Балаларга бүләк

Балаларга бүләк
Урта Пошалым мәктәбе әле бүген дә яңа салынган кебек. Соңгы елларда балалар саны гына кимеп бара. Район башлыгы Алмас Назиров аның бушаган өлешендә балалар бакчасы ачарга тәкъдим итте. Һәм менә узган атнада аны ачу тантанасы булды. Анда муниципаль район башлыгы Алмас Назиров катнашты.
— Бина нык, урыны матур, бүлмәләре чиста, җылы, шартлары булдырылган. Укып, тәрбия алып, Ватаныбызның лаеклы уллары, кызлары булып үссеннәр, сау-сәламәт булсыннар, — диде ул.
Алмас Әминович бүләк итеп сертификат тапшырды, төзүчеләргә рәхмәтен белдерде. Шомартучы-буяучы Тәнзилә Бикмуллина, слесарь-сантехник Руслан Нутфуллин, эшче Артур Вәлиуллин Рәхмәт хатларына лаек булдылар.
— Мин авылга 1987 елда килдем. Башта тәрбияче булып эшләдем, 1995 елдан балалар бакчасын җитәклим, — ди Рәйсә Хөснетдинова. — Килгән елдан алып бакча агач бинада булды. Искергән иде инде. Бу балалар бакчасы нәниләргә зур бүләк. Безгә 2 яшьтән алып 6 яшькәчә 13 бала йөри. Алар өчен бөтен мөмкинлекләр бар. Йокы, уен, чишенү, ашау бүлмә-ләре якты, иркен. Район җитәкчеләре ярдәме белән яңа урындыклар, өстәлләр алдык, тәрәзәләргә пәрдә-ләр элдек. Балалар сау-сәламәт кенә булсыннар.
Бөтен уңайлыклары булган мәктәп ашханәсендә Рәхилә Җиһаншина үзләренә тәмле ризыклар пешерә. Ишегалдында матур итеп эшләнгән уен мәйданчыгы бар. Балаларына мондый уңайлыклар тудырган өчен әти-әниләр дә бик шат һәм район җи– тәкчеләренә рәхмәтле.
Мәктәп бинасында фельдшер-акушерлык пункты ачылуы бик әйбәт. 23 еллык эш стажы булган фельдшер Сания Идиятова хәзер янәшәдә генә.
— Безнең өчен балаларыбыз сау-сәламәт булса, тырышып укыса, йөзгә кызыллык китермәсә, зур бәхет. Мондый балалар бакчасы ачылу — икеләтә сөенеч, — дип, Дилә Сафина әти-әниләр исеменнән җитәкчеләргә, төзүчеләргә рәхмәтен җиткерде. Балалар үзләре дә бик матур чыгыш ясады.
“Арча МСО”сы ширкәте баш инженеры Раушан Фатыйхов балалар бакчасы мөдире Рәйсә Хөснетдиновага символик ачкыч тапшырды.
Тантанага ата-аналар, авыл халкы җыелган иде. Күрше авыл җирлекләре башлыклары, мәктәп директорлары да мондый бәйрәмнән читтә калмаган. Район башкарма комитеты җитәкчесе урынбасары Надия Мифтахетдинова, район мәгариф идарәсе җитәкчесе Рина Бәдриева, район үзәк хастаханәсенең баш табибы урынбасары Гөлсинә Исламова да шунда. Муниципаль район башлыгы авылның киләчәге турында әнә шулай кайгыртып йөргәндә хуҗалык җитәкчеләренең әлеге вакыйгалардан читтә калуы гаҗәп. Халыктан аерылган, бүгенге көн белән генә яшәүче җитәкче абруйлы була алмый.
Гөлсинә ЗӘКИЕВА