Президент югары бәя бирде

Президент югары бәя бирде
Татарстан Республикасы Президенты Рөстәм Миңнеханов 31 августта Арча районына килде. Олы кунакны муниципаль район башлыгы Алмас Назиров каршы алды һәм озатып йөрде. Президент Арча шәһәренең көньяк өлешендә төзелгән күп функцияле мәдәни–спорт үзәген ачуда катнашты һәм шәһәрнең ныклап төзекләндерелгән икенче номерлы урта мәктәбендә булды (рәсемдә).
Соңгы елларда республикада бик күп төрле программалар тормышка ашырыла, алар безнең районда да киң чагылыш таба. Узган ел 1 ноябрьдә шәһәребезнең Бәширов урамында “Бәләкәч” программасы кысаларында 140 урынлы балалар бакчасын ачу тантанасында республика Президенты Рөстәм Миңнеханов үзе катнашты.
Быел шәһәрнең көньягында күп функцияле мәдәни–спорт үзәге төзелү дә мөһим вакыйга булды. “Арча КСМы” ширкәте төзүчеләре аны ярты ел эчендә өлгерттеләр. Әлеге бинаның проекты да үзенчәлекле, республикада бердәнбер диләр.
Муниципаль район башлыгы Алмас Назиров тантанада ясаган чыгышында республика Президенты Рөстәм Миңнехановка Арча районына күрсәткән игътибары, булышлыгы өчен зур рәхмәт белдерде.
— Әлеге күп функцияле мәдәни–спорт үзәге төзелү дә шуның ачык чагылышы, – диде Алмас Әминович. — Арча районы хезмәтчәннәре күрсәтелгән ышанычны аклау өчен киләчәктә дә көчләрен кызганмаслар.
Республика Президенты Рөстәм Миңнеханов, тантана белән котлап, әлеге үзәкнең Татарстанда клублар төзүдә үрнәк булачагын әйтте, җиһазлар алу өчен 300 мең сумлык сертификат тапшырды.
Арчаның икенче номерлы урта мәктәбе 40 ел элек 1972 елда ачыла һәм шуннан соң ныклап төзекләндерү булмаган. Хәзерге вакытта анда 630 бала укый, 66 укытучы эшли. Быел мәктәп ныклап төзекләндерү буенча республика программасына кертелгән иде. Республика бюджетыннан 12,8 млн. сум акча бирелде. Моннан тыш, район бюджеты исәбенә өстәмә эшләр башкарылды. Мәктәптә электр үткәргечләр, җылылык системасы, түбә тулысынча алышынды, фасад җылытылды. Мәктәп директоры Гөлнара Гарипова Президентны ныклап төзекләндерелгән соңгы үзгәреш-ләр белән таныштырды. Рөстәм Нургалиевич мәктәпне күрүгә үк: “Өр–яңа булган бу!”— дип бәяләгән иде. Бина матур итеп тышланган, коридорлар да киңәеп киткән кебек. Беренче катта иркен китапханә, актлар залы, ашханә, спорт залы, башлангыч сыйныфлар өчен уку кабинетлары, медпункт. Икенче һәм өченче катлар өлкән сыйныф укучылары өчен заманча җиһазландырылган. Химия, биология, физика фәннәре өчен бөтен уңайлыклары булган лабораторияләр. Кабинетларда җылылык бөркелеп тора, нур уйный, рәхәтлек.
Яңа, иркен, уңайлы актлар залында укытучылар белән очрашу да бик җылы шарт-ларда үтте. Президентның кәефе әйбәт, аның үзе күр-гәннәрдән канәгать калуы сизелеп тора иде. Муниципаль район башлыгы Алмас Назиров, республика җитәкчесенә рәхмәт сүзләрен җиткереп, соңгы елларда районда башкарылган эшләрне санап үтте, арчалыларның быел да яулаган үрләрдән чигенергә җыенмауларын белдерде.
Республика Президенты Рөстәм Миңнеханов үзенең чыгышында Арчаның соңгы елларда нык үзгәрүен билгеләп үтте, муниципаль район башлыгы Алмас Назировка, төзүчеләргә рәхмәт әйтте, укучыларга, укытучыларга уңышлар теләде.
— Мин бу мәктәпнең элек ничек булганын да яхшы хәтерлим,— диде Президент. — Ул яңа вакытта да хәзерге кебек үк түгел иде. Бүген монда бар да эшләнгән, җиһазландырылган һәм бик профессио-наль коллектив эшли, директорның да тырышлыгы күренеп тора.
Рөстәм Миңнеханов мәктәпкә интерактив комплекс бүләк итте.
Ильяс ФӘТТАХОВ