Түли алганнарга тапшырыгыз

Түли алганнарга тапшырыгыз
Муниципаль район башлыгы урынбасары Любовь Осина менә инде өченче тапкыр халыктан җыйган сөт өчен түләнмәгән акчаларны түләттерү турында киңәшмә үткәрде.
Шунысын да әйтеп үтәргә кирәк — беренчесендә зал тулы булса, монысында “штрафчы”ларның сафы сирәкләнгән иде. Тамчы тама торгач ташны да тишә шул...
— Түләнмәгән акча 12 миллион сумга җиткән иде, — диде Любовь Михайловна. — Хәзер 2 млн. сумга якын, әмма бу да зур сан, кешеләр моның өчен сезне, безне сүгә.
Район авыл хуҗалыгы һәм азык–төлек идарәсе җитәкчесе Айдар Габбасов 24 ноябрьгә булган мәгълүматлар белән таныштыра. Апаз авыл җирлегенә кергән авылларда 466 сыер бар. Бер литр сөтнең бәясе — 11 сум 70 тиен. Сөт җыючылар М.Газизов, Р.Гарифуллин, Г.Шәрипова, Р.Фатыйховның кешеләргә бурычы юк. Сөтне Әтнә сөт комбинатына тапшыралар.
Кәче авыл җирлегендә 149 сыер, бер литр сөтнең бәясе 10 сум 80 тиен. Сөт җыючы В.Фазылҗанованың Арча сөт комбинатыннан 220 мең сум аласы бар, халык алдында бурычы юк.
Наласа авыл җирлегендә 170 сыер, бер литр сөткә 10 сум 50 тиен түлиләр. “Союз” кооперативы җыя, халыкка 150 мең сум бурычлы, комбинаттан 190 мең аласы бар. Хәзер сөтне Әтнә комбинатына тапшыралар.
Яңа Кенәр авыл җирлегенә кергән авылларда 564 сыер исәпләнә. Сөтнең литрын 11 сумнан җыялар. Сөт җыючылар бишәү. С.Мәгъсүмов, Ф.Һадиева — “Аргамак”, Р.Сибгатуллин “Эталон” ширкәтләренә тапшыралар, аласылары да, халыкка бирәселәре дә юк. Х.Заһидуллинның Арча сөт комбинатыннан 165,5 мең сум аласы, шуның кадәр үк халыкка бирәсе бар. Соңгы вакытта сөтне Әтнәгә тапшыра, исәп-хисапны вакытында ясап бара. В.Излановның Арча сөт комбинатыннан 97 мең сум аласы, халыкка шуның кадәр бурычы бар. Сөтне Әтнәгә тапшыра башлагач түләү тәртипкә салынган.
Яңа Кишет авыл җирлегендә 340 сыер бар. Р. Мортазина сөтне литрын 11 сумнан җыеп Әтнәгә тапшыра. И.Шакиров (үзе 9 сыер асрый) күрше-тирәләрнекен дә җыеп Казанга алып барып сата, литрына 20 сум түли. Икесенең дә бурычлары юк.
Яңа Кырлай авыл җирлегендә 423 сыер бар. Г.Хәйретдинов белән М.Газизов сөтне литрын 10 сумнан җыеп “Касыйм” ширкәтенә тапшыралар, бурычлары юк.
Сеҗе авыл җирлегендә 460 сыер исәпләнә. Сөтне литрын 11 сумнан җыялар. М.Әхәтованың Арча сөт комбинатыннан 100 мең сум аласы бар, халыкка бурычы юк. Хәзер сөтне Түбән Атыга Җәүдәт Әхмәтхановка тапшыра, исәп-хисапны ясап бара. Ф.Хаҗиев “Аргамак” ширкәтенә тапшыра, бурычы юк.
Урта Аты авыл җирлегендә 225 сыер бар. Сөтне шәхси эшмәкәрләр Г.Садриев (Әтнә сөт комбинатына тапшыра), Җәүдәт Әхмәтханов, Шиһабеддинов крестьян-фермер хуҗалыгы (“Огары Ослан” агрофирмасына тапшыра) литрын 10 сумнан җыялар. Бурычлары юк.
Урта Курса авыл җирлегендә 291 сыер исәпләнә. Сөтне Р.Гайнетдинов (шәхси эшмәкәр Гайнетдиновка тапшыра), Ф.Хаҗиев (“Аргамак” ширкәтенә тапшыра) җыя. Литрына 11 сум 50 тиен түлиләр, бурычлары юк.
Иске Чүриле авыл җирлегенә кергән авылларда 198 сыер исәпләнә. Сөтне халык литрын 30 сумнан үзе сата.
Ташкичү авыл җирлегендә 565 сыер исәпләнә. Сөтне биш кеше җыя. Я.Хәбибрахманованың Арча сөт комбинатыннан 42 мең сум аласы бар, халыкка бурычы юк, сөтне Әтнәгә тапшыра башлаган. Р.Фәйзрахманов Балтач, Әтнә сөт комбинатларына илтә, бурычы юк. Р.Мортазина Әтнәгә тапшыра, аласы да, бирәсе дә юк. Ф.Гайнуллинның Арча сөт комбинатыннан 350 мең сум аласы, халыкка шуның кадәр үк бирәсе бар, соңгы вакытта Әтнәгә илтә. Р.Сибгатуллин Әтнәгә тапшыра, бурычы юк. Литрын 10 сум 50 тиеннән җыялар.
Үрнәк авыл җирлегендә 556 сыер бар. В.Гарифуллин, Д.Шиһабетдинов Арча сөт комбинатына тапшыралар. Тагын Җәүдәт Әхмәтханов җыя. Литры 11 сум, бурычлары юк.
Утар Аты авыл җирлегендә 310 сыер исәпләнә. З.Габделнуров Арча сөт комбинатына һәм шәхси эшмәкәр Җәүдәт Әхмәтхановка тапшыра. Беренчесе буенча бурычлары юк, икенчесеннән 160 мең сум аласы һәм халыкка шуның кадәр бирәсе бар. Шәхси эшмәкәр Җәүдәт Әхмәтхановның “ТК АТФ” оешмасыннан 56 мең сум аласы, шуның кадәр халыкка бирәсе бар. “Союз” кооперативы “Содружество” ширкәтенә тапшыра, 15 мең сум аласы һәм шуның кадәр халыкка әҗәте бар. Сөтнең литрын 12 сумнан җыялар.
Шушмабаш авыл җирлегендә 458 сыер исәпләнә. М.Каюмов — “Агроснаб” ширкәтенә, Л.Минһаҗева Казан сөт комбинатына тапшыралар. Бурычлары юк, сөтнең литры 11 сум.
Яңасала авыл җирлегендә 93 сыер бар. В.Фазылҗанова Арча сөт комбинатына тапшыра, бурычы юк, сөтнең литры 10 сум 80 тиен.
Күргәнебезчә, Арча сөт комбинаты халыкка һаман да бурычлы булып кала. Аның яңа җитәкчесе киңәшмәгә килергә вакыт тапмаса да, әҗәтләрне шушы атнада түләп бетерәбез, дигән хәбәр җибәргән. Димәк, озак көтәсе калмады.
Ильяс ФӘТТАХОВ