Яңалыклар

Яңалыклар
ТАТАРСТАНДА 1 декабрьдән 10 декабрьгә кадәр инвалидлар ункөнлеге була. Барлык шәһәр, район, авылларда төрле чаралар үткәреләчәк. Шул уңайдан ТРның хезмәт, мәшгульлек һәм социаль яклау министры урынбасары Ирина Просвирякова журналистлар белән очрашты. “Инвалидларның ничек яшәве турында җәмәгатьчелек уйлансын иде”, — дип башлады ул чыгышын. Ункөнлекнең җыр-биюгә генә кайтып калмыйча, түгәрәк өстәлләр артында проблемалар турында сөйләшүләр белән үтәргә тиешлеге турында басым ясап әйтте ул. Быел программалар кысаларында нәрсә эшләнгән һәм эшләнәчәк, нинди нәтиҗәләр бар — сөйләшү өчен җирлек зур. Гомумән, ункөнлектә генә түгел, ел әйләнәсендә мөмкинлекләре чикләнгәннәргә игътибар булырга тиеш.

5 ДЕКАБРЬДӘ “Арча” балалар-яшүсмерләр мәктәбендә Инвалидлар көне уңаеннан мөмкинлекләре чикләнгән кешеләр арасында спартакиада була. Ярышлар шашка, шахмат, дартс, өстәл теннисы һәм өстәл хоккее буенча үтәчәк.
10 сәгатьтә башлана.

ЧИРАТЛАРНЫ КИМЕТҮ МАКСАТЫННАН Арча үзәк район хастаханәсенең олылар поликлиникасында авыруларны кабул итү тәртибе үзгәрә: авылларда яшәүчеләр иртәнге 7 сәгать 30 минуттан 10 сәгатькә кадәр (кулларында фельдшер юлламасы булырга тиеш), шәһәрдә яшәүчеләр 10 сәгать 15 минуттан 12 сәгатькә кадәр кабул ителә. Ташламалы даруларга рецепт 13 сәгатьтән 14 сәгатькә кадәр бирелә, документлар тутыру, белешмәләр бирү 14 сәгатьтән 15 сәгатькә кадәр башкарыла. Табиблар талон буенча кабул итә. Аларга 3–16–03 телефоны буенча язылырга (язылу бер атнага) мөмкин. Графикны саклау халыкның үзе өчен уңай.

Габдулла Тукай исемен-дәге Ашытбаш урта мәктәбе укучылары, “ Татарстан — Яңа гасыр” телеканалында уза торган “Тамчы-шоу” интеллектуаль телевизион уенында катнашып, беренче урынны яулап кайттылар. Алар, Кукмараның Түбән Өскебаш урта мәктәбе укучылары белән көч сынашып, зирәклекләре, тапкырлыклары ярдәмендә җиңүгә иреште. Киләчәктә тормышның һәр өлкәсендә зур уңышларга ирешергә язсын үзләренә. Ә алар катнашындагы уенны телеэкранда 2013 елның гыйнвар аенда күрергә мөмкин булачак.

“Арча” балалар-яшүсмерләр спорт мәктәбендә инвалидлар декадасы уңаеннан мөмкинлекләре чикләнгән балалар арасында “Күңелле дельфиннар” спорт бәйгесе узды. Анда Арча балалар тернәкләндерү үзәгеннән 20 кеше катнашты. Унысы бик актив җанатар булса, калганнары “Крабы” һәм “Экстрим” командаларына бүленеп үзара көч сынашты. 10–14 яшьлек малайлар һәм кызлар “Туплар белән эстафета”, “Диңгез капитаннары сугышы, “Диңгез уңышын җыю” һәм башка күңелле уеннарда активлык күрсәттеләр. Соңыннан әлеге спорт чарасында катнашучыларга бүләкләр һәм грамоталар тапшырылды.

Арча Укучылар сараенда “Тукай якташы” әдәби бер-ләшмәсе (җитәкчесе Зөлфирә Зарипова), “Нур” телерадио-станциясе (Дамир Таҗиев) яшь журналистлары “Татарстан — Яңа гасыр” телевидениесе журналисты Луиза Закирова белән очрашты. Луиза Закирова әле яңа каләмнәрен тибрәндерүче, эфирга чыгучы яшь дусларына эшлекле киңәшләрен, сорауларына җаваплар бирде, осталык классы үткәрде, хезмәтләрен бәяләде, хаталарын күрсәтте, тәкъдимнәр кертте.

2013 елның 1 гыйнварыннан 171-ФЗ номерлы 1995 елның 22 ноябрендә чыккан “Алкоголь продукциясен куллануны чикләү һәм составында алкоголь һәм спирт булган продукция, этил спирты әйләнешен һәм җитештерүне дәүләт көйләве турында”гы Федераль законга кертелгән төзәтмәләр: 2010 елның 22 гыйнварында чыккан 80-ЗРТ номерлы ТР Законы нигезендә Татарстан Республикасы буенча төнге вакытта (22 сәгатьтән 10 сәгатькә кадәр) барлык төр алкоголь продукциясе кебек үк сыра сатуны, стационар булмаган сәүдә нокталарында (киосклар, җәйге чатырлар) сыраны ваклап сатуны тыю үз көченә керә.
Бу турыда ТР Дәүләт алкоголь инспекциясенең Арча территориаль органы хәбәр итә.