Ул пионер булып туган

Ул пионер булып туган
Адәм баласының яшәгән гомеренең нәтиҗәсен кылган гамәлләре, башкарган эшләре, шулай ук чордашлары алдындагы дәрәҗәсе билгели. Олыгайган көннәрендә олы хөрмәт хисләрен тату кешегә көч, дәрман да бирә. Әлфия Бәдретдинова шул хисне һәрдаим татып яши.
Элеккеге укучылары, шәкертләре белән аралашып яшәү тугызынчы дистәсен ваклап ки-лүче Әлфия апага тормышында бәхетле мизгелләр бүләк итә. Озак еллар балалар белән эшләгәнгә күңеле белән мәңгелек балачак илендә калган ул.
1946 елда Яңа Кенәр урта мәктәбен тәмамлаган кызны, ВЛКСМның элекке Кызыл Юл райкомына чакыртып, Казанга өлкән пионервожатыйлар әзерләү курсларына барырга тәкъдим итәләр. Ризалаша кыз. Курсларда булачак пионервожатыйларга теория генә укытып калмыйча, практикага да йөртәләр. Әлфия “Пионер” кинотеатрында массовик булып эшли, мәктәптә вожатый хезмәтен башкара. Өстәвенә, спекулянтларга каршы көрәштә милициягә ярдәм итәргә дә өлгерә. 1947 елда кыз хезмәт юлын Югары Оры мәктәбендә башлап җибәрә. Комсомолканың муенында кабат кызыл галстук җилферди башлый. Ә язмыш борылмаларына бәйле хезмәт юлы кызны төрле мәктәпләргә алып китә: Ашытбаш, Иске Өҗем, Яңа Кырлай... Берникадәр вакыттан аны, заманында нигезен салучыларның берсе Әлфия апаның әтисе Галләм абый булган Яңа Кенәр мәктәбе үз кочагына ала. Укытучылар институтын тәмамлап, югары белемгә ия булса да, күңеле якын иткән хезмәткә, кызыл галстугына тугры кала Әлфия апа, лаеклы ялга туктаганчы пионервожатый булып эшли. Яшь буынны тәрбия-ләүдә бар көчен, энергиясен биреп, барлык мөмкинлекләрен эшкә җигеп, пионерлар арасында кайнап, рухланып яши ул. Төрле уй, идеяләрне тормышка ашыруда балаларны әйдәп баручы, илһам бирүче була. Аның үрнәгендә тәрбияләнгән шәкертләре арасында Арча педучилищесында укып, пионервожатый һөнәрен сайлаучылар күп.
Авыр сугыш елларында үткән балачагында нәни җилкәләрендә тормыш авырлыгын күтәреп үскән эш сөючән кызга вожатый һөнәре мәшәкатьле дә, мактаулы да мизгелләр алып килә: 1976 елда “Аеруча хезмәт күрсәткәне өчен” медале белән бүләкләнә, берничә елдан Барнаул шәһәрендә Бөтенсоюз фәнни–гамәли конференциядә чыгыш ясап, эш алымнары белән уртаклаша, Артекта “Вожатый–методист”ларның дүрт мең вожатый ярышында катнаша, хезмәт дәверендә күп кенә Мактау грамоталарына, Рәхмәт хатларына ия була. Әлфия Бәдретдинованың хезмәте турындагы мәкаләләр заманында республика матбугаты битләрендә шактый урын ала. Аңа багышлап шигырьләр языла, җыр иҗат ителә. Күптән түгел шул мәкаләләрдән, героебызның истәлекләреннән торган вожатый Әлфия Бәдретдинова турындагы китап дөнья күрде. “Пионер эше профессоры” дип аталган китапның автор-төзүчесе — журналист, “Мәгърифәт” газетасының баш мөхәррир урынбасары Хәмзә Бәдретдинов. Арчаның 5нче гимназиясенә китапны тәкъдир итү кичәсенә килгән укытучылар, Әлфия апаның шәкертләре шундый шәхеснең якташлары, шәкертләре булганга горурланып утыргандыр, мөгаен. Бәйрәмгә килгән район башкарма комитеты җитәкчесе урынбасары Надия Мифтахетдинова, Әлфия апаның яшь буынны тәрбияләүгә куйган намуслы хезмәтенә югары бәя биреп, изге теләкләрен җиткерде.
2009 елда районыбызда Әлфия Бәдретдинова исемендәге премия булдырылды. Бүгенге көндә аңа өч педагог–оештыручы ия. Әлфия апаның бәйрәмендә алар остазларына чын күңелдән рәхмәт сүзләре ирештерде. Ә Әлфия апа, үз чиратында, булачак һәм яшь укытучыларга, хезмәтендә уңышларга алып барган, үзенә девиз итеп алган серләрен ачты. Арча Укучылар сарае коллективы тарафыннан оештырылган кичә пионер учаклары әйләнәсендә башкарган җырлар, күңелле мизгелләре белән һәр тамашачыны шул елларга алып кайтты сыман.
...Ул бүген пионерлар белән эшләгән елларының хатирәсенә күмелеп, шул елларның истәлеген саклаган фотосүрәтләр, альбомнарны барлап, үз юлын, укытучы һөнәрен сайлаган кызы Кадриянең гаиләсенә, оныклары Алия белән Раилнең уңышларына сөенеп, шөкерана кылып гомер итә. Бүген әнә шундый сөенечле мизгелләр кичерү өчен матур тормыш юлы үтү, йөрәк җылыңны кешеләр белән бүлешеп яшәү кирәк икән...
Розалия ЗИННӘТОВА