Яңалыклар

Яңалыклар
“Колос” мәдәният йортында өлкәннәр көне уңаеннан якташыбыз, Татарстанның халык артисты Фердинанд Фәтхи концерты булды. Җырчы тамашачыларга яраткан көйләрен бүләк итте, өлкәннәрнең үзләрен дә җырлатты, биетте. Соңыннан мәдәният йорты директоры Нәсимә Гарифуллина үзешчән сәнгатьтә актив катнашучы өлкәннәрне чәй өстәле янына чакырды. “Яшь йөрәкләр” ансамбленең сәнгать җитәкчесе Флюра Шакирова аларны өлкәннәр көне белән котлады, Филсинә Сафина хуҗаларга рәхмәтен белдерде, ә Зөлфирә Габделбәрова, Фәридә Әхмәдуллина, Гайшә Якупова, Гөлнәзирә Тимершәехова яраткан җырларын башкардылар, үзләре чыгарган такмакларны искә төшерделәр.

2012 елда безнең районнан Татарстанның “Горьковец”, “Дельфин”, “Ливадия”, “Васильевский”, Мари Иленең “Лесная сказка”, “Кленовая гора” сәламәтләндерү лагерьларында һәм шифаханәләрендә күп балалы һәм аз керемле гаиләләрдә тәрбияләнүче 123 балигъ булмаган бала ял итте. Әлеге сәламәтләндерү учреждениеләренә юлламалар халыкны социаль яклау органнары аша авыр хәлдә яшәүче, гаиләдә кеше башына табыш Татарстанда бер кешегә билгеләнгән яшәү минимумыннан (5160 сум) кимрәк булган гаиләләрдәге балаларга бирелә. Шифаханәләр һәм лагерьларда балалар сәламәтлекләрен ныгыталар, укыйлар, төрле түгәрәкләрдә шөгыльләнәләр, бассейнга йөриләр. Кыскасы, күңелле һәм файдалы ял итәләр. Юллама алу буенча тулырак мәгълүмат белән кызыксынучыларга 3-16-36 телефоны буенча шалтыратып яки Мәрхәмәтлек үзәгенә (28 кабинет) мөрәҗәгать итеп белергә була.

4 октябрьдә “Арча” спорт комплексында волонтерлар һәм җиденче мәктәп укучылары арасында волейбол буенча иптәшләрчә үзара ярыш үткәрелде. Ул “Волонтер” ирекле хәрәкәте инициативасы белән сәламәт яшәү рәвешен пропагандалау һәм ирекле хәрәкәтне популярлаштыру, аңа яңа кешеләр тарту максатыннан оештырылды. 2:0 исәбе белән волонтерлар җиңү яулады. Соңыннан хәрәкәт кураторы Җәмилә Яруллина халыкны социаль яклау идарәсе җитәкчесе исеменнән хәрәкәт активистларына рәхмәт хатлары тапшырды, ярышны үткәрүдә ярдәм иткән тренерлар Фаил Галимҗанов, Ренат Насыйбуллинга, җәмгыять тәртибен саклау буенча “Форпост” яшьләр формированиесе җитәкчесе Рифкать Хәмидуллинга рәхмәтен белдерде.