Су буеннан әнкәй кайтып килә...

Су буеннан әнкәй кайтып килә...
Каз каурые алган кулына... Яраткан җырчыбыз Расих Галимҗанов әлеге җырны башкарганда күзләр дымланды. Эх, кайда икән ул әни йөргән сукмаклар?! Нәкъ җырдагыча, эзләренә җылы карлар булып тал мамыгы ява тын гына. Йөрәк сызып юксынды... Бу халәт бер миндә генә түгел, биредә, район балалар сәнгать мәктәбендә Әниләр көне уңаеннан оештырылган бәйрәмдә утырган аналар күңеле дә дулкынлану кичергәндер. Әйе, һәркемнең газиз җанын бирер бердәнбере — әнисе бар.
Бәйрәмгә килгәннәр үзләре әни, дәү әни. Ихтирамга лаек кешеләр. Аларга багышланган тирән эчтәлекле матур сүзләр башка бер бәйрәмдә дә әйтелмидер. Чыгыш ясаган һәркемне, каян күңеленә килә мондый мәгънәле, гыйбрәтле, җылы сүзләр, дип сокланып тыңладык. Район башкарма комитеты җитәкчесенең социаль мәсьәләләр буенча урынбасары Надия Мифтахетдинова: “Без бүген бирегә мөхтәрәм, хезмәттә зур казанышларга ия булган, үрнәк аналарны чакырдык, — дип сөйләде. — Тормыш матурлыгын, ямен тоеп, балаларыгызның уңышларына сөенеп, матур, озын гомерләр кичерергә язсын. Сезнең алда баш иеп, үземнең теләкләремне җиткерәм”. Надия Равилевна чыгышын шигырь юллары белән тәмамлады: “Әниләргә безгә, я йолдыздан, я кояштан һәйкәл салырлык”. Әйе, бүген аналарны зурлау, хөрмәтләү көне. Шушы ихтирамны тоеп, күңелләре тулып утырды хөрмәтле апа, әбиләрнең. Тормыш үтә дә мәшәкатьле. Күңелдәге җылы хисләрне әниләребезгә, гаилә учагын тоткан хатын-кызларыбызга әйтеп бетерә алмыйбыз... Йөрәк түреннән чыккан сүзләр бик сирәк телгә килә яисә бөтенләй дә күңелдә йомылып кала... Ә хатын-кыз җылы сүзгә бик мохтаҗ.
Бәйрәмне алып баручы Миләүшә Һадиеваның: “Әйтегезче, кемнең изгелеге үлчәп бетергесез? Кем куллары өебезне, тормышыбызны ямьли?” — дип, залга сорау би-рүеннән аналар гүзәллеген тагы да ачыграк тоясың. Үз сабыен гына түгел, чит баланы канаты астына алган аналарның бу гамәлен аңлап та бетереп булмый. Нинди зур тәвәккәллек, хәтта батырлык та бит бу! 2008 елдан алып бүгенге көнгә кадәр районда 29 гаиләдә 44 чит бала тәрбия-ләнә. Алар арасында инвалид балаларны, хәтта 3–4 сабыйны гаиләсенә сыйдыручылар бар. Бүгенге тыныч тормышта геройлыкка тиң гамәлләр болар. Шигырь телендә әйтсәк, бер бәләкәй генә адәмгә дә берәүләрнең таудай хисе бар. Районның опека һәм попечительлек буенча сектор мөдире Гүзәл Габдрахманова әлеге киң күңелле аналар турында, кабатланмас кешеләр, дип бик рәхмәтле сүзләр сөйләде.
Гадәттә әниләр тормышы ЗАГСтан башлана. ЗАГС бүлеге мөдире Люция Фатыйхова ана булуны табигатьнең бер могҗизалы сере, дип килештереп әйтте. Һәм аның чыгышы да яшьләрне кавыштырганда юллана торган матур теләкләргә тиң иде.
Бүген ана капиталы турында сөйләнмәсә, ничектер бәйрәм тулы булмас иде. Арча һәм Әтнә районнары буенча Пенсия фонды җитәкчесе Рузия Нурмөхәммәтова ана капиталы белән бик уйлап, максатчан эш итсәгез иде, дип киңәш итте. “Акчасын алырга булышам, дигән белдерүләр хәзер күп. Капиталны юкка-барга әрәм-шәрәм итәргә һич ярамый. Бала хакы дигән нәрсә бар”, — диде фонд җитәкчесе.
“Ана даны” медаленә ия әниләр аерым алкышланды. Күп балалы аналарга Аллаһы Тәгалә сабырлыклар, исәнлек, шатлык-куанычлар бирсен.
Баланы үстергәндә ананың поликлиника, хастаханәгә эше төшми калмый. Әниләрне бәйрәм белән котларга Арча үзәк хастаханәсенең баш табибы урынбасары Лилия Фәйзрахманова да килгән иде. “Авырмагыз, ә чирне булдырмас өчен профилактика өчен генә килегез безгә”, — диде ул елмаеп.
Сәхнә түренә җитәкче урыннарда эшләгән булдыклы хатын-кызларыбыз үтмәсә, үзләре белән таныштырып, теләкләрен юлламаса, нидер эшләнеп, әйтелеп бетмәгән кебек булыр иде. Менә алар: район хатын-кызлар советы рәисе Фрадия Шәймуллина, авыл җирлекләре башлыклары Рәмзия Вафина (Урта Курса), Гөлнара Заһидуллина (Иске Чүриле), Гөлфия Гыйбадуллина (Сеҗе), “Бердәм Россия” сәяси партиясе җирле бүлекчәсенең башкарма комитеты җитәкчесе урынбасары Валентина Гаранина.
Заманында ару-талуны белмичә эшләгән, балалар үстергән, гыйбрәтле язмышлы апа-әбиләребез Арчадан Гайшә Якупова, Иске Төрнәледән Надия Хәбибуллина, Фирдәвес Шәйхуллина чыгышларын аерата дулкынланып тыңладык.
Кушлавычтан мәдәният хезмәткәре Фәния Хәнәфиеваның үзе язган шигырьләрен укуы һәм көй чыгарып, җырын да башкаруы бәйрәмне тагын да нурландырып җибәрде.
Хезмәттән, тормыштан ямь-тәм табып эшләгән һәм яшәгән бик күп күркәм аналар хөрмәт белән телгә алынды, сәхнә түренә чакырылды.
Яшь үзешчәннәр җырлап-биеп кунакларның күңелләрен күрделәр. Ә соңыннан һәр анага чәчәкләр дә бүләк ителгәч, бәйрәм көн, чыннан да, чын бәйрәмгә әйләнде.
Румия НАДРШИНА