Сәләтлеләргә юл ачык

Сәләтлеләргә юл ачык
Арча төбәге мәгърифәткә нигез салучылары, талантлы шәхесләре, башкарган эшләре белән үзләреннән якты эз калдырган мөхтәрәм кешеләре белән данлыклы. Татар дөньясында Арча ягы мәдәният, иҗат өлкәсе буенча аерым урын алып тора. Без, Арча җирлегеннән шытып чыгып, матур эшләре, күркәм гамәлләре, тоткан кыйблалары аша халкыбызның күңеленә үтеп кергән шәхесләребез белән горурланып яшибез һәм яшәячәкбез.
Әнә шул горурлык хисе буыннан буынга күчеп, безгә яңадан-яңа үрләр яуларга, сәләтләребезне үстерергә ярдәм итә. Сәләтлеләрнең иҗатка игътибарын арттыру максатыннан район җирлегендә төрле чаралар оештырыла. 2008 елдан башлап үткәрелеп килүче Гариф Ахунов исемендәге әдәбият премиясенә конкурс шундыйлар рәтендә. Якташыбыз, Татарстанның халык язучысы, Габдулла Тукай исемендәге дәүләт бүләге лауреаты Гариф Ахуновның туган көне уңаеннан, аның башкарган изге, игелекле эшләрен дәвам иттереп, район башлыгы Алмас Назиров карары нигезендә районыбызның талантлы яшьләренә (30 яшькә кадәрле) әдәбият һәм сәнгать өлкәсендә яулаган уңышлары өчен тапшырыла ул премия.
Быел конкурска 14 иҗат эше кабул ителгән. Шуларның 9ы, комиссия тарафыннан уңай бәяләнеп, лауреат исеменә тәкъдим ителде. 2012 елда “Әдәбият, мәдәният һәм сәнгать өлкәсендә Гариф Ахунов исемендәге әдәби премия лауреа-ты” дигән мактаулы исемгә 6 яшь талант иясе һәм 3 иҗат коллективы лаек булды. Менә алар: Гөлзилә Гафурова, Алисә Абдуллина, Диләрә Булатова, Арча балалар сәнгать мәктәбенең гармунчылар ансамбле (җитәкчесе Заһидә Гайфуллина), “Сөембикә” бию коллективы (җитәкчесе Илһамия Гыйләҗиева), Илсөя Галиәкбәрова, Ләйсән Галимҗанова, Арча укучылар сараеның “Хәят” радиостудиясе (җитәкчесе Дамир Таҗиев), Айнур Галимов.
Аллаһы Тәгалә аларның һәрберсенә сәләтне өеп биргән. Кечкенәдән шигырьләр язучы Гөлзиләнең шигырьләре республика газета-журналларында урын ала, үзе исә, төрле конкурсларда катнашып, җиңүләр яулауга ирешкән. Алисә дә шигырьләр иҗат итә. Арча укучылар сарае каршындагы “Тукай якташы” әдәби-иҗат түгәрәгендә иҗат серләренә төшенә. Нәфис сүз остасы Диләрә Булатова 8 яшьтә генә булуына карамастан, инде шактый уңышларга ирешкән, күп кенә конкурс-ларда җиңүче, дипломнар белән бүләкләнгән. Ул “Мәдәният” номинациясендә кызыксындыру премиясенә лаек дип табылды. Гармунчылар ансамбле районкүләм конкурсларда гел алдынгы урыннарны яулап килә, республика фестивальләрендә дә казанган уңышлары байтак. Ә “Сөембикә” бию коллективы турында районда ишетмәүчеләр бик сирәктер, мөгаен. Аларның да район, республика күләмендәге уңышлары санап бетерерлек түгел. Илсөя Галиәкбәрова кечкенәдән шигырьләр иҗат итә, төрле конкурсларда катнашып, призлы урыннар ала. Иҗат юлын әкиятләр, мәкаләләр язу белән башлап җибәргән Ләйсән Галимҗанова, хәзер күләмле хи-кәяләр язып, яңадан-яңа уңышларга ирешә. “Хәят” радиостудиясе 2009 елның сентябрендә оеша. Аның максаты — яшьләрнең төрле яктан сәләтен, осталыкларын ачарга ярдәм итү. 3 ел эчендә ул эфирга 142 тапшыру әзерләп чыгара, “Арча” телерадиокомпаниясе белән тыгыз элемтәдә эшләгәне өчен районның Мактау грамоталары белән бүләкләнгән. Айнур Галимовның иҗаты публицистика номинациясендә Г.Ахунов исемендәге 1 дәрәҗә әдәбият премиясенә лаек булды. Бик яшь килеш язмышның ачы сынауларына дучар булган Айнур төшенкелеккә бирелмичә, иҗат белән яши. Ул “Шәһри Казан” газетасында “Әйтте диярсез” баганасын, язма геройлары белән Интернет аша танышып, аралашып, “Сынаулар аша” рубрикасын алып бара, “Дөнья булгач” сәхифәсенә рус теленнән тәрҗемәләр ясый. 2011 елда Айнур “Бәллүр каләм” журналистлар конкурсының “Дебют” номинациясендә диплом белән бүләкләнгән.
Җиңүчеләрне бәйрәмгә кайткан кунаклар Язучылар берлеге рәисе урынбасары, якташыбыз Вакыйф Нуриев, Гариф Ахуновның кызы, шагыйрә Наилә Ахунова, драматург Данил Салихов, район мәдәният идарәсе җитәкчесе Илнур Котдусов, мәгариф идарәсе җитәкчесе Рина Бәдриева котлап, хәер-фатыйхаларын бирделәр, яңа иҗади биеклекләргә менүләрен теләделәр.
Тукаебызның: “Халык зур ул, көчле ул, дәртле ул, моңлы ул, әдип ул, шагыйрь ул!” — дигән сүзләренә әлеге кичә күңелләребезне яңадан бер кат инандырды.
Розалия САФИНА