“Бердәм Россия”леләр исәп-хисап тота

“Бердәм Россия”леләр исәп-хисап тота
11 октябрьдә Арчаның 1нче номерлы мәктәбе актлар залында “Бердәм Россия” партиясе Арча җирле бүлекчәсенең Арча шәһәре 7нче номерлы микрорайоны башлангыч бүлекчәсенең хисап-сайлау җыелышы булды.
Җыелышта “Бердәм Россия” партиясе Үзәк башкарма комитетының төбәкара эше идарәсе департаменты киңәшчесе Анастасия Супрунова, төбәкара башкарма комитеты җитәкчесе урынбасары Гомәр Гарифов, партиянең Арча җирле бүлекчәсе политсоветы секретаре урынбасары, Арча муниципаль районы башкарма комитеты җитәкчесе урынбасары Надия Мифтахетдинова, җирле бүлекчә башкарма комитеты җитәкчесе Тәлгать Җәләлетдинов катнашты.
Хисап докладын башлангыч бүлекчә секретаре Лилия Әхмәтова ясады. Ул бүлекчә эшчәнлеге, партия әгъзаларының массакүләм чараларда катнашуы турында сөйләде, киләчәккә планнар белән таныштырды. Тематик кичәләр, хәрби-патриотик тәрбия буенча тантаналы чаралар, иншалар, рәсемнәр бәйгеләре, “Мәктәпкә әзерләнергә ярдәм ит” акциясендә катнашу, парламент сәгатьләре үткәрү, партиянең яшь гвардиячеләре җирле клубы эшчәнлеге һәм башка күп кенә чараларга аерым тукталды.
Шулай ук башлангыч оешма ревизоры Раушания Җәләева хисап тотты. Фикер алышуда 2нче балалар бакчасы мөдире Фәния Шакирова, Пенсия фонды идарәсе җитәкчесе Рузия Нурмөхәммәтова, җирле бүлекчә башкарма комитеты җитәкчесе Тәлгать Җәләлетдинов катнашты. Алар үзләре җитәкләгән оешма әгъзаларының бөтен чараларда да активлык күрсәтүләре, ирешкән уңышлары һәм планнары турында әйтеп үттеләр. Һәр чыгыш мәгълүмати слайдлар белән бергә алып барылды.
— 42 башлангыч бүлекчә бар. Һәрберсендә эш алдан төзелгән план нигезендә алып барыла, — диде Тәлгать Таһирович. — Әле генә ветераннар декадасын зурлап үткәрдек. Экскурсияләр, концертлар, очрашулар, бүләкләр — бар да өлкәннәргә ихтирам йөзеннән оештырылды. “Балаларга шатлык бүләк ит”, “Йөрәктән йөрәккә”, “Мәктәпкә әзерләнергә булыш” акцияләре партия әгъзаларының зур активлыгы белән үтте. Моннан тыш бәйрәмнәр оештырылды, район сәхнәсендә спектакль куелды һәм башкалар. “Бердәм Россия” партиясе җирле бүлекчәсе яшь гвардиячеләре дә актив булды, мохтаҗларны, ярдәмчесе булмаган өлкәннәрне дә онытмадылар.
Башлангыч бүлекчә секретаре итеп яңадан Лилия Әхмәтова, ревизор итеп Раушания Җәләева сайланды. Арча җирле бүлекчәсенең XX конференциясенә делегатлар сайланды.
Гөлсинә ЗИННӘТОВА