Киләсе елда да күп төзиячәкбез

Киләсе елда да күп төзиячәкбез
Татарстан Республикасы Президенты Рөстәм Миңнеханов 24 ноябрьдә видеоконференция режимында үткәргән киңәшмәдә Татарстан Республикасында 2013 елга күп фатирлы йортларны ныклап төзекләндерү, ике контурлы газ казаннары урнаштыру, “Чиста су”, гомумбелем мәктәпләрен ныклап төзекләндерү, авыл клублары һәм фельдшер-акушерлык пунктлары төзү программаларының раслануы турында хәбәр итте.
ТР төзелеш, архитектура һәм торак-коммуналь хуҗалыгы министры Ирек Фәйзуллин әйтүенчә, 2013 елда республикада 811 күп фатирлы йорт (4 млрд. 354 млн. сумлык) ныклап төзекләндереләчәк. 2013 елда 4,5 мең фатирны аерым җылытуга күчерү планлаштырыла. 162 гомумбелем мәктәбе һәм 7 махсус мәктәп ныклап төзекләндереләчәк. Барысы 75 фельдшер-акушерлык пункты төзү, 300 медицина объектын ныклап төзекләндерү күздә тотыла. 2012 елда 72 фельдшер-акушерлык пункты төзелгән, 49ы инде файдалануга тапшырылган. Рөстәм Миңнеханов яңа төзелгән пунктларның медицина персоналы белән тәэмин ителгән булырга тиешлеген ассызыклады. Болардан тыш, киләсе елда 25 авыл клубы төзеләчәк.
Киңәшмә ахырында Премьер-министр Илдар Халиков гражданнардан коммуналь түләүләр — йорт буенча исәпләүләр буенча бик күп шикаятьләр килүен әйтте. Соңгы айда үткәрелгән тикшерүләр моның күп очракларда идарәче компанияләрнең усал ният белән файдалану, урлаулар һәм хуҗасызлыгына бәйле булуын күрсәтте. Муниципалитетлар әлеге мәсьәлә буенча эшне активлаштырырга, һәр очракны аерым карарга тиешләр.
Муниципаль район башлыгы Алмас Назиров, киңәшмәне дәвам итеп, район буенча эшләрнең барышына тукталды. Югарыда санап үтелгән республика программалары безнең районда да уңышлы тормышка ашырыла. Соңгы 3 елда гына да 1 меңгә якын фатир төзелде. Исемлеккә кергән 703 ветеранның 684е фатир алды, калганнары да озакламый фатирлы булачак.
— Торак базары булдыруга ирештек, — диде район башлыгы. — Бездә хәзер теләгән кешегә фатир сатып алу мөмкинлеге бар. Базар булу бик әйбәт.
Арча районы республикада беренчеләрдән булып күп фатирлы йортларны аерым җылытуга күчүне төгәлләде. Хәзер инде фатирыбыз салкын, начар ягалар дип зарланучы юк.
Быел Арчаның 2нче мәктәбе ныклап төзекләндерелде. Шәһәрнең көньяк өлешендә күп функцияле мәдәни–спорт үзәге калкып чыкты. Хәзер тулы көченә эшли башлады, бу якта яшәүче балаларның да сәнгать мәктәбенә менеп йөриселәре юк, педагоглар үзләре килеп төрле түгәрәкләр эшен оештыра (рәсемдә).
Киләсе елда андый клублар Сикертән һәм Симетбаш авылларында төзеләчәк.
— 2013 елда да төзелешләр бик күп булачак, — диде Алмас Әминович. — Планнар расланды, подрядчы оешмалар билгеләнде.
Дәүләт кешеләр турында кайгырту юнәлешендә моңа кадәр күрелмәгән программалар кабул итте: тузган торактан күчерү, ятим балаларны, күп балалы гаиләләрне фатирлар белән тәэмин итү һ.б. Бөтен кеше дә аларны белеп, аңлап та бетермәскә мөмкин.
— Аңлату, андый кешеләрне ачыклау, барлау, документлар әзерләргә булышу — сезнең бурыч диде, — район башлыгы авыл җирлекләре башлыклары белән шушы темага аерым үткәргән киңәшмәдә. — Ул кеше безгә килмәде, дип кабинетта көтеп утырмаска, аларны үзегез эзләп табарга. Вакытында булышырга, хәленә керергә, халыкның халәтен белергә кирәк. Ата-аналар, балалар, укытучылар аша эш итәргә.
Кешеләрне тузган торактан күчерү программасы ике һәм аннан күбрәк фатирлы йортларда яшәүчеләргә кагыла. Алар авылларда күп түгел, әмма бар. Мөндештә элеккеге “Сельхозтехника” бүлекчәсе янындагы андый йортлар беркайда исәптә дә тормый, әмма аларда да безнең кешеләр яши.
Дөрес, тузган торакта яшәгән бар кеше бүген–иртәгә генә фатир алмаячак. Алар исемлеккә кертелә, чират буенча алалар. Яңа йортлар шул авылда, шул йорт янәшәсендә яки урынында төзеләчәк.
Ильяс ФӘТТАХОВ