Ана капиталы артачак

Ана капиталы артачак
2007 елдан ана капиталын районда 1831 кеше алган. 2007 елда барлыгы 256 анага бирелсә, быел ул 10 айда шул санга җиткән. 1336 очракта ана капиталы торак шартларын яхшыртуга файдаланылган, 9 очракта балаларының белемнәрен күтәрүгә кулланганнар.
Узган атнада “Автоградбанк” акционерлык җәмгыятенең Арчадагы офисында яңадан 10 анага ана капиталы сертификаты тапшырылды (рәсемдә). Бу юлы аны Гөлназ Гафурова, Алия Хәкимова, Айгөл Лотфуллина, Наталья Шакирҗанова, Кадрия Мөбарәкшина, Гөлүсә Нәбиуллина, Ләйсән Гәрәева, Гөлчәчәк Хәбибуллина, Гүзәл Шәрәфиева, Илвира Зиннәтуллина алды.
— Ана капиталын төзелеш өчен генә түгел, гаиләдәге балаларны укытуга яки балалар бакчасында йөргән өчен түләүгә дә юнәлтергә мөмкин, — диде аналарга мөрәҗәгать итеп Пенсия фонды җитәкчесе Рузия Нурмөхәммәтова. — Әмма һәр очракта да балага 3 яшь тулуы шарт. Ә балага 3 яшь тулганчы кредит учрежде-ниеләре белән эшләргә мөмкин. Ана капиталы сертификатын тапшыру буенча без кредит учреждениеләре белән тыгыз элемтәдә эшлибез. “Автоградбанк” ябык акционерлык җәмгыятенең Арча офисы аларны бүгенге кебек тантаналы шартларда ияләренә тапшыруны, истәлек бүләкләре дә бирүне традициягә кертте.
Бүген ана капиталының суммасы 387640,30 сум. Яңа елдан соң ул 408960 сум булачак, ягъни ел саен 6 процентка артып бара. Рузия Илсуровна аңлатуынча, быел ана капиталы сертификаты алучыларга да, 1 гыйнвардан соң мөрәҗәгать итсәләр, ул арткан суммада биреләчәк.
Ана капиталының гаилә бюджетына тәэсирен яшьләр яхшы аңлады.
— Мин үзем Казаннан. Арчага кияүгә чыктым. Ирем Раил белән ул һәм кыз үстерәбез. Нәниебезгә әле 2 ай гына, — ди Гүзәл Шәрәфиева. — Йорт төзергә планлаштырдык. Бу акча бик тә ярап куйды әле.
— Безнең банк аркылы айга 30лап, микрофинанс-лау үзәге аша 10лап кеше уза. Башка төбәкләр һәм районнардан да безгә мөрәҗәгать итүчеләр бар. Без ана капиталын фатир, йорт, йортның бер өлешен сатып алу, йортка янкорма, җир участогы үз милке булган очракта йорт төзү өчен дә бирәбез, — диде “Автоградбанк” ябык акционерлык җәмгыятенең Арчадагы офисы җитәкчесе Руслан Гәрәев һәм банкның шартлары, ана капиталы юллауның тәртибе белән таныштырды.
Моның өчен кирәкле документларны электрон почта аша да җибәреп була икән. Банк хезмәткәр-ләре барысын да эшләп бирәләр. Акча алучы соңыннан килеп кул куя һәм документларны теркәү палатасына гына тапшыра. Ике атнадан ана сертификаты хуҗасына банк тарафыннан акча да бирелә.
Гөлсинә ЗӘКИЕВА