Гриппка бирешмәскә

Гриппка бирешмәскә
Әңгәмәдәшебез—район үзәк хастаханәсе баш табибының эпидемиология мәсьәләләре буенча урынбасары Миләүшә Хәбибрахман кызы Сафиуллина.
— Миләүшә ханым, салкыннар җитүгә йөткерә—төчкерә башлыйбыз, грипп булмагае дигән шик килә күңелгә, бүген әлеге йогышлы чир башландымы, әллә юкмы?
— Салкын тиеп табибка килгән авыруның каны анализга алынып, Казанга диагностика үзәгенә җибәрелә. Анализлар нигезендә шуны әйтеп була: әлегә грипп рәсми рәвештә теркәлмәгән. Ул гыйнвар, февраль айларында килеп чыгарга мөмкин дигән фараз бар.
— Гриппның организмда җитди өзлегүләр китереп чыгарырга сәләтле икәнен беләбез, аңа каршы тору чаралары турында кат-кат сөйләшсәк тә артык булмас.
— Төп профилактик чара — гриппка каршы вакцина ясату. Моннан курыкмаска кирәк. Аның организмга зыяны юк. Ә менә прививка ясатмаган очракта бу йогышлы чир белән авырсаң, чыннан да, организм җитди өзлегүләр кичерергә мөмкин. Ул бронхит, үпкә ялкынсынуын китереп чыгарырга, хәтта аннан йөрәк, бөерләрнең зыян күрүе ихтимал. Бигрәк тә балалар, өлкән яшьтәгеләр авыр кичерә гриппны. Бакчаларда балаларга ата-ана рөхсәте белән вакцина ясау каралган, 60 яшьтән узган өлкән яшьтәгеләргә махсус прививка бригадасының өйләргә барып хезмәт күрсәтү мөмкинлеге бар.
— Гриппка каршы вакцина ясатырга кемгә мөрәҗәгать итәргә кирәк?
— Арчада участок табиб-ларына, авылларда фельдшерларга килү сорала.
— Поликлиникада чират торып, участок табибына керү мәшәкатьлерәк, гадирәк ысулы юкмы?
— Поликлиникада 5нче бүлмәдәге (инфекция) шәфкать туташына мөрә-җәгать итәргә мөмкин. Районда барысы 9 мең 820 кешегә вакцина бушлай ясалачак.
— Гриппка каршы тагын нинди көрәш чаралары бар?
— Төрле авыруларга каршы торучанлыкны, иммунитетны күтәрү бик мөһим. Саф һавада күп йөрергә, физик активлыкны арттырырга, витаминнарга бай яшелчә, җиләк-җимеш ашарга, арбидол, анаферон, гриппферон кебек медицина препаратлары кулланырга, борынга оксолин маен сөртеп урамга чыгарга, эшкә, укырга, балалар бакчаларына барырга кирәк. Бу балаларга да, олыларга да кагыла. Һавадагы вирус кисәкчекләренең сулыш юллары (борын) аша организмга эләгүен онытмыйк. Тозлы су белән борынны юдыру да нәтиҗәле. 1 стакан кайнаган җылымса суга 1 чәй кашыгы тоз салып болгатасың, шуны учларыңа яки савытка салып, борының белән суырасың, су тамакка төшкәч, төкереп ташлыйсың. Моны көнгә берничә тапкыр эшләсәң әйбәт.
— Иммунитетны ныгытырга булышучы медицина препаратлары, гадәттә, кыйммәт, электән ышанычны аклаган арзанрак нинди препаратларны киңәш итәр идегез?
— Ремантадин.
— Халык медицинасын да онытырга ярамый.
— Әлбәттә. Янәшәңә суганны турап кую, балалар муенына, җиңелрәк савытка салып, сарымсак асу, белгәнебезчә, грипп вирусын куркытучы чаралар. Мүк җиләге (клюква), карлыган, лимон, имбирь тамыры шулай ук нәтиҗәле. Мәсәлән, лимон, апельсин, имбирьны иттарткыч аша чыгарып куллансаң, бигрәк тә яхшы. Кара җимеш, өрек, чикләвек, бал, мүк җиләген иттарткыч аша ваклап, шуны көнгә 3 тапкыр капсаң, иммунитетыңның ныгуын көт тә тор.
— Миләүшә ханым, грипп-ны гадәти салкын тиюдән ничек аерып була?
— Иң башта табибка барырга кирәк, үз белдегең белән дәваланырга ярамый. Гриппның билгеләре: температура югары күтәрелә, күздән яшь ага, төчкертә, баш авырта, хәлсезлек күзәтелә. Әгәр дә инде грипп диагнозы раслана икән, ул вакытта авыру өйдә торып дәвалана. Дарулардан тыш күп итеп лимонлы чәй эчәргә киңәш ителә. Бүлмәне даими җилләтергә, юеш чүпрәк белән чистартып торырга кирәк.
— Бүгеннән гриппка каршы прививка ясатырга мөмкинме?
— Балаларга вакцина кайтты.
— Киңәшләрегез өчен рәхмәт.
Румия НАДРШИНА