Төзелешне сентябрьдә төгәлләргә

Төзелешне сентябрьдә төгәлләргә
Татарстан Республикасы Президенты Рөстәм Миңнеханов 3 ноябрьдә видеоконференция режимында үткәргән киңәшмәдә төзелеш, торакны сафка кертү, авыл хуҗалыгы мәсьәләләре тикшерелде.
Төзелеш, архитектура һәм торак-коммуналь хуҗалыгы министры Ирек Фәйзуллин әйтүенчә, Татарстан торакны файдалануга тапшыру буенча тугыз айда Россия буенча — өченче, Идел буе округында беренче урынга чыккан. Еллык задание 74,7 процентка үтәлгән, аны тулысынча үтәү өчен тагын 628,5 мең кв. метр торак тапшырырга кирәк.
Татарстан Республикасы премьер-министрының урынбасары, авыл хуҗалыгы һәм азык-төлек министры Марат Әхмәтов авыл хуҗалыгы өлкәсендәге бурычларны ачыклады, терлекчелектәге эш йомгакларына анализ ясады.
Муниципаль район башлыгы Алмас Назиров, киңәшмәне дәвам итеп, көн тәртибендәге мәсьәләләргә тукталды. Безнең район буенча торак төзүнең еллык планы әлегә 73 процентка үтәлде. Президент та үз чыгышында төзү эшләрен киләчәктә сентябрьдә төгәлләргә кирәклеген искәрткән иде. Шулай булмаганда сыйфатны тәэмин итүе кыен, чыгымнар да күбрәк тотыла. Аннан соңгы айларда киләсе ел өчен нигез салып калдырырга.
Ноябрь аенда тапшырыласы йортлар бар, ветераннар өчен төзелә торган йортны да шушы айда тапшырачаклар. Көнбатыш өлешендәге күп катлы йортлар да әзерләнеп бетеп килә.
Киләсе елда 144 фатир төзү күздә тотыла, төзү буенча проблема юк, бары тик гаризалар булуы гына кирәк.
2013 елда социаль объектлар төзү һәм ремонтлау күләмнәре дә билгеле. Фельдшер-акушерлык пунктларын төзү һәм төзекләндерү, мәктәпләрне, күп катлы йортларны ныклап төзекләндерү дәвам итәчәк.
Урыннардагы хуҗалык җитәкчеләре төзелеш, төзекләндерү мәсьәләләрендә үзләре башлап йөрергә тиеш. Сикертәндә, Симетбашта клублар төзеләчәк. Аларны төзергә булышабыз дип торган җитәкчеләр бар. Күптән түгел Урта Пошалымда балалар бакчасы ачылды, бар да әзерләп, эшләп бирелгән. Ә хуҗалык җитәкчесе ярдәм итү түгел, ачу тантанасына да килмәде.
Алмас Әминович авылда яшәүче яшь гаиләләргә торак төзүдә ярдәм мәсьәләсенә дә тукталды. Быел андый мөмкинлектән районда 15 гаилә файдаланды. Әлеге ярдәм күләме чикле, ул беренче чиратта ире дә, хатыны да хуҗалыкта эшләүче, төзелеш дәрәҗәсе югары булган хуҗалыкларга биреләчәк.
Авыл хуҗалыгы өлкәсендәге бурычлар — баш санын киметмәү, мул продукция алу. Орлык әзерләү өчен иң уңай вакыт, ашламалар туплап куярга. Хезмәт хаклары, пай җирләре өчен вакытында түләргә, кешене алдарга ярамый.
Ярминкәләрдә күңел җылысын биреп катнашырга, сүлпәнлек шунда ук күзгә ташлана ул.
Муниципаль район башлыгы Алмас Назиров 6 ноябрьдә Югары Божа авылындагы балалар бакчасын төзекләндерү буенча үткәргән планлаштыру вакытында да (рәсемдә) җитәкчеләрнең җаваплылыгы турында әйтеп үтте. Иң беренче бакча белән янәшәдәге ташландык территория игътибарны җәлеп итә. Анда шайтан таяклары арасында калган ике трансформатор ямьне алып утыра. Заманында искитмәле саналган кемпинг бинасы да мескен хәлдә калган, территориясен кәкре-бөкре өрәңгеләр баскан, тимер капкасы бер генә күгәндә калып асылынган, коймалар җимерек...
Район башлыгы кисәтү ясагач, болар рәткә салыныр, әмма аларны тәртиптә тотарга тиешле кешеләре бар, шәһәрдә мондый хәл булырга тиеш түгел.
Балалар бакчасы территориясенең торышын да ошатмады район башлыгы. Анда хуҗа кулы җитмәгәнлеге күренеп тора. Бинасы яңартылгач, аның территориясе дә балкып торырга тиеш.
Ә бинаны “Арча КСМы” осталары яңарта. Җылы, якты, матур бакча булачак ул. Алмас Әминович аны тагын да уңайлы итү буенча киңәшләрен дә бирде. “Газ мичләре балалар бакчаларында җәен дә эшләргә, җылы су килеп торырга тиеш”, — диде ул. Газ хезмәте җитәкчесе Ренат Гафуров лимит алганда моның хәл ителә торган мәсьәлә икәнлеген белдерде.
Ильяс ФӘТТАХОВ