Депутатка өмет белән

Депутатка өмет белән
4 октябрьдә Россия Федерациясе Дәүләт Думасы депутаты, Россия Олимпия комитеты генераль секретаре Марат Бариев Арча районында гражданнарны кабул итү үткәрде. Анда муниципаль район башлыгы Алмас Назиров катнашты.
Марат Бариев иң актив депутатларның берсе, ул безнең районда еш була, гадилеге, игътибарлылыгы өчен аны яраталар, очрашуларга да кеше күп килә. Бу юлы да шулай булды. Иң беренче итеп ул иң ерактагы Байкал авылы вәкилләрен кабул итте.
— Безгә юл кирәк, — дип чиратлап сөйләп китте алар. — Авылыбызда заманында ике су тегермәне, ике мәчет булган, хәзер дә бирешергә исәп юк. Авылны саклап калу өчен 4 километр арага юл салырга кирәк, ярдәм итегез!
— Әйе, бу авылга юл бик кирәк, — дип сүзгә кушылды муниципаль район башлыгы Алмас Назиров. — Без бу турыда бик күп оешмаларга язып карадык, фәлән елны булырга мөмкин, дигәннән узмыйлар. Бездә әле шундый ук хәлдәге Яңа Ашыт, Урта Сәрдә авыллары да бар.
— Мин бу турыда республика җитәкчеләренә мөрәҗәгать итәчәкмен, — дип җавап бирде депутат. Ул авылның бүгенге хәле, яшәеше турында җентекләп сорашты.
Г.Тукай исемендәге Арча педагогика көллияте директоры Эльмира Сафина сүзен әлеге уку йорты эшчәнлеге белән таныштырудан башлады.
— Көчле коллектив эшли, көллият укытучы кадрлар әзерләүгә зур өлеш кертә, — диде ул. — Әмма аның матди-техник базасы нык тузган, ул 1985 елда хуҗалык ысулы белән, авыл мәктәбе проекты буенча төзелгән, бүгенге көн таләпләренә берничек тә җавап бирми. Соңгы вакытта муниципаль район башлыгы Алмас Назиров булышлыгы белән бераз җиһазлар алынды, әмма бу гына аз. Тулай торакны да ремонтламыйча булмый.
Ярдәм сорап, республика Мәгариф һәм фән министрлыгына мөрә-җәгать иткәннәр, әлегә җавап юк.
— Соңгы өч елда төрле оешмаларга берничә тапкыр мөрәҗәгать итеп карадык, — диде муниципаль район башлыгы Алмас Назиров. — Бу уку йортына ярдәм бик кирәк.
Көллиятнең физик тәрбия җитәкчесе Бари Бакиров спорт инвентарьлары алуда ярдәм сорады: “Аларның күбесе 1960-1970 елларда алынган”, — диде ул.
Марат Бариев нинди инвентарьлар кирәклеген сорап алды, калган мәсьәләләрне дә игътибарда тотарга вәгъдә итте.
Яңа Иябаштан Рәшит Сибагатуллинны авыл урамының начар хәлдә булуы борчый.
— Яңа Кырлай белән янәшәдәге бу авыл урамының шундый хәлдә булуы беребезне дә бизәми, — диде муниципаль район башлыгы Алмас Назиров. — Моны район көче белән генә эшләп, бюджетка салып булмый.
— Район башлыгы белән без бу мәсьәләне бергәләп уйларбыз, — диде депутат.
Депутатка бу көнне Арча шәһәрендә Боз сарае, яңа Мәдәният йорты салуны тизләтүне, Яңа Ашытка юл салуны, Арча шәһәренең көньяк өлешендәге урамнарга асфальт түшәүне сорап һ.б. үтенечләр белән мөрәҗәгать иттеләр.
Соңыннан “Бердәм Россия” партиясенең Дәүләт Думасындагы депутатлар фракциясе, ТР Дәүләт Советы һәм Арча муниципаль районының вәкиллекле органнары арасында хезмәттәшлек итү турында килешүгә кул кую булды.
Ильяс ФӘТТАХОВ