Төп максат — кешеләр тормышын яхшырту

Төп максат — кешеләр тормышын яхшырту
21 ноябрьдә “Бердәм Россия” партиясе Арча җирле бүлекчәсенең XX хисап-сайлау конференциясе булды.
Конференцияне партиянең җирле бүлекчәсе сәяси советы секретаре, муниципаль район башлыгы Алмас Назиров ачты һәм алып барды.
Конференциянең беренче көн тәртибендәге “Бердәм Россия” партиясе Арча җирле бүлекчәсенең 2011 елның апреленнән 2012 елның ноябренә кадәрге чордагы эшчәнлеге турында хисап доклады белән җирле бүлекчә секретаре Алмас Назиров чыгыш ясады. Ул хисап чорының төрле вакыйгаларга бай һәм нәтиҗәле булуын билгеләп үтте.
Төрле дәрәҗәдәге сайлауларда “Бердәм Россия” партиясе яуланган позицияләрен тагын да ныгыта төште. Сайлаучылар партиянең эшчәнлеген, барыннан да элек, районда, республикада үткәрелә торган социаль-икътисадый сәясәткә карап бәялиләр.
— Моны башлангыч бүлекчәләр секретарьларына, партия әгъзасы булган җитәкчеләргә һәрвакыт истә тотарга һәм үз эшләрендә исәпкә алырга кирәк! — диде докладчы.
Бүген партиянең җирле бүлекчәсендә 42 башлангыч бүлекчә бар. Яңа Кенәр, Шушмабаш, Апаз бүлекчәләре иң эреләрдән исәпләнә. Партия әгъзаларының саны арту белән бергә, сыйфат күрсәткечләре дә яхшыра. Хәзерге вакытта районда 5122 әгъза исәптә тора.
Партия әгъзалары районның төрле тармакларында намус белән хезмәт итәләр. Хисап чорында 100ләп партия әгъзасы сәяси советның Мактау грамоталарына, Рәхмәт хатларына, истәлекле бүләкләренә лаек булды. Алар арасында комбайнчылар, тракторчылар, шоферлар, укытучылар, медицина, мәдәният, көнкүреш өлкәсе хезмәткәрләре, спортчылар бар.
Булган кыенлыкларга карамастан, район икътисадында тотрыклы үсеш күзәтелә. Игенчеләр 133,5 мең тонна ашлык җыйнап алды, терлекләрнең баш саны арта, ит, сөт җитештерүдә уңай үзгәрешләр бар.
Терлек торакларын ныклап төзекләндерү, механикалаштыру буенча күп эш башкарылды, машина-трактор паркы шактый яңарды. Шәхси хуҗалыклар һәм крестьян-фермер хуҗалыкларын үстерү буенча максатчан эш алып барыла. Авыл кешеләренең эшчәнлеген активлаштыру мәсьәләсе партиянең игътибар үзәгендә. Ул авыллардагы башлангыч бүлекчәләр эшчәнлегенә бәя биргәндә дә исәпкә алына.
Районда торак төзелеше, лизинг, грант ярдәме, үз эшеңне булдыру һ.б. федераль һәм республика программалары уңышлы тормышка ашырыла. Һәр елны 27 мең квадрат метрдан артык торак файдалануга тапшырыла. Бөек Ватан сугышы ветераннарын торак белән тәэмин итү буенча зур эш башкарылды. 684 ветеран бөтен уңайлыклары булган фатирлар алды. Ел ахырына кадәр тагын 12, яңа елдан соң 7 ветеран фатир алачак.
Соңгы 2 елда социаль ипотека буенча 191 фатир төзелде, авылда эшләүче 23 яшь белгечкә субсидия бирелде, 51 яшь гаилә торак белән тәэмин ителде. Күп фатирлы йортларны ныклап төзекләндерү, тузган торактан күчерү буенча зур эш башкарылды.
Республика җитәкчелегенең булышлыгы белән башка өлкәләрдә дә уңай якка үзгәрешләр күп. Мәгариф, сәламәтлек саклау өлкәләренә игътибар арта. Район халкының тормыш дәрәҗәсен күтәрүгә, социаль-мәдәни өлкәне үстерүгә юнәлдерелгән гаять зур күләмдә эш алып барыла.
“Бердәм Россия” партиясенең Татарстан региональ бүлекчәсе сәяси советы партия активы алдына эшчәнлекнең төп юнәлешләре буенча бурычлар куйды. Алар: башлангыч бүлекчәләр статусын күтәрү, яшьләр белән эшләүне яхшырту, фракцияләрнең активлыгын арттыру, төрле дәрәҗәдәге депутатлар арасында элемтәне ныгыту, партия проектларын тормышка ашыруга игътибарны көчәйтү. Район, шәһәр, авыл кешеләренең проблемаларын яхшы белү, аларны тизрәк хәл итү мөмкинлекләрен эзләү.
— “Бердәм Россия” партиясе — илнең әйдәп баручы сәяси көче, идарә итүче партия. Шуңа күрә җаваплылык та гаять зур. Төп максат — кешеләр тормышын яхшырту, — диде Алмас Назиров чыгышын тәмамлаганда.
Партиянең җирле бүлекчәсенең контроль–ревизия комиссиясенең 2011 елның апреленнән 2012 елның ноябренә кадәрге чорга хисабын аның рәисе Рамил Гыйматов ясады.
Докладлар буенча фикер алышуларда Арча шәһәренең 7нче номерлы микрорайоны бүлекчәсеннән делегат Лилия Әхмәтова, Сеҗе башлангыч бүлекчәсеннән делегат Гөлфия Гыйбадуллина катнашты.
Делегатлар яшерен тавыш бирү юлы белән альтернатив нигездә партиянең Арча җирле бүлекчәсенең секретарен сайладылар. Күпчелек тавыш белән бүлекчә секретаре итеп Назиров Алмас Әмин улы сайланды.
Партиянең җирле бүлекчәсе секретаре урынбасары итеп Мифтахетдинова Надия Равил кызы сайланды.
Конференция делегатлары шулай ук җирле бүлекчәсенең сәяси советын, контроль–ревизия комиссиясен, партиянең Татарстан региональ бүлекчәсенең XX конференциясенә делегатлар сайладылар. Җирле контроль–ревизия комиссиясе рәисе итеп Шәрәфетдинов Зөлфәт Зөфәр улы сайланды.
Алмас Назиров партия абруен күтәрүгә лаеклы өлеш керткән һәм район эшчәнлегендә актив катнашкан кешеләргә Мактау грамоталары, яңа әгъзаларга билетлар тапшырды.
Ильяс ФӘТТАХОВ