Журналистларны хөрмәтләделәр

Журналистларны хөрмәтләделәр
3 октябрьдә ТР Премьер-министры урынбасары, авыл хуҗалыгы һәм азык-төлек министры Марат Әхмәтов Игенчеләр сараенда Татарстанның агросәнәгать комплексы эше нәтиҗәләре буенча матбугат конференциясе үткәрде, аның барышында ул бу авыл хуҗалыгы елының үзенчәлекләренә тукталды, урып-җыю кампаниясенә йомгак ясады, республика авыл хуҗалыгы сәнәгатенең төп тармакларының перспективалы юнәлешләрен билгеләде.
Республика Авыл хуҗалыгы һәм азык-төлек министрлыгы башлыгының аграр темага язучы журналистлар белән очрашуы якынлашып килгән Авыл хуҗалыгы һәм эшкәртү сәнәгате хезмәткәрләре көненә багышланган иде.
Марат Әхмәтов республика буенча 3,2 млн. тонна ашлык җыйнап алынуын әйтеп үтте. 1 млн. тоннадан артык бәрәңге, 1,8 млн. тонна чамасы шикәр чөгендере җыйнап алу көтелә.
Министр әйтүенчә, терлекчелектә хәл тотрыклы. “Без 2 миллион тоннага якын сөт җитештерәбез, бу аның Россия буенча күләменең 8 проценттан артыгы, — диде Марат Әхмәтов. — Сөт терлекчелегендә, технология нинди генә камил булмасын, кеше факторы югары булып кала”.
Бөтендөнья сәүдә оешмасы кысаларында киләсе елдан башлап авыл товар җитештерүчеләренә булышуның яңа формасы кертелә — сатылган һәр литр сөткә дотация һәм сөрүлек җирләренең һәр гектарына түләүләр биреләчәк.
2013 елдан башлап Татарстанда “Авыл хуҗалыгы белгечләре өчен — 500 грант” проекты эшли башлый, аларның һәрберсе 100әр мең сумлык булачак. Министр билгеләп үткәнчә, грантлар рәвешендә матди кызыксындыру авыл хуҗалыгы белгечләренә үз вазыйфаларын теләбрәк һәм җаваплырак башкарырга ярдәм итәчәк.
Матбугат конференциясеннән соң авыл хуҗалыгы тематикасын актив яктыртучы журналистларны хөрмәтләү булды. Массакүләм мәгълүмат чараларының 28 вәкиле министр кулыннан “Авыл кешеләре эре планда” дип аталган аграр журналистика конкурсы дипломнары һәм призлар алды. Алар арасында “Арча хәбәрләре” газетасының авыл тормышы бүлеге мөхәррире Ильяс Фәттахов та бар.
Министр барлык журналистларга башкарган эшләре өчен рәхмәт әйтте.