Арчада — яңа уку йорты

Арчада — яңа уку йорты
Татарстан Республикасының мәгариф һәм фән министры Энгель Фәттахов безнең районда булганда урта мәктәпләрдәге автосыйныфлар эше белән аеруча кызыксынды: “Бик кирәкле эш дип саныйм мин моны, Актанышта башлык булып эшләгәндә безнең делегация сезнең тәҗрибәне өйрәнергә махсус барган иде”, — диде.
Кайчандыр бар иде инде андый сыйныфлар, аларда малайлар машина һәм тракторга өйрәнеп (кызларны чигүгә өйрәтәләр иде), мәктәпне тәмамлаганда һөнәрле булып чыктылар. Күбесе тора-бара менә дигән механизаторлар булдылар, яхшы алмаш әзерләп чыгара иде мәктәп. Вакыт әлеге сыйныфларны бетерүнең зур ялгышлык булганлыгын күрсәтте.
Муниципаль район башлыгы Алмас Назиров инициативасы белән, республикада беренчеләрдән булып, безнең район мәктәпләрендә башта автосыйныфлар эшли башлады. Аннан соң аларны автотрактор сыйныфларына әверелдерү бурычы куелды. РОСТО (ДОСААФ) оешмасы җитәкчесе Ринат Алеев әлеге бурычны үзенә генә хас төгәллек белән тормышка да ашырды.
Бала мәктәпне тәмамлаганда тормышка әзер булырга тиеш! Алмас Әминовичның җитәкчеләргә, укытучыларга таләбе әнә шундый.
Быел Татарстан Республикасы Президенты Рөстәм Миңнеханов Мамадышта үткән август киңәшмәсендә педагоглар алдына укучыларны эшче һөнәрләргә өйрәтү бурычын куйды. Чөнки бүген нәкъ менә шушы һөнәр ияләре бик кирәк һәм бу киләчәктә дә шулай булачак.
Безнең районда 2015 елга кадәр эшче кадрлар әзерләү буенча махсус программа кабул ителде. Ул укучыларның мәктәптән соңгы язмышын хәл итүдә мөһим роль уйнаячак.
1 ноябрьдә Арча шәһә-рендә Вагыйзовлар урамында гуманитар-техник техникум ачылу әлеге программаның эзлекле рәвештә тормышка ашырылуын күрсәтә.
— Бүген районның социаль-сәяси тормышында мөһим вакыйга — ул урта һөнәри мәгариф системасында яңа уку йорты — Арча гуманитар-техник техникумы ачылуга бәйләнгән, — диде район башкарма комитеты җитәкчесе урынбасары Надия Мифтахетдинова яңа уку йортын ачу тантанасында. — Без бу максатка бик озак һәм максатчан килдек — беренче чиратта районыбызның социаль-икътисадый үсешен һәм аның якындагы елларга үсеш перспективаларын исәпкә алдык. Район даими үсештә, торак, социаль һәм җитештерү объектлары төзү күләме елдан-ел арта, сәнәгать, кече һәм урта бизнес җитештерүе күләмнәре арта бара. Транспорт һәм юл комплексы үсештә, зур проектлар тормышка ашырыла.
Район үсеше, аның перспективалары яңа производство культурасына туры килә торган квалификацияле кадрлар булдыруга бәйле. Әлеге техникум ачылу эшче куллар җитмәү проблемасын хәл итүгә этәргеч булачак, бу районда һөнәри белемне яңа дәрәҗәгә күтәрергә ярдәм итәчәк.
— Техникум районның сәнәгать, төзелеш, агротехник тармаклары өчен кадрлар әзерләү урынына әверелер, аның алдына куелган бурычларны тормышка ашыру районның икътисадый һәм социаль үсешенә ярдәм итәр дип ышанам, — диде Надия Равилевна.
Район мәгариф идарәсе җитәкчесе Рина Бәдриева яңа уку йортының эшчәнлек юнәлешләре белән таныштырды. Анда урта һөнәри белем программасы буенча 7 белгечлек (электр һәм электромеханик хезмәте күрсәтү һәм техник эксплуа-тацияләү, газ белән тәэмин итү системасын монтажлау һәм эксплуатацияләү, нефть һәм газ эшкәртү, икътисад һәм бухгалтер исәбе (тармаклар буенча), табигать-хуҗалык комплексларын рациональ файдалану, социаль тәэмин итү хокукы һәм оештыру, автомобиль транспортына техник хезмәт күрсәтү һәм ремонтлау), һөнәри әзерлек буенча 11 белгечлек (автомобиль ремонты буенча слесарь, слесарь-сантехник, электр җиһазларын ремонтлау һәм хезмәт күрсәтү буенча электромонтер, сәүдә залы кассиры, контролер-кассир, азык-төлек һәм азык-төлек булмаган товарлар сатучы, парикмахер, аш пешерүче, кондитер, тегүче, җитәкче сәркатибе) буенча өйрәтәчәкләр.
Техникумны тәмамлаучылар Казан югары уку йортларында кыскартылган программа буенча укый алачаклар.
Тантанада катнашкан академик, “Химик заводларны саклау” кафедрасы мөдире, Казан югары уку йортларыара яңа технологияләр үзәге директоры Алексей Махоткин, Казан милли тикшеренү технологик университетының Кыргыз филиалы директоры Максим Сучков Казан югары уку йортларыара яңа технологияләр үзәге директоры Леонид Остамин яңа уку йортының бүгенге көндәге әһәмиятен билгеләп үттеләр, андагы шартларга югары бәя бирделәр, уңышлар теләделәр.