Бүләкләр белән килгәннәр

Бүләкләр белән килгәннәр
Ул көннәрне халык көтеп ала. Инде шактый еллардан бирле район элемтә бүлегендә “Әбүнәчеләр көне” үткәрелә. Ул көнне район элемтә бүлегенә газета–журналларга язылырга килүчеләр матбугат хезмәткәрләре белән аралашып, теләкләрен ирештерә, сорауларына җавап ала.
Шушы көннәрдә 2013 елның беренче яртыеллыгына язылу буенча элемтә бүлеге янә әбүнәчеләрне үзенә җыйды. Укучылары белән күрешергә республикада нәшер ителүче “Сөембикә” журналы, “Шәһри Казан” һәм “Казанские ведомости” газеталары һ.б. редакцияләр хезмәткәрләре килгән иде. Бер көн эчендә алар шактый укучы тупларга өлгерде. Һәр язылучыга — истәлекле бүләк.
Арчада уза торган “Әбүнәчеләр көне”ндә “Шәһри Казан”лылар тәүге тапкыр катнаша икән. Журналист Фәнил Гыйләҗев, мондый рухта укучылар табу чарасының үтемле булуын, Арча элемтә бүлегендәге уңай мөнә-сәбәт, җылы каршы алуларына рәхмәтле булуларын әйтте. Якты йөз, җылы караш һәркемнең күңеленә хуш килә, әлбәттә. “Сөембикә”дән Рәмзия Кашапова да сүзне иң элек шуннан башлады. “Без бирегә һәр елны шатланып киләбез. Арчалылар ачык йөз белән каршы алалар, журналыбызны яратып укыйлар, язылалар, даими укучыларыбыз дус–иш, туганнарын да алып килеп яздыралар, — диде ул. — Элемтә бүлегенең әлеге көнгә ныклап әзерләнүе, өстәлләр куеп махсус урын әзерләп бирүләре безнең өчен бик уңайлы. Бу көн халык өчен үзенә күрә бер бәйрәм”.
Газета–журналларга язылу шактый бәягә төшсә дә, почта тартмасындагы көндәлек матбугат йортыбызга райондагы, республикадагы, илдәге яңалыкларны, тирә–ягыбыздагы шәхесләр, мәдәният, спорт һ.б. төрле өлкәләр турында хәбәрләр алып килә. Ул язмаларны еллар узгач алып укыганда янә шул чакларга кайткан кебек буласың. Вакытлы матбугат – тормышыбызның бер өлеше ул.
“Арча хәбәрләре”нә дә яратып языла арчалылар. Газетабызда аларның башкарган эшләре турында, укучыларыбыз хатларына да киң урын бирелә. Киләчәктә дә ике арадагы элемтә нык булсын.
Розалия ЗИННӘТОВА