Тиз һәм уңайлы

Тиз һәм уңайлы
22 сентябрьдә ТР Министрлар Кабинетында Татарстан Республикасы Президенты Рөстәм Миңнеханов видеоконференция режимында үткәргән киңәшмәдә халыкка электрон хезмәт күрсәтү мәсьәләсе дә тикшерелде. Республика җитәкчелеге халык өчен гаять уңай булган әлеге хезмәтне үстерү бурычын куя.
Безнең районда бу өлкәдә эшләр ничек тора соң? Бердәм исәп–хисап үзәге директоры Линар Әхмәдиев белән әңгәмәбез шул хакта.
— Районда торак–коммуналь түләүләр өчен 10 меңгә якын лицевой счет ачылган, — диде Линар Хәмит улы. — Шуларның 3,8 проценты гына электрон түләү хезмәтеннән файдалана. Бу бик аз, билгеле, без районнар арасында 26нчы урында.
— Әлеге хезмәтнең өстенлекләрен тагын бер тапкыр искә төшереп үтик әле.
— Коммуналь хезмәтләргә Интернет аша түләгәндә вакыт янга кала, чиратта басып торасы юк. Банкларда, почта бүлекчәләрендә түләгәндә 15–20 сум комиссия җыемы алалар. Дөрес, Интернет аша башкарганда да түлисе бар, әмма ул 1 проценттан артмый.
Банк һәм почта бүлекчәләре билгеле бер вакытта гына кабул итсә, электрон түләүләрне теләсә кайсы компьютердан тәүлекнең теләсә кайсы вакытында: өйдә, эштә яки чит илдә ялда булганда да башкарырга мөмкин.
— Электрон түләү тәртибен аңлатып китү дә зыян итмәс.
— Uslugi.tatar.ru сайтында онлайн–хезмәтләр юлында “Оплата счетов > Заплатить за квартиру”ны сайлап алабыз. Монда “Заявление на оформление единого платежного документа”ны тутырырга кирәк. Әлеге хезмәтнең үтәлергә тиешле бер шарты бар — түләүчедә акча күчерү өчен теләсә кайсы банкның пластик картасы булуы шарт. Шуннан, сумманы күрсәтеп, “Оплатить” дигән төймәгә басабыз, “Далее” дигән төймәгә басып, банк картасын алабыз, андагы сумманы түләү исәбенә киметәчәкләр. Экранда пәйда булган бланкта түләү картасының номеры, аның срогы һәм CVV2 яки CVC2 коды (номердагы соңгы өч сан сезнең картаның арткы ягында) тутырыла. Шулардан соң “Оплатить” дигән команда бирергә була. Әлеге тәрәзәне процесс тәмамланмыйча ябарга яки яңартырга тәкъдим ителми. Экранда чек чыккач, аны бастырып алырга мөмкин.
Без электрон түләү тәртибен квитанцияләрнең арткы ягына бастырып та җибәрәбез, аңлату эшләре алып барабыз. 3–33–08, 3–33–09 номерлары белән шалтыратсагыз, Интернет түләүләр буенча белгеч Данис Латыйпов барлык сорауларга җавап бирәчәк.
Ильяс СӘХӘПОВ