Ярминкә бакчадан башлана

Ярминкә бакчадан башлана
Сәүдә, җыр-биюләрне яратабыз. Район үзәгендә оештырылган ярминкәләрне аерата көтеп алабыз. Электән алар өстәлләрдә өелеп торган товарлары, шаян сүз, кәмит күрсәтүчеләре белән тирә-юньдә дан тоткан. Гореф-гадәтләребезне саклап килгән алар. Әлеге матур йоланы мәктәп, балалар бакчаларында да яңартып торалар хәзер.
Үзенә бертөрле фольклор чыгышлар. Шундыйларның берсен Арча 10нчы балалар бакчасында (мөдире Фәридә Шакирова) күрергә насыйп булды.
Ярминкәнең төп кәсебе нәрсә дә булса сату һәм алу. Балалар бакчасы ни белән сату итәр икән, диярсез. Ата-аналар бар бит. Мәсәлән, безнең 1нче кече төркем тәрбиячеләре, кулдан эшләнгән әйбер алып килә алмассызмы икән, дип үтенделәр. Бик рәхәтләнеп алып килдек. Өйдә киштәдә кулланышсыз яткан бик матур бәйләнгән кызлар оекбашлары ярминкәнең бизәгенә — товарга әйләнде дә куйды.
Ә сәүдә яхшы барсын өчен товарың да төрле һәм күңелләрне күтәреп торырга кәмит күрсәтүчеләре булырга тиеш. 10нчы балалар бакчасында нәкъ шулай булды. Төсле киемнәрдән 1нче кече төркем тәрбиячеләре Ләйлә Нәҗметдинова белән Лиана Хисмәтуллина балаларны, әти-әниләрне шаян, тапкыр сүзләр белән көлдереп, ярминкәне чын бәйрәмгә әйләндерделәр. Татар һәм рус киемнәрендәге балалар музыка белгече Лилия Харитонова җитәкчелегендә милли җыр-биюләр, такмаклар белән ярминкәгә дәшеп тордылар. Тәрбиячеләр дә, ярминкәгә рәхим итегез, дип шәл, түбәтәй, кашыклар кебек берсеннән-берсе матур товарларын тәкъдим иттеләр. Бакча мөдире Фәридә Шакирова үзе дә мәйданда кайнады, күңелле мизгелләрне фотосурәткә төшерде.
Өстәлләрдә ниләр генә юк?! Әти-әниләрнең кулга оста икәнлекләренә сокланмый мөмкин түгел. Сузылып үскән ташкабаклар аккош муеннарын хәтерләтә, печән, йомыркалар кош оялары хасил иткән, төрледән-төрле җиләк-җимеш кайнатмалары, яшелчә салатлары, бәй-ләнгән йон бияләй, оекбашлар ярминкәнең бизәгенә әверелгән. Быел җир җиләге җыймыйча калуым күңелгә кереп калган иде, менә бит җае чыкты, ярминкәдән бик куанып арзанга гына җир җиләге кайнатмасы сатып алдым. Башка ата-аналарның да күңелләре шат иде. Уңышлы сатып алынган товарларыннан канәгать иде алар. Сатудан кергән акча бакча өчен аз булса да файда. Уенчыклар, я булмаса башка кирәк-яраклар алырлар.
— Менә шулай фольклор жанрдагы чараларны оештырып, балаларыбыз кечкенәдән борынгыдан килгән гореф-гадәтләребезне белеп, аңлап үссеннәр, дип тырышабыз, — ди өлкән тәрбияче Илсөя Хәйруллина.
Балалар бакчасы тормышы әнә шундый күңелле мәшәкатьләрдән тора да инде.
Румия НАДРШИНА