Сезнең гомер – байлык

Сезнең гомер – байлык
Бу көнне өлкән кешеләр генә түгел, яшь буын вәкилләре дә ел саен көтеп ала. Үзләренә күрсәтелгән игътибардан өлкән кешеләрнең шатлануын күрү һәркем өчен куаныч ул.
Өлкәннәр көне — күпсанлы бәйрәмнәр арасында иң матурларының берсе.Чөнки ул илебез иминлеге өчен армый-талмый хезмәт куйган кешеләрне хөрмәтләү бәйрәме. Ә өлкәннәребез — тормыштагы гореф-гадәтләрне, рухи кыйммәтләрне буыннан буынга тапшыручылар, яшьләргә терәк булып, тормыш тәҗрибәләрен мирас итеп калдыручылар.
Районыбызда өлкәннәргә караш гел яхшы булса да, бу көн уңаеннан игътибар аеруча арта: төрле мәдәни чаралар үткәрелә, бәйрәм өстәлләре әзерләнә, концерт-лар куела, бүләкләр тапшырыла. Соңгы елларда Арча районында барган матур үзгәрешләрне күрсәтү традициягә әйләнеп килә. Быел да декаданың тәүге көнендә үк башлангыч оешма рәисләре Арча буйлап сәяхәт кылды. Узган елгы сәя-хәттән алган кичерешләре белән уртаклашып барган өлкәннәрне бер ел эчендәге аерма гаҗәпкә калдырды. Ни арада шулкадәр эш башкарылырга мөмкин, дип шаккатты алар. Ишекләрен киң ачып каршы алган, әле күптән түгел сафка баскан Арча станциясендәге күп функцияле мәдәни-спорт үзәгендә район үзешчәннәре матур җырларын бүләк итте, узган ел ноябрь башында ачылган “Бәләкәч” балалар бакчасы аллы-гөлле чәчәкләре белән каршы алды. Былтыр төзелеш эшләре генә барган бакчаны күргән өлкәннәр аның бүгенгесен җәннәт бакчасына тиң дип бәяләде. Бакчага 170ләп бала йөри. Бакча буйлап экскурсиядә йөргәндә, мөгаен, һәрбер өлкән кеше үзенең авыр вакытларга туры килгән ачлык–ялангачлык хөкем сөргән балачак елларын искә алмый калмагандыр һәм күңелләреннән бүгенге тормышка шөкер кылганнардыр. Арчаның 3нче номерлы башлангыч гомуми белем мәктәбе дә бу уку елыннан үзгәрешләр кичерә: бинаның иске өлешен ныклап төзекләндерү эшләре бара. Биредә балалар җыр-бию белән каршы алды. 165 бала укый, һәр кабинетта мультимедиа проекты эшли, быелгы уку елына җиһазлар яңартылган.
Аннан автобуслар өлкәннәрне Арча станциясе мәхәлләсенең күптән түгел ачылган “Изгеләр” мәчетенә алып китте. Андагы хозурлык өлкәннәрнең җаннарына шифа биреп, күңелләрен рухландырды.
Яңа уку елын ныклап төзекләндерелгән бинада башлап җибәргән Арчаның 2нче номерлы урта гомуми белем мәктәбе җыр-моңга сәләтле укучыларының чыгышлары һәм мул табын белән каршы алды. Ә анда инде гармун моңнарына кушылып җырлаулар, күргән-ишеткәннәрдән алынган хис-кичерешләрне уртаклашу... “Газета битләреннән укып, телевидение аша күреп, республикада, районда барган сәясәт, көн сулышы, яшәеш белән таныш идек, ә райондагы үзгәрешләрне, яңа сафка баскан социаль объектларны үз күзләребез белән күрү – безнең өчен зур шатлык. Аларны җирнең җиде могҗизасына тиңләрлек”, — дип тәэсирләре белән уртаклашты өлкәннәр. Ветераннар советы рәисе Альберт Җамалиев, район хакимиятенә, социаль яклау идарәсенә рәхмәтлә-рен җиткерде. “Безнең, өлкәннәрнең төп бурычы — тормышыбызда барган үзгәрешләр, уңайлыкларны күреп, үткәннәре белән чагыштырып яшьләргә җиткерү. Өлкәннәребезне онытмаган, һәрвакыт ярдәм итеп яшәгән өчен район ветераннар советы “Жилкомбытсервис”, “Теплосервис”, “Энергосервис” ширкәтләренә, район кулланучылар җәмгыятенә, “Арча нефть продуктлары”, АСПК оешмаларына, шәхси эшмәкәр Гарәфиевага, җирле үзидарәләргә, авыл хуҗалыгы предприятиеләренә һ.б. рәхмәтле”, — диде. Өлкәннәрне озатып, алар белән аралашып йөргән район башкарма комитеты җитәкчесе урынбасары Надия Мифтахетдинова, үз чыгышында өлкәннәрне бәйрәм белән котлап, районда барган төзелеш, төзекләндерү программалары турында сөйләде, мисаллар китерде. “Һәр өлкәдә халык мәнфәгатен кайгыртып эш гөрләп тора. Бурычыбыз — намуслы хезмәт үрнәгендә яшьләргә патриотик тәрбия бирү”, — диде ул. Социаль яклау идарәсе җитәкчесе Рамил Гарифҗанов өлкән кешеләрнең тормышларын яхшырту, кайгырту буенча идарәнең эшчәнлеге, район ветераннар советы рәисе Альберт Җамалиев советның 9 айлык эш нәти-җәләре белән таныштырды.
Мондый рухтагы очрашулар киләчәккә рух өсти, көч бирә. Декадада гына түгел, өлкән буын вәкилләре һәрвакыт җылы сүзгә, игътибар, якты карашка мохтаҗ. Шуны истә тотып мәрхәмәтле булып яшәсәк иде.
Өлкәннәребезне хөрмәтләүгә багышланган чаралар ун көн буе барачак. Кичә аларга район Мәдәният йортында район үзешчәннәре куйган концерт карау бәхете насыйп булды. Ә бер төркем ветераннар Казанда ветераннар советы оешуга 20 ел тулу уңаеннан оештырылган чарада катнашты. Арчадагы картлар һәм инвалидлар йортында, “Өмет” тернәкләндерү үзәгендә, Яңа Кенәр мәдәният йортында, шулай ук авыл җирлекләрендә җирлектәге социаль объектлар хезмәткәрләре белән берлектә әзерләнгән төрле чаралар, концертлар, очрашулар бара. Өлкәннәребез арасында иҗади күңелле, шигъри җанлы, моңлы кешеләр дә шактый. Аларның иҗат җимешләре республика матбугаты битләрендә еш басыла. Арада инде китаплары дөнья күргәннәр дә бар. Мәсәлән, Арчадан Факия Шәрәфетдинова, Яңа Кенәрдән гомере буе мәктәптә вожатый булып эшләгән Әлфия Бәдретдинова шундыйлардан. Ункөнлектә аларның китапларын тәкъдир итү кичәләре дә үткәреләчәк. Ә караучысы булмаганнарга йорт эшләрендә булышырга волонтерлар килә.
Розалия ЗИННӘТОВА