Һәр анага — хатын-кыз бәхете

Һәр анага — хатын-кыз бәхете
Әңгәмәдәшебез — район хатын-кызлар советы рәисе Фрадия Шәймуллина.
— Фрадия Сәмиулловна, Әниләр көне уңаеннан хатын-кызлар турында сөйләшеп алсак иде.
— Бик рәхәтләнеп. Районда барысы 27 мең 300 хатын-кыз бар. Бу барлык халык санының 54 проценты дигән сүз. 16 меңләп пенсионер булса, шуның 62 проценты апа-әбиләр. Мин бу җәмәгать эшенә 2006 елда алындым. Хәтерлисездер, башта Әминә ханым Әхмәдиева, аннан Розалия Шәяхмәтова җитәкләде.
— Әлеге оешманы хатын-кызлар тормышын, аның бөтен нечкәлекләрен тирәнтен аңлаган, һәр сорау, мәсьәләне йөрәгенә якын алып, ахыргача өйрәнеп, уңай хәл иткән затлы хатын-кыз лидерлар җитәкләде һәм җитәкли.
— Авылларыбызда башлангыч оешмаларның рәисләре турында да җылы сүз әйтәсе килә. Казанбаштан Мәдхия Зарипова, Кушлавычтан Фәния Хәнәфиева, Курса-Почмактан Лимара Мөхәммәдиева, Утар Атыдан Фәрдия Миңнуллина һ.б. озак еллар авырыксынмыйча, вакытлары белән исәпләшмичә үз эшләрен яратып башкаралар.
— Ә бит бу четерекле хезмәт түләүсез, төп һөнәреңнән тыш башкарыла торган җәмәгать эше.
— Әйе. Безнең оешма хөкүмәт тарафыннан финансланса һәм бу хезмәт белән төп эшеннән азат кешеләр шөгыльләнсә, нәтиҗә бөтенләй башка булыр иде.
— Әниләр...Тормыштагы һәрнәрсә аларга барып тоташа. Канатлы сүзләр белән әйтсәк, балалар илнең нигезе, киләчәге. Борчыган проблемалар турында сүзне дәвам итик.
— Ил, җәмгыять матур гаи-ләләр белән нык. Безнең төп максатыбыз — гаиләләрне саклап калу, таркатмау. Быелның 10 аенда 318 пар язылышса, 102 гаилә таркалган. Ай саен 10 гаилә таркалган, дигән сүз бу. Авылларда өйләнмичә картайган егетләр күплеге дә проблема булып тора. Баласыз гаиләләр шулай ук аерым сөйләшә торган тема.
— Эшсезлек турында да без бүген дәшми кала алмыйбыз.
— Моннан берничә ел элек эшсезлек хатын-кызлар арасында киң таралса, бүген ирләр арасында. Барлык эшсезләрнең 65 проценты ирләргә туры килә. Авыр, катлаулы хезмәтне хатын-кыз башкара. Эш сәгате белән исәпләшмичә аналар тырыша-тырмаша. Иң кыен өлкә — эшмәкәрлектә дә алар.
— Иртәнге 8дән кичке 6га кадәр эшләп, атнага бер генә көн ял иткән (районда мондый шәхси оешмалар бар) аналарга баласы белән шөгыль-ләнергә дә вакыт калмый.
— Шәһәр җирендә Хезмәт законы буенча атнага 42 сәгать эшләү каралган. Законны бозарга берәүнең дә хакы юк. Моңа Казандагы дәүләт хезмәт инспекциясе контрольлек итә. Бу мәсьәләне уңай хәл итәргә теләгән кешеләр әлеге оешмага мөрәҗәгать итә ала. Яшьтән пенсияң турында кайгырту да аналарның киләчәге, картлык көннәре өчен бик тә әһәмиятле. Моның мөһимлеген аңлап бетермиләр әле. Рәсми рәвештә хезмәт килешүләрсез эшкә урнашулар киң таралган. Пенсия фондына взносларың күчерелмәсә, пенсияң дә булмый дигән сүз бит инде бу. Ә вакыт бик тиз уза.
— Аналарга кагылган мәсьәләләр турында бик озак сөйләшеп булыр иде. Сезгә күбрәк нинди сораулар белән мөрәҗәгать итәләр?
— Төрле мәсьәләләр белән киләләр. Булачак солдат, хәрби хезмәт үтүчеләрнең әниләре дә, баласы авырткан аналар да, какшый башлаган гаилә башлыклары да — алар байтак. Һәркемгә булышырга тырышабыз. Безнең телефон: 3–28–80. Адрес: Банк урамы, 2а йорт.
— Әниләр көне уңаеннан теләкләрегез.
— Иң мөһиме — сәламәтлек, гаилә иминлеге, һәр анага хатын-кыз бәхете татырга язсын.
Румия НАДРШИНА