Яңалыклар

РАЙОН ХУҖАЛЫКЛАРЫНДА бәрәңге алу төгәлләнде. Бер гектардан уртача уңыш — 196,5 центнер.

“КЫРЛАЙ” ШИРКӘТЕНДӘ икенче икмәк гектардан — 450, “Ак Барс-агро”да — 250, “Ватан”да — 230 центнер уңыш бирде. “Вамин-Арча”да 40 центнер гына.

63600 ГЕКТАРДА ТУФРАКНЫ төп эшкәртәсе булып, шуның 50974 гектары эшкәртелде. “Вамин-Арча”, “Вамин-Мәрҗани” ширкәтләрендә эшкәртәсе мәйданнар шактый.

16872 ГЕКТАРДАГЫ КУКУРУЗНЫҢ 15220 гектары урылды. Бу эш нигездә “Вамин-Арча”, “Вамин-Мәрҗани” ширкәтләрендә генә калды.

БЕР ШАРТЛЫ ТЕРЛЕККӘ 26 центнер азык берәмлеге әзерләнде. “Игенче”дә — 35, “Кырлай”-да 34 центнер туры килә.

БАРЫСЫ 133666 тонна силос салынды. Шуның 41281 тоннасы — “Вамин-Мәрҗани” ширкәтендә.

16 ОКТЯБРЬДӘ район хуҗалыкларында бер сыердан уртача 11,4 килограмм сөт савылды. “Ак Барс-агро” ширкәтендә — 22,3, “Кырлай”да 22,1 килограмм.

5 октябрьдә Казанда Г.Камал исемендәге татар академия театры бинасында үткән һөнәри бәйрәмнәре уңаеннан укытучыларны тәбрикләү тантанасында 42 елын мәктәптә балаларга белем бирүгә багышлаган, шуның 23 елын мәктәп директоры булып эшләгән, хәзер Арча педагогика көллия-тендә физкультура укытучысы Ленар Заһидуллинга Татарстан Республикасының мәгариф һәм фән министры Энгель Фәттахов Россия Федерациясе Мәгариф һәм фән министрлыгының Мактау грамотасын тапшырды. Ленар Усманович мондый зур бүләккә укыту һәм тәрбия процессларын оештыру һәм камилләштерүдә ирешкән уңышлары, шәхеснең интеллектуаль һәм культуралы үсешен формалаштыруга, югары квалификацияле белгечләр әзерләүгә керткән өлеше һәм күп еллык тырыш хезмәте өчен иреште.

Арчаның 1нче номерлы мәктәбе каршысы җәй буе яшеллеккә, чәчәкләргә күмелеп утыра. Быел шулай ук мәктәп артындагы буш участокны да тәртипкә китерделәр. Балчык ташытып, тигезләп үлән чәчтеләр. Җәй буе биредә эш кайнады. Бу урында киләчәктә яшелчә бакчасы булачак. 16 октябрь көнне 8, 10 сыйныф укучылары агач утырту буенча өмә оештырдылар. Укучылар һәм укытучылар алмагач, чия, груша, слива агачлары утыртты. Алгы өлешенә карлыган куаклары утыртылачак. Балалар, бөтен күңелләрен биреп, тырышып эшләделәр.