22.00. Балаларыгыз өйдәме?

22.00. Балаларыгыз өйдәме?
2010 елның 14 октябрендә кабул ителгән “Балаларның сәламәтлегенә, аларның физик, интеллектуаль, психик, рухи һәм хокукый үсешенә зыян килүне кисәтү буенча чаралар турында”гы Татарстан Республикасының 71нче номерлы законы нигезендә 18 яше тулмаган егет һәм кызларга кичке 10нан иртәнге 6 сәгатькә кадәр урамда йөрү тыела.
Балигъ булмаган яшьтәге балаларның үзләренә, аларның ата-аналарына кабаттан бу хакта аңлату максатыннан без район эчке эшләр бүлегенең балигъ булмаганнар эшләре буенча бүлекнең өлкән инспекторы Алсу Һидиятуллинага берничә сорау белән мөрәҗәгать иттек.
– Алсу Айдаровна, мәктәп укучыларының озын җәйге каникуллары үтеп китте. Бу закон ул чорга гына кагылдымы, әллә уку вакытын гына үз эченә аламы?
– Уку вакытында (1 сентябрьдән 31 майга кадәр) балигъ булмаган яшьтәге балаларга кичке 10нан иртәнге 6 сәгатькә кадәр урамда йөрү тыелса, җәйге каникул вакытында, ягъни 31 майдан 1 сентябрьгә кадәр балалар кичке 11дә өйдә булырга тиеш.
–– Димәк, җәйге айларда да сез рейдлар үткәреп, тикшереп, мәктәп укучыларының буш вакытларын ничек, кайда һәм кайсы сәгатькә кадәр үткәрүләрен тикшереп торасыз?
–– Без махсус төзелгән график нигезендә авылларга да чыгып, Арча шәһәрендә дә даими рәвештә рейдлар үткәрәбез. Клублар, мәдәният йортларында да булабыз, урамнарда да йөрибез. Анда бездән тыш участок уполномоченные, район мәгариф идарәсе (мәктәп директорлары да булырга мөмкин), халыкны социаль яклау идарәсе, район яшьләр эшләре, спорт һәм туризм бүлеге, мәдәният идарәсе, район үзәк хастаханәсе, балигъ булмаганнар белән эшләү комиссиясе, опека һәм попечительлек бүлегеннән дә вәкилләр катнаша. Җәйге рейдларга мәктәп директорлары Гөлнара Гарипова (икенче мәктәп), Альмира Гатауллина (җиденче мәктәп), Рамил Мөхәммәдияров (беренче мәктәп) та чыкты. Ел башыннан 54 рейд үткәрелде, 39 балигъ булмаган яшьтәге баланың закон таләпләрен бозуы ачыкланды. Җәйге чорда төнлә йөрергә яратучылар авылларда аеруча күп булды. Араларында каникулга шәһәрләрдән кунакка кайтканнар да очрады. 18 очракта ата-аналарга штраф салынды, 15е кисәтелде.
Яңа уку елы башында авыл җирлекләре, мәктәпләр, мәдәният йортлары һәм клублар җитәкчеләре белән яңадан хәбәрләштек. Алар аңлату эшләре алып барырга, ата-аналар комитетыннан бер кеше, укытучы, участок уполномоченные белән бергәләп рейдлар үткәрергә тиешле. Аннан укытучылар һәр ата-анага балигъ булмаган яшьтәге балаларын урамга чыгармаска тиешләре турында кул куйдырталар. Клублар, мәдәният йортларында әлеге законнан эземтә стенага эленергә тиеш. Авылларда клуб мөдирләре һәр баланың ничә яшьтә икәнен белә. Шуңа законны бозган өчен аларга да 3000 сумнан 5000 сумга кадәр штраф салына.
Без, үз чиратыбызда, профилактик чара буларак уку чорында мәктәпләргә чыгып лекцияләр, түгәрәк өстәлләр, очрашулар оештырабыз. Җәен “Шатлык” лагеренда үткәрелгән чарабыз да шушы теманы үз эченә алды.
– Ә балалар законны бозган очракта нинди җәза бирелә?
– Баланың ата-анасы чакырыла һәм беркетмә төзелә. Шунда ук килә алмасалар, икенче көнгә чакыртабыз. Балигъ булмаганнар белән эшләү комиссиясендә тиешле нәтиҗә ясала. Беренче очракта кисәтү бирелә яки 500дән 1000 сумга кадәр штраф салына. Ел дәвамында кабатланса, штраф күләме 2000 сумга җитә.
Гөлсинә ЗӘКИЕВА