Ташкичүдә – медпункт, Яңа Кенәрдә – интернат

Ташкичүдә – медпункт, Яңа Кенәрдә – интернат
“Арча КСМы” ширкәте коллективы башкарган эшләргә исең китәрлек. Быел тапшырган объектларын санау өчен генә дә күпме вакыт кирәк булыр иде.
Әле күптән түгел генә Арча шәһәренең көньяк өлешендә мәдәни–спорт үзәге ачылды, Арчаның икенче номерлы урта мәктәбе ныклап төзекләндерелде, аларның сыйфатына, эшләнешенә республика Президенты да югары бәя бирде. Алар төзегән фатирлар, төзекләндергән биналар күпме!
Быел мәктәпләрнең яңа уку елына әзерлеген карап йөргәндә муниципаль район башлыгы Алмас Назиров: “Ташкичү халкы, җитәкчеләр медпунктны төзекләндерүне сорый, ә нигә мәктәпнең буш өлешендә аның яңасын ачмаска? Рафаэль Әдһәмович командасы аны эшләп тә бирә”, — дигән иде.
Бу вакытта “Арча КСМы” егетләре мәктәпнең түбәсен ябалар иде. “Бик әйбәт чыга, монысын да шулай эшләп бирегез инде”, — дип мактап алды төзүчеләрне район башлыгы.
Әлеге сөйләшүдән соң бер ай дигәндә яңа фельдшер–акушерлык пункты әзер дә булды. 24 сентябрьдә аны ачу тантанасында муниципаль район башлыгы Алмас Назиров Рафаэль Муллагалиев җитәкләгән “Арча КСМы” төзүчеләренә, аның урынбасары Азат Җәләлетдиновка рәхмәт әйтте, яңа медпункт сафка басуны авыл тормышында мөһим вакыйга дип атады.
— Медпункт, башлангыч мәктәп һәр авылда булуы мөһим, — диде ул. — Бөтен әйбер беренче чиратта кешеләр турында кайгыртуга юнәлдерелгән булырга тиеш. Әлеге фельдшер–акушерлык пунктының мәктәптә булуы да бик әйбәт, балалар өчен җайлы, авыл халкына да уңайлы, керү юлы да аерым.
Районның баш табибы Тәлгать Баһаветдинов та тагын бер яңа пункт ачылуга бик шат.
— Авылларда яшәүчеләрнең сәламәтлеге турында кайгырту юнәлешендә эш алып барыла, — диде ул. — 41 авылда беренчел медицина ярдәме күрсәтелә ала торган йорт хуҗалыклары булдыру планлаштырыла.
— Монысы икенче нәрсә, — диде район башлыгы. — Авыл саен медпунктлар булдыру мөмкинлеге эзләргә кирәк.
Кырык ел медицина өлкәсендә хезмәт иткән Эльмира Маликова авыл халкы, хезмәттәшләре исеменнән рәхмәт сүзләре ирештерде.
Муниципаль район башлыгы Алмас Назиров яңа пункттагы шартларга, җиһазлануына югары бәя бирде.
Бу көнне Яңа Кенәрдә дә күңелле вакыйгаларның чираттагысы (аннан алдагыларының әле “җылысы” да суынмаган) — быел сафка баскан мәһабәт лицейның интернатын кабул итү булды.
— Безнең өчен көтеп алган, тарихи вакыйга бу, — диде лицей директоры Зөлфия Хәйруллина. — Балалар, ата–аналар сөенеп бетә алмый, Алмас Әминович, Сезгә, төзүчеләргә зур рәхмәт!
Муниципаль район башлыгы Алмас Назиров үзенең чыгышында әлеге бинаның тарихын сөйләп алды.
— Килгән саен тирә–якның ямен алып утырган бу бинаны нишләтеп була? — дигән сорау борчый иде. Берәр эшмәкәрлек цехы ачучы юкмы дип тә тәкъдим итеп карадык. Аның язмышын хәл итүдә республиканың мәгариф һәм фән министры урынбасары Гүзәлия Тәлгатовна Минкина (ул сезнең каршыда басып тора) мөһим роль уйнады: “Ремонтка 5 миллион сум акча бирү мөмкинлеге бар”, — диде. Без башта аны педагогика көллиятенең тулай торагын ремонтлауга тотарга уйлаган идек. Алай барып чыкмагач, Яңа Кенәрдәге менә шушы бинага тотарга насыйп булды.
Район башлыгы юллар булмаган ерак авыллардан килеп укучы балалар өчен интернатның бик кирәк булуын әйтеп үтте. Юллар булмагач, автобус та йөртеп булмый. Ә монда балаларга яшәү, дәрес әзерләү, ял итү өчен бөтен шартлар тудырылган.
ТР мәгариф һәм фән министры урынбасары Гүзәлия Минкина Арча районында төзелешкә зур игътибар бирелүен әйтте, мәгариф объектлары күпләр сокланырлык хәлдә. “Яңа Кенәрдә шундый интернат ачылу — барыбыз өчен дә зур куаныч”, — диде ул.
Ильяс ФӘТТАХОВ