Беренче сәяхәт — Арчага!

Беренче сәяхәт — Арчага!
18 октябрьдә Татарстан Республикасының яңа мәгариф һәм фән министры Энгель Фәттахов Арча районында булды.
Әле бер генә министрның да алай иртә таңнан килеп җиткәне юк иде бугай. Энгель Фәттаховның озак еллар республиканың иң алдынгы районы булган Актаныш районын җитәкләвен исәпкә алсак, моңа гаҗәпләнерлек тә түгел, чөнки район башлыклары бик иртә уяна.
Мөхтәрәм кунакны муниципаль район башлыгы Алмас Назиров каршы алды, Арча төбәгенә багышланган китаплар бүләк итте.
— Моңарчы Арча районы турында телевизордан карап, мәгарифкә, балалар тәрбияләүгә зур игътибар бирелүе турында укып, ишетеп белә идем, — диде министр. — Алмас Әминович белән дә хәбәрләшеп, киңәшләшеп эшләдек. Министр буларак беренче итеп Арча районына килүем дә юкка түгел. Сезнең тәҗрибә киләчәк эшебездә дә бик кирәк булачак.
Беренче тукталыш Чулпан башлангыч мәктәбендә булды. Җыйнак, уңай, җылы, якты мәктәпне яңа министр бик ошатты. Муниципаль район башлыгы Алмас Назиров мондый типтагы мәктәпләрнең күп авылларда төзелүен әйтеп үтте, аларның Чулпандагы кебек бурадан салынганнары да, кирпечтән төзелгәннәре дә бар.
— Авылда ике бала булса да (бер бала булганда Укытучы йорты эшли), башлангыч мәктәп эшләргә тиеш, — диде министр. — Монда үз балаңны күз алдына китерү дә җитә. Башлангыч сыйныф баласы үз авылында укырга тиеш.
Быел ныклап төзекләндерелгән Арчаның 2нче номерлы урта мәктәбе ерактан ук балкып тора. Министрга да бик ошады аның тышкы күренеше.
— Без башта авыл мәктәпләренә игътибар бирдек, — диде муниципаль район башлыгы Алмас Назиров. — Шәһәрдәге мәктәпләргә чират җиткәч кенә мөмкинлекләр чикләнә төште. Шулай да республика җитәкчелеге ярдәмендә соңгы вакытта Арчаның үзендә дә мәктәпләр яңарыш кичерә.
Мәктәп директоры Гөлнара Гарипова укыту-тәрбия эшчәнлеге, ирешкән уңышлар, матди-техник базаны ныгыту юнәлешендә башкарылган эшләр турында сөйләде. Министр үзе күргәннәрдән бик канәгать калды, кабинетларның җиһазланышына, тирән белем бирү өчен тудырылган мөмкинлекләргә югары бәя бирде.
Энгель Фәттахов белән Алмас Назировны Г.Тукай исемендәге Арча педагогика көллияте коллективы да бик җылы каршы алды. Директор Эльмира Сафина, кафедра мөдирләре уку йортының эшчәнлеге белән таныштырдылар. Башлангыч сыйныфлар өчен укытучылар әзерли торган бердәнбер уку йорты үз алдына куелган бурычларны уңышлы үти, әмма матди-техник базасы тузган, җиһазлану ягыннан да заман таләпләреннән калыша. Министр аларны игътибар белән тыңлады, көллиятнең мөһим эш башкаруын билгеләп үтте.
Республика Президенты программасы буенча төзелгән “Бәләкәч” балалар бакчасындагы уңайлыклар да бик ошады министрга. Ул тәрбиячеләр белән дә сөйләште, аларның балаларга тәрбия бирүдәге ролен югары бәяләде, киләчәктә хезмәт хаклары да артачак дип шатландырды.
Яңа Кенәр урта мәктәбе быелдан лицей дип үзгәртелде. Аның исеме генә түгел, җисеме дә яңа хәзер. “Бу мәктәпне шушы хәлгә китерү минем хыялым иде, — диде муниципаль район башлыгы Алмас Назиров. — Республика җитәкчелегенә дә рәхмәт, аңладылар, булыштылар”.
— Мондый уку йортында начар белем, начар тәрбия биреп булмыйдыр, — диде Энгель Фәттахов. — Ике спорт залы гына бар, кабинетлар заман таләпләренә туры килерлек итеп җиһазланган.
Министр Арча төбәгеннән бик күп күренекле шәхесләр чыгуын ассызыклады. “Бөтен татар дөньясының горурлыгы булган бөек Тукай чыккан биредән! — диде ул. — Арча ягы Татарстанның бишеге дисәк тә дөрес булыр. Арча Арча инде ул, бүген дә сез шул югарылыкта торасыз, бик күп эшләр башкаргансыз. Мәгарифтә генә түгел, башка өлкәләрдә дә уңышларыгыз сокланырлык”.
Министр укытучылар белән очрашуда мәгариф өлкәсендәге бурычларга да тукталды.
— Нинди генә реформалар үткәрелмәсен, безнең алда төп өч бурыч тора: беренчесе — балага киләчәктә югалмаслык итеп белем бирү, икенчесе — тәрбияле балалар, өченчесе — сәламәт балалар укытып чыгару.
Энгель Фәттахов озак еллар авыл хуҗалыгы районы белән җитәкчелек итүен, авыл тормышы, яшәеше аңа якын булуын да әйтеп үтте. Актаныш районы мәгариф хезмәткәрләренең Арчага килеп андагы тәҗрибәне өйрәнүләрен дә искә төшерде.
Муниципаль район башлыгы Алмас Назиров Энгель Фәттаховка вакыт табып иң беренче итеп Арча районына килүе өчен рәхмәт әйтте: “Без моны районга, аның халкына зур хөрмәт күрсәтү дип кабул итәбез, — диде ул. — Без үзебез дә Актаныш районыннан күп нәрсәгә өйрәндек. Сезгә яңа эшегездә дә уңышлар телибез!”
Татарстан Республикасы мәгариф һәм фән министры Энгель Фәттахов, муниципаль район башлыгы Алмас Назиров Яңа Кенәрдәге яңа интернатны ачу тантанасында да катнаштылар, бүләкләр тапшырдылар.
Ильяс ФӘТТАХОВ