Елны матур итеп төгәлләргә!

Елны матур итеп төгәлләргә!
Узган шимбәдә Татарстан Республикасы Президенты Рөстәм Миңнеханов үткәргән киңәшмәдә төзелеш, архитектура һәм торак-коммуналь хуҗалыгы министрының беренче урынбасары Фәрит Хәнифов 2012 елның 30 ноябренә 2 млн. 2 мең кв. метр (еллык заданиенең 80,8 проценты) торак файдалануга кертелүен хәбәр итте. Арча районында еллык план үтәлү алдында.
ТР авыл хуҗалыгы һәм азык-төлек министры Марат Әхмәтов авыл хуҗалыгы өлкәсендәге бурычларны ачыклады. “Яңа елга кадәр минераль ашламалар туплап калырга тырышыгыз, — диде министр. — Чөнки бәяләр күпкә артачак”.
Марат Әхмәтов хезмәткә түләү мәсьәләсенә дә тукталды. Авыл хуҗалыгында әлегә түләү иң түбәне булып кала. Сөтчелек өлкәсендә кеше факторы аеруча мөһим. Чөнки ашатмасаң, сыер сөт бирми. “Вамин” хуҗалыкларының продукцияне бер килограммга киметергә хакы юк, алар моңа кадәр ярдәмне күп алды. Арттагы хуҗалыклар рәтендә “Вамин-Арча” ширкәте әйтеп үтелде.
— Инвестор бармы-юкмы, технология һәркайда төгәл үтәлергә тиеш, — диде Рөстәм Миңнеханов. — Яз көне булса, азык юк дип әйтер идегез, начар эшләргә бер сәбәп тә юк. Бүгенге көндә 4–5 килограмм сөт саву — хурлык!
Муниципаль район башлыгы Алмас Назиров, киңәшмәне дәвам итеп, быел районда төзелеш эшләренең начар бармавын билгеләп үтте. Әле менә яңа гына Мөндеш, Апаз авылларында яңа фельдшер-акушерлык пунктлары файдалануга тапшырылды, Югары Божа авылында балалар бакчасы ныклап төзекләндерелде. Киләсе елда шундый пунктлар Өчиле һәм Югары Орыда төзеләчәк.
Авыл хуҗалыгы мәсьәләләренә килгәндә, бер авылда кимендә бер гаилә фермасы булдыру таләбе үз көчендә кала. Ел тәмамлангач, авыл җирлекләре эшчәнлегенә йомгак ясаганда шуның буенча да бәя биреләчәк.
Район башлыгы пай җирләре өчен салымнар түләүгә дә тукталды. “Вамин” хуҗалыкларының ноябрьне кертмичә район бюджетына 17 млн. сум бурычлары бар. Җитәкче кеше беренче чиратта хезмәт хакы, салым түләү турында кайгыртырга тиеш. Хәзер сөтне кайда отышлы, шунда сатарга рөхсәт бирелде. Юл бер генә — продукция җитештерүне арттырырга, файдалы итеп сатарга.
— Яңа елга яхшылап әзерләнергә, елны матур итеп төгәлләргә, яңа елга матур итеп аяк басарга! — диде район башлыгы киңәшмәгә йомгак ясап.
Елны матур итеп төгәлләү дигәннән, алда әле безне күңелле вакыйгалар көтә. Шәһәрнең көнбатыш өлешендә мәһабәт ипотека йортлары, Пушкин урамында ветераннар өчен 12 фатирлы йорт әзер булып килә. Үткән атнада Мөндеш һәм Апаз авылларында бик матур төзелгән фельдшер-акушерлык пунктлары ачу тантаналары булды.
Авылда медицина пункты ачылу үзенә күрә бер тарихи вакыйга инде ул. Муниципаль район башлыгы Алмас Назиров авыл өчен иң мөһим нәрсәләр мәктәп һәм медпункт дип әйтеп килә. Мәктәпләребез, нигездә, яңа, нык хәзер. Вакытында эшләнеп калынды алар, моңа бөтен республика соклана. Инде менә республика Президенты программасы буенча фельдшер-акушерлык пунктларына да чират җитте.
Аларны Азнакайда әзерләп кайтаралар, урыннарда җыеп сафка бастыралар. Монысы да җаваплы эш. “Арча МСОсы” төзүчеләре монда да сынатмаган, үзләренә генә хас пөхтәлек, осталык белән башкарып чыккан.
— Сезгә мондый пункт бик кирәк иде, — диде муниципаль район башлыгы урынбасары Любовь Осина Мөндеш авылындагы тантанада ясаган чыгышында. — Республика, район җитәкчеләре халык сәламәтлеген саклауга зур игътибар бирәләр. Быел районда шундый ике пункт ачыла, 9 пункт төзекләндерелде. Бу эш киләсе елда да дәвам итәчәк.
Район үзәк хастаханәсе баш табибы Тәлгать Баһаветдинов пунктта кирәкле бөтен җиһазлар булуын билгеләп үтте. Мондый пунктларда районнан табиблар килеп кабул итү өчен дә шартлар бар.
Иске Кырлай авыл җирлеге башлыгы Фәргать Сираҗетдинов авыллар турында шулай кайгыртулары өчен җитәкчеләргә, сыйфатлы эшләгән төзүчеләргә рәхмәт белдерде.
Яңа фельдшер-акушерлык пункты ачылу тантанасына бөтен Апаз халкы килгән, диярсең. Муниципаль район башлыгы урынбасары Любовь Осина да биредә шундый тырыш, актив кешеләр яшәвен билгеләп үтте. “Мондый пунктның беренчеләрдән булып сездә төзелүе юкка түгел, — диде ул. — Сез моңа лаек”.
“Ватан” хуҗалыгы җитәкчесе Мансур Әхмәтов, Апаз авыл җирлеге башлыгы Ренат Садыйков һ.б. чыгыш ясаучылар да рәхмәт сүзләре җиткерделәр.
Ильяс ФӘТТАХОВ