Бер күрешү үзе бер гомер

Бер күрешү үзе бер гомер
2 октябрьдә безне, Арчаның 3нче номерлы мәктәбе ветераннарын, бәйрәм кичәсенә чакырдылар.
Бик шатланып килдек. Чакырылганнар барысы да килгән диярлек. Башта шау-гөр килеп сөйләшеп, хәл-әхвәл сорашып алдык. Аннан соң бик бай әзерләнгән өстәл артына утырдык.
Директор Илһамия Абдуллина икеләтә бәйрәм белән котлады, зур дулкынлану белән тыңладык. “Алдагы елда үзебезнең мәктәптә бәйрәм итәргә язсын инде”, — дип тәмамлады ул үзенең чыгышын (әлеге очрашу Арчаның 1нче номерлы мәктәбендә үтте). Мәктәпнең өметле киләчәге белән таныштырды.
Ветераннар советы рәисе Ләйсирә Әхмәтова бәйрәмне оештыруда матди ярдәм күрсәткән иганәчеләрне әйтеп үтте: Тәлгать Миндубаев (“Водоканал-Сервис), Альберт Хәкимов (“Жилкомбытсервис”), Лилия Гарәфиева (“Металл”), Ильяс Хәкимов, Шәйдулла Сәлахов (“Ак Барс-агро”). Безгә игътибарлы, ихтирамлы булганнары өчен аларга барлык ветераннар исеменнән зур рәхмәтебезне белдерәбез.
Бәйрәмне оештыруда, үткәрүдә үзеннән күп өлеш керткән Ләйсирә Әхмәтовага, безгә “җылы почмак” биргән 1нче мәктәп директоры Рамил Мөхәммәдияровка, ашханәдә эшләүчеләргә дә рәхмәт яусын.
Истәлекле бүләкләр алып, канәгатьләнү хисләре белән таралыштык. Алдагы елларда да Аллаһы Тәгалә безгә тагын бергә җыелырга насыйп итсен!
3нче номерлы мәктәп ветераннары