Мөһим мәсьәләләр тикшерелде

Мөһим мәсьәләләр тикшерелде
2 ноябрьдә Татарстан Республикасы Арча муниципаль район башлыгы каршындагы коррупциягә каршы тору буенча комиссиянең утырышы булды. Аны муниципаль район башлыгы Алмас Назиров алып барды.
“Утырышта Татарстан Республикасы каршындагы коррупциягә каршы тору буенча Советның 2012 елның 20 октябрендәге утырышы беркетмәсен тикшерү һәм анализлау, “Арча муниципаль районы гомуми белем мәктәпләре 9–11 сыйныф укучылары ата-аналарының анкеталарга җавапларын тикшерү һәм анализлау”, “Арча муниципаль район бюджеты акчаларын файдалануга һәм муниципаль милекне нәтиҗә-ле файдалану һәм идарә итүгә контрольне камилләштерү һәм көчәйтү”, “Арча муниципаль районында 2007 елның 21 июлендәге “Торак-коммуналь хуҗалыкны реформалаштыруга ярдәм итү фонды турында”гы 185нче номерлы Федераль законның үтәлеше турында”, “Арча муниципаль районы башкарма комитетының “Мәгариф идарәсе” муниципаль учреждениесендә Татарстан Республикасы Арча муниципаль районының 2012–2014 елларга коррупциягә каршы комплекслы программасын тормышка ашыру турында”гы мәсьәләләр каралды.
Беренче көн тәртибе буенча муниципаль район башлыгы Алмас Назиров чыгыш ясады. Ул Татарстан Республикасы Президенты каршындагы коррупциягә каршы тору буенча Советның 2012 елның 20 октябрендәге утырышы беркетмәсе белән таныштырды, Татарстан Республикасы Президенты күтәргән мәсьәләләрнең әһәмиятле һәм мөһим булуын билгеләп үтте. Катнашучыларның барысын да Президент куйган бурычларны үтәү өчен бөтен көчне куярга чакырды, җаваплы кешеләргә тиешле чаралар күрүне йөкләде һәм билгеләнгән срокларда мәгълүмат әзерләргә кушты.
Икенче көн тәртибендәге мәсьәлә буенча Арча муниципаль районы башлыгының коррупциягә каршы тору мәсьәләләре буенча ярдәмчесе Дамир Абдуллин чыгыш ясады.
Быел октябрь аенда район башкарма комитетының мәгариф идарәсе белән берлектә гомумбелем учреждениеләренең 9–11 сыйныфлар укучыларының ата-аналары арасында “Коррупция” темасына анкеталау үткәрелгән иде.
Анкеталау ата-аналар җыелышлары вакытында исем күрсәтелми уздырылды. Барысы 1192 ата-ана катнашты. Анкеталарны анализлау күрсәткәнчә, мәктәпләрдә коррупциягә каршы тору буенча хәл, гомумән алганда, канәгатьләнерлек. Мәсәлән, “Сезнең балагыз укыган мәктәптә Сез үзегез коррупция күренеше белән очраштыгызмы?” дигән сорауга 100 процент респондентлар “Юк” дип җавап бирде, ә “Сезнең балагыз укыган мәктәптә мәктәп яки сыйныф ихтыяҗлары өчен акча җыю бармы?” дигән сорауга респондентларның 91,6 проценты тискәре, ягъни 8,3 проценты уңай җавап бирде. Анкеталардан күренгәнчә, ата-аналардан баланы ашату, экскурсия, мәктәп яки сыйныфны ремонтлау өчен акча җыялар. Күргәнебезчә, мәктәпләрдә ата-аналардан, күп булмаса да, акча җыю практикасы яшәп килә.
Мәктәп яки сыйныфларны ремонтлау өчен ата-аналардан акча җыярга ярамый. Мәгариф идарәсенә бу юнәлештә эшне һәм контрольне көчәйтергә, укучыларда һәм ата-аналарда коррупциягә каршы торуга карашны формалаштыру һәм коррупциягә тискәре караш тәрбияләү буенча эшне формалаштырырга кирәк.
Өченче мәсьәлә буенча контроль-хисап палатасы рәисе Рәмзия Хәбибуллина, милек һәм җир мөнәсәбәтләре палатасы рәисе Камил Гомәров, дүртенче мәсьәлә буенча район башкарма комитетының торак-коммуналь хуҗалыгы, энергетика һәм элемтә секторы мөдире Илфат Рәхимов, бишенче мәсьәлә буенча мәгариф идарәсе җитәкчесе Рина Бәдриева чыгыш ясадылар.
Утырышта тикшерелгән мәсьәләләр буенча карар кабул ителде.