Тормыш юлын парлап үтегез

Тормыш юлын парлап үтегез
Җомга көн җиттеме, ЗАГС урнашкан бина каршысына бизәлгән машиналар тезелә. Кияү белән кәләш кулга-кул тотынышып тантана булган урынга юнәлә. Мендельсон маршы яңгырый. Гомер-гомергә бер-береңә терәк булып, иңне-иңгә куеп атларга вәгъдәләр бирелә. Шулай итеп ике яшь кеше яңа тормыш юлына аяк баса.
Икесе ике мохиттә тәрбияләнгән бу парны алда нинди сынаулар көтә? Алар моңа әзерме? Никахлашуның асылы нидә? Узган атнада шушы сорауларга җавап алу, алдагы көннәрдә тормыш юлларын бергә кушарга җыенган булачак яшь гаиләләр белән очрашып, иң мөһим мәсьәләләрне уртага салып сөйләшү, аңлашу, киңәшләшү максаты белән ЗАГС бүлеге хезмәткәрләре тарафыннан оештырылган “Гаилә тормышы нигезләре” дигән клубның беренче дәресе үткәрелде.
Бу дәрескә Татарстан Республикасының кеше хокуклары буенча вәкаләтле вәкиле ярдәмчесе Ринат Һидиятов, Арча үзәк хастаханәсенең хатын-кызлар консультациясе мөдире Галия Әхмәдуллина, имам-хатыйб Рәмис хәзрәт, халыкны социаль яклау идарәсе психологы Инна Нурмиева чакырылган иде.
— Акның карасы, айның кояшы, көннең төне булган кебек, сезнең дә сайлап алган парларыгыз бар. Алда сезне озын тормыш юлы көтә. Өйләнешкән көннән сезнең шатлыкларыгыз, мәшәкатьләрегез, борчу-хәсрәтләрегез дә уртак була. Тормышыгыз мәхәббәткә корылсын, сөеп-сөелеп, бер-берегезне аңлап, юл куеп, кирәк чакта сабыр да булып яшәгез, — ди ЗАГС бүлеге җитәкчесе Люция Фатыйхова.
Имам-хатыйб Рәмис хәзрәт тә яшьләргә киңәшләрен бирде, теләкләрен җиткерде. “Хатын-кыз кабыргадан яратылган, турайтам, дип сындыра күрмәгез, сак булыгыз. Хатын-кызларга да ирләренә карата игътибарлы булырга кирәк. Тигез, матур гомер итегез, миһербанлы балалар үстерегез. Аллаһы Тәгалә сезне рәхмәтеннән ташламасын”, — диде ул.
“Кызлар бик әйбәт. Каян чыга усал хатыннар?” — диләр шаяртып. Чыннан да, очрашып йөргәндә бер-береңне аңлыйсың кебек. Ә бергә тора башлагач төрле мәшәкатьләр, гаилә низаглары килеп туа. Бу очракларда нишләргә? Ничек бер-береңнең хәтерен калдырмыйча уртак фикергә килергә? Психолог Инна Нурмиева әлеге сорауларны яшьләрнең үзләренә бирде. Табибә Галия Әхмәдуллинаның кәләшләргә — булачак әниләргә әйтер сүзе бар иде.
— Гаиләне планлаштыру бүлегенә килегез, без һәрчак сезгә ярдәм итәргә әзер. Табибларның максаты — һәр ананың сау-сәламәт бала табуы, — диде ул һәм киңәшләрен җиткерде.
Татарстан Республикасының кеше хокуклары буенча вәкаләтле вәкиле ярдәмчесе Ринат Һидиятов та авырлыклар алдында югалып калмаска, сынауларны уртак тырышлык белән җиңеп чыгып, гаилә ныклыгын сакларга, бер-береңнең кадерен белеп яшәргә кирәклеге турында әйтте. “Киңәш бирүчеләр күп була, үзегезгә кирәклесен сайлап ала белегез”, — диде ул.
“Гаилә тормышы нигезләре” клубының беренче дәресе әнә шулай кызыклы һәм яшьләр өчен файдалы үтте. Киңәшле эш таркалмас, диләр. Гаилә кору җитди эш. Киңәшләргә колак салу беркайчан да зыян итми. Бәхетле булыгыз, яшь парлар!
Гөлсинә ЗӘКИЕВА