Яңалыклар

Яңалыклар
2 ноябрьдә экстремизм һәм терроризмны бетерү максатыннан “Без халыклар дуслыгы өчен! Без җәбер-золымга каршы” исемле баш астында уздырылган республика конкурсына йомгак ясалды. Конкурста Г.Тукай исемендәге Арча педагогика көллияте студентлары да катнашты һәм аларның иҗади эшләре призлы урыннарга лаек булды.
“Үз җырым” номинациясендә 5Ж курс студенты Илшат Сәләхиев — беренче урын, 3Е курс студенты Миндияр Шәймәрдәнов (җитәкчесе — Р.Мөхетдинова) — икенче, “Декоратив-гамәли сәнгать” номинациясендә 3В курс студенты Ландыш Җәләева (җитәкчесе — Л.Хәсәнова) — икенче урын, “Журналистика һәм публицистика” номинациясендә 2А курс студенты Минзилә Шаһиәхмәтова (җитәкчеләре — Л.Аникина, И.Сәфәрова) — икенче урын яуладылар.

Арчадан Филсинә Мөбарәкшинага Арча үзәк хастаханәсенең хирургия бүлегендә дәваланырга туры килгән. Андагы тәртип, табибларның ихлас кайгыртулары өлкән яшьтәге кешене бик сөендергән. “Кайгыртучан мөнәсәбәт поликлиникадан ук башланды. Табиб Венер Гарифуллин сәламәтләнүемә өмет уятты, — ди ул. — Хирургия бүлеге мөдире Рамил Гыйлаҗев, гомумән, барлык хирурглар, шәфкать туташлары һәр көн кереп авыруларның хәлләрен белеп торалар, дәвалыйлар. Монда һәркемгә — олымы ул, кечеме — шундый караш. Изге эшләре үзләренә игелек булып кайтсын.”

“Арча” балалар–яшүсмерләр спорт мәктәбендә җәмәгатьчелек тәртибен саклау буенча “Форпост” мәктәп формированиеләре арасында беренче Спартакиада булды. Анда 21 мәктәптән 152 укучы катнашты. Кул көрәшендә икенче мәктәптән Айнур Нечаев, гомумфизик әзерлек буенча бишенче гимназиядән Алмаз Фазылҗанов, җиңел атлетика буенча бишенче гимназиядән Рөстәм Минһаҗев, турникта күтәрелүдән Апаз мәктәбе укучысы Салават Галәветдинов, аркан тартуда Яңа Кенәр лицее командасы беренче урыннарны алдылар. Командалар арасында 5 төр ярышларда уңышлы чыгыш ясап, Арчаның 1нче номерлы мәктәбе беренчелекне яулады. Икенче — 5нче гимназия, өченче урында Апаз мәктәбе командалары.

Казан дәүләт техник университеты спорткомплексы базасында 1995–1999, 1997–1998 елгы егетләр һәм кызлар арасында кул көрәше буенча республика беренчелеге булды. Анда Арча педагогика көллияте, Өчиле, Яңа Кырлай, Курса-Почмак, Наласа, Лесхоз, Иске Чүриле мәктәпләре, Арчаның 7нче мәктәбе, Яңа Кенәр лицее спортчыларыннан тупланган Арча җыелма командасы катнашты. “Олимп” балалар-яшүсмерләр спорт мәктәбе тренеры Фәнис Мөхәммәтшин кул астында тәрбияләнүче егет һәм кызлар республика ярышлары призерлары һәм чемпионнары булдылар. 80 килограммга кадәр үлчәүдә педагогика көллиятеннән Ильяс Сафиуллин чемпион исемен яулады, 70 килограммга кадәр үлчәүдә Өчиледән Рамилә Әхмәтҗанова беренче булды. Икенче урында Өчиледән Азат Фазлыев, Наласадан Фаяз Зарипов (тренеры Т.Лотфуллин), Иске Чүриледән Илшат Хәбибуллин, өченче урында Өчиледән Гөлгенә Мөхәммәтшина, Алсу Сафиуллина. Башка спортчылар да, яхшы чыгыш ясап, әзерлекле булуларын күрсәттеләр. 20шәр спортчы арасында шундый уңышка ирешү, 12 команда арасында (Казан, Чистай, Яр Чаллы, Түбән Кама кебек зур шәһәрләрдән килгән спортчыларның да катнашуын исәпкә алсак) Арча җыелма командасының 4 урынны алуы үзе үк мактауга лаек.