Арча кунакларга шат

Арча кунакларга шат
Казанда 17 октябрьдән 21 октябрьгә кадәр татар теле һәм әдәбиятыннан Халыкара олимпиада булып узды. Татарстан Республикасының милли мәгариф һәм төбәкара хезмәттәшлек бүлеге мөдире Раиф Зиннәтуллин җитәкчелегендә Финляндия, Төркия, Кытай, Украина, Казахстан, Үзбәкстан, Төрекмәнстан, Әзербайҗан, Кыргызстан һәм Россиянең төрле төбәкләреннән килгән мәктәп укучылары, студентлар, аларның укытучылары 20 октябрьдә Арча районында булды.
Кунакларны район мәгариф идарәсе җитәкчесе Рина Бәдриева каршы алды.
Арча чигендә милли киемдәге гүзәл кызларыбыз тәкъдим иткән чәк-чәктән авыз итеп, танышып алганнан соң, автобусларга утырып, Яңа Кырлайга юл тотты кадерле кунаклар. Арчаның 1нче, 2нче һәм 4нче мәктәпләреннән татар теле һәм әдәбияты укытучылары туган ягыбызның искиткеч табигате, яңадан-яңа төзелешләре, тарихы турында мавыктыргыч итеп сөйләп бардылар. Кунаклар үзләре дә Г.Тукай шигырьләрен яттан сөйләделәр.
Яңа Кырлай мәктәбе коллективы кунакларны бик җылы каршы алды.
— Арча ягы — данлыклы Казан артының үзәге, татар халкының тарихына үзеннән лаеклы өлеш керткән як. Бөек шәхесләрнең туган йорты булган Арча җирендә сезне күрүебезгә бик шатбыз, — дип сәламләү сүзләрен җиткерде Рина Бәдриева.
Шушмабаш, Яңа Кенәр мәктәбе укытучылары һәм укучылары хәзерләгән халкыбызның милли уеннары белән үрелеп баручы Сабантуй күренеше барчасының күңелләренә хуш килде. Үзләре дә рәхәтләнеп уеннарда катнашып бүләкләр алдылар, җырлап-биеп күңел ачтылар. Араларында районыбызга элегрәк килгән милләттәшләребез дә бар иде. Алар, районда булган зур үзгәрешләрне күреп, ишетеп хәйран калдылар.
Күңеленә татар шигърияте бик якын һәм кадерле булган һәркем ул көнне бөек Тукаебызны зур ихтирам белән телгә алды, бай мәгълүматлы музейның һәр экспонатын карап, дулкынлану хисләре кичерде.
Милли мәгариф һәм төбәкара хезмәттәшлек бүлеге мөдире Раиф Зиннәтуллин шушындый күңелле очрашу, ял оештырганнары өчен муниципаль район башлыгы Алмас Назировка, район мәгариф идарәсенә, бу чараны оештыруда катнашкан мәктәп коллективларына, укытучыларга, укучыларга рәхмәт сүзләрен җиткерде.
Халыкара олимпиадада районыбызның Ашытбаш мәктәбеннән 9 сыйныф укучысы Айсинә Әүхәдиева һәм узган уку елында шушы мәктәпне тәмамлап, укуын Казан Дәүләт университетында дәвам итүче Айсинә Хәбибуллина да катнашты. Укучыларыбызга истәлекле бүләкләр һәм сертификатлар тапшырылды.
Очрашу әдәби-музыкаль кичә белән дәвам итте. Кунаклар өчен укучылар хәзерләгән концерт милләттәшләребезне таң калдырды. Арчадагы коллегаларын кунакка чакырып, адреслар алышып, бик канәгать калып, хушлашып башкалабыз Казанга юл тотты халык-ара олимпиадага килүчеләр.
Рәсимә ИБРАЕВА,
Арча 2нче номерлы урта мәктәбенең татар теле һәм әдәбияты укытучысы