Туфракны әйбәтләп эшкәрт

Туфракны әйбәтләп эшкәрт
31 августта Татарстан Республикасы Президенты Рөстәм Миңнеханов видеоконференция режимында үткәргән киңәшмәдә күп фатирлы йортларны төзекләндерү, авыл клублары, фельдшер–акушерлык пунктлары төзү программаларының үтәлеше, ведомствоара хезмәттәшлек, кыр эшләренең барышы турындагы мәсьәләләр каралды.
ТР Премьер–министры урынбасары, авыл хуҗалыгы һәм азык–төлек министры Марат Әхмәтов үзенең чыгышында республикада бөртекле культуралар урып–җыюның нигездә тәмамлануын әйтеп үтте. Тулай җыем — 3,2 млн. тонна чамасы. Хәзер төп эшләр — 5 сентябрьгә көзге чәчүне төгәлләү, туфракны төп эшкәртү, кукурузны җыеп алу. Министр туфракны төп эшкәртүгә бик җаваплы карарга кирәклеген искәртте. Бөтен басуны бер төсле итеп түгел, ә анда нинди культура чәчеләчәгенә карап эшкәртергә. “Туфракны төп эшкәртүдә дә кызыксыну чараларын урып–җыю чорындагы кебек итеп кулланырга кирәк,” — диде министр.
Муниципаль район башлыгы Алмас Назиров, киңәшмәне дәвам итеп, районда күп фатирлы йортларны ныклап төзекләндерү буенча быелгы планның үтәлүен әйтте. Хәзер аларда яшәүчеләрнең фикерләрен өйрәнеп, җитешсезлекләр була калганда төзәтү чараларын күрергә.
Фельдшер–акушерлык пунктларының быелга планлаштырылганнарын ремонтлау төгәлләнеп килә. Мөндеш авылында төзелергә тиешлесен модуль кайтарганнарын көтеп тормыйча заводка осталар җибәреп өйрәтүне оештырырга, төзелешне тизләтергә.
Район үзәк хастаханәсен ремонтлауны да тизләтергә.
Көз килде, кыш та озак көттермәс, аңа ныклап әзерләнергә. Төзүчеләр өчен дә кырыс шартлар башлана, яңгырлар явачак. Сусаган туфракка алар да бик кирәк иде. Ә безгә үзебездән торганын вакытында җиренә җиткереп эшләргә кирәк.