Төзиләр, төзекләндерәләр

Төзиләр, төзекләндерәләр
Муниципаль район башлыгы Алмас Назиров 8 ноябрьдә “Ватан” агрофирмасы” ширкәтендә булды. Ул терлекчелек фермаларында эшнең оештырылуы белән танышты (рәсемдә), терлекчеләр, белгечләр белән сөйләште, социаль-көнкүреш объектларын карады.
Соңгы елларда бу хуҗалыкта терлек торакларын яңарту, заман таләпләренә яраклаштыру буенча күп эш башкарылды. Алар белән хуҗалык җитәкчесе Мансур Әхмәтов таныштырды. Хәсәншәех авылында яңа төзелгән сыерларны бозаулату бүлеген район башлыгы бик ошатты.
— Терлекчелек белән чын-чынлап шөгыльләнәм дисәң, мондый бүлек бик кирәк инде, — диде район башлыгы. — Менә нинди уңайлы, коры, чиста, һавасы әйбәт.
Хуҗалыкның баш зоотехнигы Рөстәм Хәбибуллин биредәге эш тәртибе турында сөйләде. Бүлек 65 сыерга исәпләнгән, рацион фән кушканча төзелә, сыерлар янында тәүлек буе кеше өзелми.
Бозаулар торагында да тәртип, алар алдында солы, акбур, яфрак азык, печән.
— Германиядән кайтарылган грануллы азык та бирәбез, — ди баш белгеч. — Ул төрле витаминнар белән баетылган.
Алмас Әминович соңыннан баш зоотехник турында: “Өметле белгеч күренә, үз эшен яхшы белә, гомумән, сөйләшүе үк күңелгә ятышлы”, — дип әйтеп куйды.
— Әйе, нәкъ шулай, — диде хуҗалык җитәкчесе Мансур Әхмәтов. — Казанбаш егете, без аны үзебез дә ошаттык.
Шулай күрә белгәндә артыр әле яшь белгечләр авылларда. “Ватан”да, гомумән, белгечләрнең кадере беткәне булмады.
Фермаларда йөргәндә Алмас Әминович терлек азыгы, бигрәк тә печәннең сыйфаты турында сүз кузгатты.
— Нишләптер яхшы сыйфатлы печән әзерләргә өйрәнә алмыйбыз, — диде ул. — Барлык хуҗалыкларга да кагыла бу. Сенаж салырга өйрәндек дияргә була, ә менә печән гадәттә картайган, таякка әйләнгән була. Без республика делегациясе белән Канадада булган идек. Менә анда терлекләр алдында чын печән — ямь-яшел, хуш исле.
— Бездә печән әзерләү техникасы әйбәт хәзер, — ди Мансур Әхмәтов. — Бары тик технологияне саклап әзерләргә генә кирәк.
Бу хуҗалыкта 2010 елгы корылыкта да терлек азыгы эзләп читкә чыгып йөрмәделәр. Быел да терлекләре кытлык сизмәячәк, сыерларга өч кило ярым фураж бирә алгач, начар түгел инде ул.
Мирҗәм авылында быел бер торакны яңартканнар. Шушы көннәрдә анда бозау-лар китереләчәк.
— Авыл өчен ферма бик кирәк, — диде район башлыгы. — Ул аның бөтенлеген саклый, кешеләрдә киләчәккә ышаныч тудыра.
Алмас Әминович Апаз авылында яңа төзелә торган фельдшер-акушерлык пунктын карады. Республикада хәзер әлеге пунктларны үзәкләштерелгән хәлдә әзерләп кайтаралар, урында аны җыясы гына кала. Монысын “Арча МСОсы” төзүчеләре башкара. “Салкыннар башланганчы бу эшне төгәлләргә кирәк”, — диде район башлыгы.
“Ватан” хуҗалыгы көче белән авыл урамнарына таш түшәлгән, район башлыгы бу эшне дә хуплады.
Ильяс ФӘТТАХОВ