Саклаганы озаграк эшләр

Саклаганы озаграк эшләр
Соңгы елларда авыл хуҗалыгы техникасын алу кимеде. Бу аның кыйммәт булуына һәм хуҗалыкларның финанс хәленә бәйле. Шулай ук 50х50 программасының тукталып торуы да бик зур йогынты ясады. 2011 елны районга 8 трактор, 8 комбайн, 5 азык җыю комбайны, 7 йөк машинасы, 4 җир эшкәртү җайланмасы, 4 чәчкеч кайткан иде. 2012 елда 9 трактор, 3 комбайн, 1 азык җыю комбайны, 1 йөк машинасы, 3 чәчкеч, 1 чәчү комплексы кайтты.
Техниканың файдалану срогын озынайту өчен аны дөрес итеп саклауга куярга кирәк. Бигрәк тә игътибарны саклануда озак тора торган техникага юнәлтергә. Мәсәлән, бөртекле культуралар суктыру комбайннары елга күп булса 1,5–2 ай эшлиләр, ә калган 10 аен тик торалар. Димәк, техниканың эшкә яраклылыгы аны дөрес итеп, таләпләргә туры килә торган итеп саклауга куюга бәйле. Бүгенге көндә районда техниканы саклауга кую эше тәмамлану алдында. Бу эш барлык хуҗалыкларда да башкарылды. Бигрәк тә “Ватан”, “Северный”, “Ак Барс-агро”, “Курса МТСы”нда оешканлык күрсәтәләр. Бу хуҗалыклар техниканы саклауга кую белән беррәттән машина-трактор паркында тәртип салуга да зур игътибар бирәләр. Кайчан гына барып керсәң дә, территорияләрдә тәртип, кирәк булмаган бер нәрсә дә күрмәссең.
Якындагы көннәрдә Татарстан Республикасы авыл хуҗалыгы һәм азык-төлек министрлыгы белгечләре катнашында техниканы кышкы саклауга куюның торышы тикшереләчәк. Бу эш һәркайда җиренә җиткереп башкарылган дип ышанасы килә.
Саклауга кую белән бергә районыбыз хуҗалыкларында 2013 елгы кыр эшләренә әзерлек башланды. Бу мәсьәләдә “Ак Барс-агро” ширкәтен аерым билгеләп үтәсе килә. Хуҗалыкта авыл хуҗалыгы машиналарын ремонтлау өчен уңайлы яңа цех төзеп куйдылар. Бүгенге көндә бу цехта эш тулы көчкә оештырылган. Тырма ремонты инде тәмамлану алдында, чәчкечләрне ремонтлау башланды.
“Северный”, “Курса МТСы”, “Ватан” ширкәтләре дә көннәр җылы, озын вакытта ремонт эшләрен тулы көчкә алып баралар. Техника паркы бик мактанырлык булмаган хуҗалыкларга бу эшләрне инде беренчеләрдән булып башларга кирәк иде. Аларга кичекмәстән техниканы ремонтларга керешергә кирәк. Шулай эшләмәгәндә без ремонт эшләрен вакытында тәмамлый алмаячакбыз. Ә эш фронты шактый. Барысы 714 трактор, 120 комбайн, 51 азык җыю комбайны, 240 чәчкеч, 23 чәчү комплексы, 260 культиватор, 30 катнаш агрегат, 63 дискатор, 5884 тешле тырма, 62 дисклы тырма, 40 симәнә агулау машинасы һ.б. ремонты планлаштырылган.
Авылларда шактый кыен чор. Көзен юллар, гараж, ферма тирәсе аеруча начарлана. Суыклар башланганчы аларны тигезләтеп калдырырга кирәк, моның өчен күп чыгымнар да соралмый.
Илнар ГАЙНЕТДИНОВ,
район авыл хуҗалыгы һәм азык-төлек идарәсенең
механикалаштыру бүлеге консультанты