Халыкка кирәкле булып яшәргә

Халыкка кирәкле булып яшәргә
20 октябрьдә торакны сафка кертү буенча Татарстан Республикасы Президенты Рөстәм Миңнеханов үткәргән киңәшмәдә төзелеш, архитектура һәм торак-коммуналь хуҗалыгы министры Ирек Фәйзуллин республикада ел ахырына кадәр 777 мең кв. метр торакны файдалануга тапшырырга кирәклеген әйтте.
Киңәшмәдә шулай ук социаль ипотека, ветераннарны фатирлар белән тәэмин итү, авыл клублары, фельдшер-акушерлык пунктлары төзү һ.б. программаларның үтәлеше турында да сүз барды.
Муниципаль район башлыгы Алмас Назиров, киңәшмәне дәвам итеп, районда торак төзелеше буенча планнарны уңышлы үтәү өчен эш темпын арттырырга кирәклеген искәртте. Бигрәк тә шәһәрнең көнбатыш өлешендәге күп катлы йортларны төзү озакка сузылды.
Район башлыгы ике-өч ел элек төзелгән йортларның торышы өчен дә аларны төзегән оешмалар җаваплы булуын искә төшерде. Стеналар буйлап су агарга, нигезләр ярылган булырга тиеш түгел. Махсус комиссия соңгы елларда төзелгән биналарны карап чыкты, булган кимчелекләрне бетерү сроклары билгеләнде. Бу таләпне әлегә “Жилкомбытсервис” һәм “Водоканал-Сервис” ширкәтләре генә үтәде.
— Халыкка кирәкле булып яшәргә өйрәнегез, — диде Алмас Әминович. — Халык алдында җавап бирәсегез дә булыр.
2013 елдагы эшләргә быелдан нигез салып калдыру мөһим. Аларның күләме быелгыдан ким булмаячак. Мәктәпләр ремонты күләме артыр дип көтелә. Беренче чиратта Шушмабаш мәктәбе, Төбәк-Чокырча һ.б.
Шушы ук көнне муниципаль район башлыгы Алмас Назиров “Ак Барс-агро” ширкәтендә булды. Ул Сикертән авылында яңа клуб төзелешенең барышы белән танышты (рәсемдә). Ширкәт җитәкчесе Шәйдулла Сәлахов авыл халкының бу вакыйганы бик шатланып кабул итүен әйтте. Һәм ул бөтен халык төзелешенә әйләнгән дә. Аны “Арча КСМы” ширкәте төзи, аларга хуҗалыктан кирәкле бөтен ярдәм күрсәтелә. Быел нигезен салып калдыралар, иртә яздан тулы көчкә эшләү мөмкин булачак.
— Сабантуй көнендә яңа клубны ачарга һәм шуннан Сабантуйга! — диде Алмас Әминович.
— Сез әйткәнчә булыр ул, — диде Шәйдулла Сәлахов тыйнак кына итеп.
Сүзләре эштән аерылмый аларның. “Строй-Сервис” ширкәте (хәзер “Арча КСМы”) Сикертән мәктәбен дә 52 көндә төзеп биргән иде. Аннан район башлыгы әйткән тәкъдим турында башкалар уйланып йөргәндә, Шәйдулла Имамович аны тормышка ашырып та куя. Сикертәндә балалар бакчасы ачу, Курса-Почмакта урта мәктәпне саклап калу белән дә шулай булды.
Сикертән клубы 300 урынга исәпләнгән, нәкъ станциядәге клуб проекты буенча төзеләчәк.
Район башлыгы фермаларда эшләрнең торышы белән дә танышты, терлекчеләр белән сөйләште, киңәшләрен бирде. Ташкич фермасында сыерлар чиста, тәртип. Сикертәндә әле көтүдән соң элек күреп күнеккән тәртипкә ирешә алмаганнар. Алмас Әминович күптән түгел генә семинар үткән “Северный” хуҗалыгын искә алды. Анда азыкны да эшкәртеп бирәләр, тәртип тә ел фасылларына карап үзгәреп тормый.
Ташкич терлекчеләре, авылга асфальт юл килүгә чиксез шатлануларын әйтеп, Алмас Әминовичка рәхмәтләрен җиткерделәр.
— Минем дә кайчан да булса Ташкичкә асфальт юл килер дип уйлаганым да юк иде, — диде Шәйдулла Сәлахов.
Әйе, тормыш алга бара, Сеҗе урамында асфальт җәеп кенә калмаганнар, ике яклап тротуар да ясаганнар. Монысының әле бер авылда да булганы юк иде.
Ильяс ФӘТТАХОВ