Бездә чын шәхесләр тәрбияләнә

Бездә чын шәхесләр тәрбияләнә
1997 елның 15 ноябрендә Арча шәһәренең 5нче гимназиясе беренче тапкыр укучылар кабул итте. Шул көннән алып бердәм, дус һәм белем бирү өлкәсендәге һәрбер яңалыкка ияреп баручы педагогик коллектив 682 укучыга урта белем бирде һәм зур тормышка озатты. Укудагы уңышлары, үрнәк тәртипләре өчен 31 укучы алтын, 41 укучы көмеш медаль белән бүләкләнде.
2011-2012 уку елында 9нчы сыйныфны — 114, 11 сыйныфны 71 укучы уңышлы тәмамлады. Һөнәри юнәлеш бирү эшен тиешле югарылыкта оештыру, ата-аналар белән тыгыз элемтәдә тору укучыларга тормышта үз юлларын табарга, кирәкле һөнәр сайлауга ярдәм итә. Гимназияне тәмамлаган укучылар, югары яки махсус уку йортларында белем алып, илебезнең төрле почмакларында тырышып эшлиләр.
Гимназия бинасын төзегән вакытта директор вазыйфасын башкарган Наил Сәлахетдинов, аннан соңгы чорда директор булган Илгиз Миннебаев, Фатыйх Хәкимуллин һәм Мансур Шиһапов бу уку йортының матди–техник базасын ныгыту, кабинетларны заман таләпләренә җавап бирерлек итеп җиһазлау, территорияне төзек-ләндерү һәм яшеллеккә күмү, ә иң мөһиме, педагогик коллективны туплау һәм аларның методик белемнәрен күтәрү юнәлешендә бәяләп бетергесез хезмәт куйдылар. Бүгенге көндә лаеклы ялда булган директор урынбасарлары Рәмзия Хәмидуллина, Венера Шиһабиева, ветеран укытучыларыбыз Зәбидә Шакирова, Гөлүсә Вәлиуллина, Әлфия Дәүләтова, Әлфинур Миннебаева, Наилә Хөснетдинова, Фәния Исмәгыйлева, Халидә Фәйзрахманова, Гөлсинә Яруллина, Минсара Камалова, Хәсибә Гатауллина һәм Фәнис Галиев гимназия ачылган көннән укучыларга ныклы белем һәм тәрбия бирү өчен, белем байлыкларын һәм осталыкларын кулланып, вакытларын кызганмыйча эшләделәр һәм бүгенге көндә үз укучыларының уңышларын күреп чиксез горурланып яшиләр.
Гимназиядә район, республика, Россиянең төрле өлкәләреннән килгән укытучылар катнашында бик күп сандагы семинар–киңәшмәләр, конференцияләр, конкурслар үткәрелде.
Безнең гимназия педагогика көллиятенең база мәктәбе булып тора. Булачак укытучылар өчен беренче дәресләр һәм класстан тыш чаралар үткәрергә өйрәнү, диплом алды практикасы узу өчен гимназиядә барлык шартлар тудырылган. Студентлар безнең укытучылар белән бик теләп аралаша. Көллият студентлары мәктәп яны, хезмәт һәм ял лагерьларында вожатыйлар булып эшлиләр, укучыларның җәйге ялын файдалы, кызыклы итеп оештыруда зур ярдәм күрсәтәләр.
Соңгы елларда гимназиядә спорт мәйданчыгы, өлкән сыйныф укучыларын хәрби хезмәткә әзерләү өчен кирәкле материаллар белән тупланган махсус кабинет һәм барлык таләпләргә җавап бирә торган каршылыклар полосасы, барлык уңайлыклары булган тир, чаңгы базасы булдырылды, спортзал төзекләндерелде. Җылытылган вагоннары булган хоккей мәйданчыгында укучылар да, шәһәребезнең һәрбер теләүчесе дә шөгыльләнә ала. 10-11 сыйныф укучылары Арча район РОСТО (ДОСААФ) оешмасы (җитәкчесе Ринат Алеев) белән берлектә оештырылган автосыйныфта укыйлар, «В» һәм «С» категорияле машина йөртүче таныклыгы алалар. Укытучыларның август киңәшмәсендә гимназиядә урнашкан автосыйныфның эше югары бәяләнде.
Укучыларны гимназиягә 3 автобус алып килә, аларда барлык шартлар тудырылган. Күпербаш, Зур Бирәзә, Урта Бирәзә авылларына һәм шәһәрнең көнбатыш өлешенә төгәл расписание нигезендә маршрутлар ачылды. “Арча АТП”сы акционерлык җәмгыяте шоферлары укучылар белән уртак тел табып эшли, автобуслары һәрвакыт чиста һәм җылы. Әти – әниләр аларның хезмәтеннән бик канәгать.
Гимназиябезнең беренче катында балалар бакчасы урнашкан. Анда тәрбияләнгән балалар гимназиянең 1нче сыйныфына укырга килә. Алар анда кереп танышалар, ишек алдындагы мәйданчыкта уйныйлар. Мәктәпкә балалар бик тиз ияләнә. Балалар бакчасы тәрбиячеләре һәм башлангыч сыйныф укытучылары үзара аралашалар, һәр укучының мөмкинлекләрен ачыклыйлар һәм бу үзара дуслык уңай нәтиҗәләр бирә.
Гимназиянең үткәне, булган вакыйгалар, төрле очрашулар, укучыларыбызның уңышлары турында материалларны туплап бару өчен музей булдырылды. 3 ел рәттән территориябезне яңа елга әзерләү буенча муниципаль район башлыгының I дәрәҗә Дипломнары һәм истәлекле бүләкләре, 2011, 2012 елларда гимназияне яңа уку елына әзерләү өчен куйган хезмәтебезгә бирелгән I дәрәҗә Дипломнар, мәктәп яны тәҗрибә участогына Авыл хуҗалыгы һәм азык–төлек министрлыгы биргән Диплом, район профсоюз оешмалары арасында узган спартакиадада I урынга лаек булган грамота һәм кубок һәм башка экспонатлар музейны баета баралар, ә бу уңышлар коллективның тырыш хезмәте нәтиҗәсе.
Бүгенге көндә гимназиядә 617 укучы белем ала, алар 27 сыйныфка бүленгән. Инглиз һәм рус телен тирәнтен өйрәнү, югары сыйныфларда төрле профиль, кадет сыйныфлары оештырылды. Аларга 63 укытучы һәм тәрбияче ныклы белем һәм тәрбия бирү, 25 хезмәткәр һәркемгә уңай эш шартлары булдыру өчен намуслы хезмәт итәләр. Муниципаль район башлыгы Алмас Назиров, райондагы оешмалар, ата-аналар һәм хезмәт ветераннарыбыз безгә көндәлек ярдәм итеп торалар.
Шәфигулла ГАРИПОВ,
5нче гимназия директоры,
РФнең мәгариф отличнигы,
ТРның атказанган
укытучысы