Яңалыклар

Авыл хуҗалыгы өлкәсенә белгечләр әзерләүдә озак еллар нәтиҗәле хезмәте өчен һәм 55 яшь тулу уңаеннан Арча агросәнәгать һөнәри көллиятенең производствога өйрәтү мастеры Ибраһимова Тамара Мидхәт кызы муниципаль район башлыгының Рәхмәт хаты белән бүләкләнде.

23 сентябрьдә шәһәр стадионында “Татарстан кроссы–2012” республика массакүләм ярышлары булып узды. Үз үлчәү авырлыкларында Эмиль Мостафин һәм Гөлназ Зыятдинова (Арчаның беренче мәктәбе), Фәнүзә Сәләхова (Урта Курса), Илнур Әһлиуллин һәм Энҗе Гыйззәтова (педагогика көллияте), Адель Мөҗипов, Хәйдәр Зәйнуллин һәм Фәгыйлә Борһанова (“Олимп” балалар–яшүсмерләр спорт мәктәбе) һәм Гүзәлия Гыйниятова (Арчаның икенче мәктәбе) беренче урыннарны яуладылар.

Арча Мәдәният йорты хезмәткәрләре өлкәннәр декадасын бәйрәм концерты белән башлап җибәрергә әзерләнә. Анда район Мәдәният йорты үзешчәннәре белән бергә район ветераннар советы каршындагы үзешчән ветераннар да катнашачак. Ул 2 октябрьдә көндезге 13 сәгатьтә башлана. 3 октябрьдә район Мәдәният йорты каршындагы концерт бригадасы өлкәннәр һәм инвалидлар интернат йортында концерт белән чыгыш ясаячак.

Яңа уку елы Арча укучылар йортындагы өлкән сыйныфлар Думасына да үзгәрешләр кертте. Чираттагы утырышта Думаның спикеры итеп бишенче гимна-зиядән Гүзәл Зиятдинова, вице–спикер итеп Булат Төхвәтуллин (5 гимназия) һәм комитетлар башлыклары сайланды. Яңа елга план билгеләнде. Шулай ук утырышта Альфиза Урманова (1нче мәктәптән) лидерлык нигезе турында лекция укыды.

Ай ахырында якташыбыз, танылган җырчы, Татарстанның атказанган артисты Габделфәрт Сафин район халкы алдында зур концерт белән чыгыш ясаячак. Тагын шунысы бар, үзенең “Уфалла арбасы” дигән җырына клипны да җырчы безнең Арча районында, туган авылы Симетбашта төшерде. Бу җырда Габделфәрт Сафинның балачагы, уфалла арбасы тагып әнисе белән болынга йөргән, ял иткән вакытларында уфалла арбасыннан сәхнә ясап, концерт куюлары тасвирлана. Клипның режиссеры — “Җидегән чишмә” халык театры режиссеры Рафис Сәләхетдинов. Катнашучылары — режиссерның тормыш иптәше Рәзинә, уллары Раяз һәм Рәсим.

РАЙОН ХУҖАЛЫКЛАРЫНДА 63600 гектарда туфракны төп эшкәртәсе бар. 25 сентябрьгә шуның 48168 гектары эшкәртелде, 9310 гектарда сөрү катламы тирәнәйтелде.

1467 ГЕКТАРДАГЫ БӘРӘҢГЕНЕҢ 1097 гектары алынды. Бер гектардан уртача уңыш — 74,8 центнер.

16872 ГЕКТАРДАГЫ КУКУРУЗНЫҢ 13306 гектары урылды.

ТАТАРСТАН РЕСПУБЛИКАСЫНДА 19 сентябрьдән 28 сентябрьгә кадәр “Балаларның юл куркынычсызлыгы декадасы” уза. Әлеге чорда мәгариф учреждениеләрендә юл хәрәкәте иминлеге буенча ачык дәресләр үткәрелә. Балалар бакчаларында төрле конкурслар һәм викториналар оештырыла.

АРЧА РАЙОНЫ эшмәкәрләренең “Прогресс” берлеге 28 сентябрьдә Арча шәһәренең Галактионов урамы, 27 йорт (мунча бинасы, ишегалдыннан керәсе) адресы буенча бизнес үзәген ачу тантанасына чакыра. 10 сәгатьтә башлана.

АВЫЛ ХАЛКЫ АРАСЫНДА сәламәтлекне ныгыту һәм сәламәт яшәү рәвешен пропагандалау максатында 29 сентябрьдә Арча шәһәрендә “Сәламәтлек” спартакиадасы кысаларында җиңел атлетика кроссы буенча беренчелек уздырыла. Башлана 10 сәгатьтә.