Бу үзәк бик кирәк

Бу үзәк бик кирәк
Үткән җомгада Арчада “Прогресс” бизнес үзәге ачылды.
— Безнең күптәнге хыялыбыз тормышка ашты. Эшмәкәрләрнең барлык иҗтимагый оешмалары бер түбә астына берләште. Кызганычка каршы, бүгенге көнгә кадәр районда эшмәкәрләр өчен җыелып сөйләшү, килеп туган мәсьәләләрне хәл итү урыны юк иде. Бүген мондый мөмкинлек туды. Район хакимияте, шәһәр башкарма комитеты сезгә барлык башлангычларда да ярдәм күрсәтергә әзер, — диде район башкарма комитеты җитәкчесенең беренче урынбасары Рафил Исмәгыйлев үз чыгышында. — Үзәк эшчәнлеге укыту-консультация юнәлешендә алып барылачак. Биредә район эшмәкәрләр ассоциациясе рәисе Алимас Әмиров һәм “Прогресс” эшмәкәрләр берлеге рәисе Назыйм Сибагатов кебек тәҗрибәле эшмәкәрләр үз эшләрен башлап җибәрүчеләр өчен файдалы мәгълүматлар бирәчәкләр, консультацияләр үткәрәчәкләр. Шулай ук аларның аерым кабул итү көннәре билгеләнәчәк. Моннан тыш район башкарма комитеты бүлекләре белгечләре дә кабул итәчәк, монда ук эшмәкәрләргә юридик ярдәм алу мөмкинлеге дә туачак. Безнең эшчәнлекнең мөһим юнәлеше — эшмәкәрләрне кече һәм урта бизнесны үстерү буенча республика һәм федераль программалар белән таныштыру һәм аларны әлеге программаларда катнашуга тарту.
Үзәкнең беренче җыелышында ТР сәүдә-сәнәгать палатасы идарәсе рәисе урынбасары Валерий Герасимов, “Грант” бизнес-үзәгенең генераль директоры Фәридә Гыйльфанова, район фермерлар һәм крестьян хуҗалыклары ассоциациясе рәисе Мөдәрис Миннуллин, район башкарма комитетының бүлек җитәкчеләре, банклар вәкилләре һәм район эшмәкәрләре катнашты.
— Бизнес-үзәк оештыруның максаты — эшмәкәрләргә тиз һәм тулы мәгълүмат бирү, аларга эшлекле һәм хокукый ярдәм күрсәтү. Үзәк эшчәнлеге нәтиҗәсендә район эшмәкәрләре дөрес итеп эш итәргә, сөйләшүләр алып барырга, килешүләр төзергә өйрәнәчәк, бу аларга килеп туган мәсьләләрне хәл итүне җиңеләйтер, — дип билгеләп үтте үз чыгышында эшмәкәрләр берлеге рәисе Н.Сибагатов. — Бизнес-үзәкне муниципаль район башлыгы Алмас Назиров ярдәмендә ачтык. Без киләчәктә дә район җитәкчелеге белән ныклы элемтәдә торачакбыз. Район кече һәм урта эшмәкәрлектән башка үсә алмаган кебек, бизнеска да район ярдәменнән башка аякка басу авыр.
Соңыннан иң актив эшмәкәрләргә “Прогресс” эшмәкәрләр берлегенең рәхмәт хатлары тапшырылды.
Гөлназ
ГЫЙНИАТУЛЛИНА