Үзгәрмичә ярамый

Үзгәрмичә ярамый
27 августта ТР авыл хуҗалыгы һәм азык-төлек министрының икътисад һәм аграр үзгәртеп корулар буенча урынбасары Николай Якушкин Арча районында икътисад мәсьәләләре буенча киңәшмә үткәрде.
Әлеге киңәшмәгә кадәр республиканың авыл хуҗалыгы һәм азык-төлек министрлыгы, район авыл хуҗалыгы һәм азык–төлек идарәсе белгечләре безнең районның “Аю” һәм “Союз-агро” ширкәтләрендә булып, аларның икътисадый хәлен анализлаганнар иде.
— Бөтендөнья сәүдә оешмасына кергәч, ишекләр ачылды, — диде Н.Якушкин киңәшмәне ачканда. — Хәзер продукциянең үзкыйммәте дигән төшенчә иң беренче планга килеп басты. Нәрсә өчен җитештерәбез?
Район авыл хуҗалыгы һәм азык–төлек идарәсенең үсемлекчелек бүлеге җитәкчесе Миннәхмәт Сәгыйтьҗанов ике хуҗалыкның үсемлекчелектәге хәлләрен ачыклап бирде. “Союз–агро”да агроном юк. Бу үзе үк әлеге тармакка карашның нинди булуын күрсәтеп тора. Авыл хуҗалыгы һәм азык–төлек министрлыгы киләчәктә агроном булмаган хуҗалыкларга субсидия бирмәячәк. “Агрономның бурычы — чәчүлек мәйданнарның оптималь структурасын эшләү, авыл хуҗалыгы культураларын дөрес итеп басуларга урнаштыру һәм игү технологиясен тәэмин итү,” — диде баш белгеч.
“Союз–агро” ширкәтендә агроном булмауның нәтиҗәсе — үзеннән соң бер гектарда 58–60 килограмм азот калдыра торган, бер килограмм бөртектә 130 грамм аксым булган борчак чәчү структурасында бөтенләй юк. Бу культура бик яхшы элгәр дә әле.
Ике хуҗалыкта да күпьеллык үләннәр мәйданнары һәм яшьләре буенча да нормада, әмма составларында кузаклылар бик аз, шуңа күрә ризыкта аксым аз. Андый азыкны күпме ашатсаң да, продукция артмый, бары тик чыгымнар гына арта.
Орлыкчылык белән шөгыльләнү юк дәрәҗәсендә, “Союз–агро”да чәчүлекләрне химик эшкәртү белән мәшәкатьләнмиләр һ.б.
Әле менә шундый кара исәп белән генә дә “Союз–агро”да — 2, “Аю”да 3 млн. сум акча алынмый калган.
Авыл хуҗалыгы һәм азык–төлек идарәсенең терлекчелек бүлеге консультанты Руслан Фәйзрахманов терлекчелектә алынып җитмәгән акчаларны исәпләп күрсәтте. Продукциянең сыйфаты түбән, уртача тәүлеклек үсеш аз, вак терлек тапшыралар, кысыр сыерлар күп һ.б.
Район авыл хуҗалыгы һәм азык–төлек идарәсенең финанс–икътисад бүлеге җитәкчесе Айрат Каюмов, министрлыкның икътисадый анализ һәм планлаштыру бүлеге җитәкчесе Марат Низаметдинов чыгышларында да киләчәктә хуҗалык итүгә мондый карашның тупикка алып киләчәге күрсәтелде, файдалы тәкъдимнәр әйтелде.
Киңәшмәдә район авыл хуҗалыгы һәм азык–төлек идарәсе җитәкчесе Айдар Габбасов катнашты.
Ильяс ФӘТТАХОВ