар өчен үрнәк булуын билгеләп үтте.
Фикер алышуларда Яңа Кенәр лицее директоры Зөлфия Хәйруллина, ЮХИДИ бүлекчәсе җитәкчесе Габделхак Касыймов катнашты. Матур традиция буенча Апаз авыл җирлеге башлыгы Ренат Садыйков, “Северный”, “Курса МТСы”, “Акчишмә” хуҗалыклары җи-тәкчеләре Рөстәм Хәйруллин, Рәүф Гыйләҗетдинов, Газинур Сафин мөгаллимнәрне яңа уку елы белән тәбрикләп, мәктәп коллективларына, укытучыларга бүләкләр тапшырдылар.
Муниципаль район башлыгы Алмас Назиров үз чыгышында Татарстан Республикасында мәгарифне үстерү стратегиясен тормышка ашыруның беренче уңай нәтиҗәләр бирүен ассызыклады. Бу, иң беренче чиратта, укытучының дәрәҗәсе артуда, аның матди хәле яхшыруда чагылыш тапты.
Мәктәпләрнең заманча җиһазлануы, материаль–техник базасы ныгу, мәгариф учреждениеләрен ныклап төзекләндерү буенча республика программасы гамәлгә ашырылу да моның ачык мисалы.
Алмас Әминович киләсе уку елында мәктәп коллективлары алдында торган бурычларга да тукталды. Быел 4нче сыйныфларда “Дини культуралар һәм дөньяви этика нигезләре” дәресләре укытыла башлый.
Безнең балаларыбыз диннәр тарихы һәм традицияләрен белеп үсәргә һәм дөрес тәрбия алырга тиеш.
— Үсеп килүче буынны тормышка әзерләү проблемасы да актуаль булып кала, — диде Алмас Әминович. Ә моның өчен 1 сентябрьдән мәктәпләрдә “Тормыш дәресләре” кертү зарур. Аның максаты — укучыны фән дәресләрендә алган белемнәрен көндәлек тормышта кулланырга өйрәтү булырга тиеш. Хезмәт тәрбиясен, мәктәп яны тәҗрибә участокларындагы эшне, төрле һөнәри юнәлештәге түгәрәкләрне дә шушы максатны күздә тотып оештырырга кирәк.
Укучыларга һөнәр сайлауда юнәлеш бирү дә тамырдан үзгәрергә, республика, җирлек икътисады таләпләрен исәпкә алып башкарылырга тиеш.
Соңыннан Алмас Әминович барлык мәгариф хезмәткәрләрен якынлашып килүче яңа уку елы белән тәбрикләде.
— Арчаның матур киләчәге өчен булдыклы, тирән белемле, көчле, зирәк, уңган–булган балалар тәрбияләргә язсын! — диде ул.
Исрафил НАСЫЙБУЛЛИН