Уңышлар тырыш хезмәт белән килә

Уңышлар тырыш хезмәт белән килә
Әңгәмәдәшебез — район авыл хуҗалыгы һәм азык-төлек идарәсе җитәкчесе А.М.Габбасов.
— Айдар Минсабирович, бәйрәм уңаеннан башкарылган эшләргә бәя биреп китү урынлы булыр.
— Әйе, ел тәмамланырга әле шактый вакыт булса да, кайбер нәтиҗәләр ясарга мөмкин инде. Һава торышы бик үк уңай килмәсә дә, игеннәрнең гектарыннан уртача 24,1 центнер уңыш җыя алдык, тулай җыем 133 мең 500 тонна тәшкил итте. Республика буенча өченче күрсәткеч бу.
Җитәкчеләр, белгечләр, механизаторлар зур оешканлык күрсәтте. Урып-җыюны августта төгәлли алдык, бу югалтуларны шактый киметергә мөмкинлек бирде. “Ватан”, “Ак Барс-агро”, “Курса МТСы”, “Кырлай”, “Игенче” ширкәтләрендә эшләр аеруча әйбәт барды, аларда уңыш та югары.
Терлекчеләребез дә сынатмый. Тугыз айда сөт җитештерү 2011 ел белән чагыштырганда — 103, ит — 105 процент тәшкил итте. “Ак Барс-агро”, “Тукай”, “Акчишмә”, “Татарстан”, “Ватан” хуҗалыкларында сөт җитештерү 15–4, “Ватан”, “Татарстан”, “Вамин-Мәрҗани”, “Северный”да ит җитештерү 20–8 процентка артты.
Терлекләрнең баш саны бераз булса да арту ягында. “Вамин-Мәрҗани” ширкәтендә — 356, “Ватан”да — 140, “Северный”да 115 башка арттыра алдылар.
Ел коры килде дисәк тә, хуҗалыклар җитәрлек күләмдә азык әзерләде. “Кырлай”, “Игенче”, “Ак Барс-агро”, “Курса МТСы”, “Ватан” ширкәтләрендә ул аеруча мул әзерләнде.
— Югарыда санап үткән алдынгы хуҗалыкларның эшләү формасы төрлечә булуы игътибарга лаеклы.
— Берзаман авыл хуҗалыгын эре инвес-торлар гына алга җибәрә ала дигән фи-кер өстенлек алган иде. Тормыш моның алай ук түгел икәнлеген күрсәтте. Дөрес, бездә “Ак Барс-агро”, “Кырлай”, “Игенче” ширкәтләре инвесторлар ярдәмендә уңышлы эшләп китте. Аларда алдынгы технологияләр кертелде, куәтле техника кайтарылды. Хезмәт хаклары түләүдә тоткарлыклар юк, халык өчен күп нәрсә эшләнә.
“Кырлай” ширкәтендә җитештерелгән продукцияне үзләре эшкәртәләр, бер мең тонна кишер, чөгендер, 12 мең тонна бәрәңге саклый торган складлар төзелде, рапс, көнбагыш мае ясыйлар.
Өчиле, Утар Аты, Казанбашка ялгыш килеп кергән инвесторлар да булды, алар файдага караганда зыян гына салды. Соңгы вакытта “Вамин” хуҗалыклары белән проблемалар килеп чыкты, кыр эшләрен башкаруда, терлекчелектә кыенлыклар бар.
Шул ук вакытта “Ватан”, “Курса МТСы” ширкәтләре мөстәкыйль рәвештә дә яшәп була икәнлекне расладылар. “Курса МТСы” быел 400 баш сыерга исәпләнгән заманча ферма төзеде.
— Бу урында барысын да кадрлар хәл итә, дип әйтәсе килә.
— Нәкъ шулай. “Ватан”, “Курса МТСы” ширкәтләрен озак еллар җитәкләүче Мансур Әхмәтов, Рәүф Гыйлаҗетдинов, үз коллективларының бердәмлеген саклап, матур уңышлар яулап киләләр. “Ак Барс-агро” ширкәтен оешканнан бирле Шәйдулла Сәлахов уңышлы җитәкли.
“Кырлай”, “Игенче” ширкәтләренең яшь җитәкчеләре Илшат Шакирҗанов белән Илнар Мәгъсүмов та үзләрен уңай яктан күрсәттеләр.
Әйбәт кадрлар һәркайда да кирәк. Иген уңышын җыйнап алуда зур өлеш керткән комбайнчыларыбыз Рафис Җәләлиев (“Кырлай”), Харис Вилданов (“Игенче”), Ринат Нәфыйков (“Кырлай”), Расих Нәҗметдинов (“Игенче”), Әмир Газимов (“Ватан”), Миннефәр Дәүләтбаев (“Кырлай”), шоферлар Радик Галимуллин (“Кырлай”), Шамил Сабирҗанов (“Игенче”), азык әзерләүдә фидакарьлек күрсәтеп эшләгән Илһам Әгъзәмов (“Ак Барс-агро”), Илдус Саттаров (“Вамин-Арча”), Рәшит Габдрахманов (“Татарстан”), туфракта төп эшкәртүдә эшләүче Марат Нуриҗанов (“Ватан”), Хәбир Җәләев (“Игенче”), чәчү комплексларында нормаларын күпкә арттырып үтәгән Данил Рәхимов (“Кырлай”), Айрат Шаһидуллин (“Вамин-Мәрҗани”) һ.б. бик күпләрне горурлык хисләре белән әйтеп үтәсе килә.
Терлекчеләребез дә мактауга лаеклы. “Ак Барс-агро” ширкәтеннән Рауза Газизуллина, Венера Мөхәммәтгалиева, “Курса МТСы”ннан Әнисә Гыйбадуллина, Гүзәл Гайфуллина, “Татарстан” ширкәтеннән бозау караучы Дамир Гыйззәтов, “Вамин-Мәрҗани” ширкәтеннән Нурфия Гыйлаҗиева, “Северный”дан Рәис Шәмсетдинов һ.б. бик күпләрнең хезмәтләре мактауга лаеклы.
Хәзерге вакытта 14 гаилә фермасы эшли. Аларның саны ишәя бара. Шәхси хуҗалыкларында терлек асраучыларга да игътибар, ярдәм арта.
Авыл хезмәтчәннәрен, шушы мөмкинлектән файдаланып, бәйрәм белән котлыйм, аларга сәламәтлек, яңа уңышлар телим!
Ильяс ФӘТТАХОВ