Җиңүчеләр билгеле

Җиңүчеләр билгеле
Узган шимбәдә “Олимп” балалар-яшүсмерләр спорт мәктәбендә “Сәламәтлек” спартакиадасы кысаларында предприятие, оешма һәм авыл хуҗалыгы берләшмәләре командалары арасында район беренчелеге булып узды.
Мондый ярышлар ел дәвамында бара. Командалар спортның 11 төре — җиңел атлетика, җиңел атлетика кроссы, милли көрәш, шахмат, шашка, аркан тартышу, чаңгыда узышу, йөзү, кул көрәше, гер күтәрү, волейбол буенча көч сынашалар. Җиңел атлетика буенча кросста иң җитезләр җиңүгә ирешкән иде. Бу юлы аркан тартышу һәм шашка уены осталары очрашты.
Моңа кадәр әлеге ярышларда “Олимп”, “Арча” балалар-яшүсмерләр спорт мәктәпләре, Арча педагогика көллияте, Арча агросәнәгать көллияте һәм аның филиалы, “Ак Барс-агро” ширкәте, ЗУЭС, эчке эшләр бүлеге, Наласа авыл җирлеге командалары, наласалылар актив катнашып килсә, бу юлы аларга “Бердәм Россия” сәяси партиясенең Арча җирле бүлекчәсе, “Арча хәбәрләре” газетасы редакциясе, алкоголь инспекциясенең Арча территориаль бүлеге җыелма командасы, Арча саклык банкы командасы да кушылды.
Аркан тартышуда беренче урынны “Олимп” балалар-яшүсмерләр спорт мәктәбе командасы алды, икенче — Арча педагогика көллияте, өченче урында Арча агросәнәгать көллияте командалары.
Шашка буенча да “Олимп” балалар-яшүсмерләр спорт мәктәбе командасы иң көчле булып чыкты, Арча педагогика көллияте һәм “Ак Барс-агро” ширкәте командалары аннан азга гына калышып икенче–өченче урыннарны алдылар. Шашка буенча шәхси беренчелектә ир-егетләр арасында Шушмабаштан Рәҗәп Вильданов, хатын-кызлар арасында “Олимп” балалар-яшүсмерләр спорт мәктәбеннән Фагыйлә Борһанова җиңде.