Юлларда тикшерүләр

Юлларда тикшерүләр
Исереклекнең яхшыга илтмәве көн кебек ачык. Ә инде “күңелле” килеш руль артына утырып юлга чыгуның ничек күңелсез тәмамланырга мөмкин икәнлеген аңлатып торуның кирәге дә юк.
Бу елның 10 аенда гына да Арча районы юлларында 46 юл-транспорт һәлакәте булып, шуларда 8 кеше үлгән, 67 кеше төрле дәрәҗәдәге тән җәрәхәтләре алган. Шуларның 11ендә автомобиль йөртүчеләр исерек хәлдә булган һәм алар гаебе белән 3 кешенең гомере өзелгән, 13 кеше яраланган. Иң кызганычы, балалар зыян күргән, 1 бала әле яши генә башлаган килеш якты дөньядан китеп барган, 1 бала авыр тән җәрәхәтләре алган.
Исерек хәлдә транспорт йөртүчеләрне тоткарлау максатында Арча ЮХИДИ бүлекчәсе һәм Арча эчке эшләр бүлеге хезмәткәрләре тарафыннан юлларда тикшерүләр үткәрелде. Бу көнне юлларга 3әр кешедән торган 9 төркем чыкты. Безнең төркемдә ЮХИДИ бүлекчәсе җитәкчесе, полиция подполковнигы Габделхак Касыймов, эчке эшләр бүлегенең штаб җитәкчесе, эчке хезмәт подполковнигы Марат Фәрхуллин, дәүләт инспекторы, полициянең өлкән лейтенанты Рамил Сәфиев тикшерү алып барды.
Данис (исемнәр үзгәртелде), 3 яшьлек һәм 8 айлык балаларын утыртып, мунчадан кайтып килә. Ә балалар өчен куела торган махсус утыргычларны өендә онытып калдырган.
— Сезнеңчә ничек, кирәкме соң алар?
— Уйлап чыгарганнар бит, кирәктер инде. Элек андый әйбер юк иде, — ди әңгәмәдәшем.
Аны шушы сабыйлары иминлеге өчен уйлап чыгарулары турында ник бер сүз әйтсен.
Әмир арткы номерлары пычрак булуы һәм укылмавы өчен тоткарланды. “Әле генә туктатып 500 сум штраф салдылар бит”, — ди ул. Шунда чыгып сөртеп кенә аласы, юк, моның өчен тагын 500 сум штраф өстәү кирәк булды.
Ул көнне туктатулар да җитәрлек булды, штрафлар да. Берсе алдагы ян тәрәзәгә матурлык өчен шторкалар куйган (рөхсәт ителми, чөнки күрүчәнлекне киметә), икенчесенең арттагы номерлары яктыртылмый (укылмый торган номер), өченчесенең иминият полисында исеме язылмаган (димәк, йөртергә хокукы юк), тагын берсе куркынычсызлык каешын такмаган.
— Сезнеңчә ничек, юлларда мондый тикшерүләр кирәкме? — дип сорыйм 20 ел шоферлык стажы булган Марат Абдрахмановтан.
— Әлбәттә, кирәк. Машина ул зур куркыныч тудыручы транспорт чарасы. Шуңа юлларда тәртип булырга тиеш. Ә исерек килеш руль артына утыручылар турында әйткән дә юк. Алар үзләре турында гына түгел, башкалар турында да уйларга тиеш. Һәлакәт килеп туса, бер гаепсез кешеләр зыян күрәчәк бит.
— Яңа елдан соң штрафлар бик нык артачак, диләр. Исерек килеш руль артына утыручыларга аеруча.
— Эчмәсеннәр, исерек хәлдә машинага утырып чыгып китмәсеннәр. Аннан машина йөртүгә хокук биргәндә имтихан алуны да көчәйтергә кирәк. Аеруча яшьләр. Музыканы тулы көченә куялар да, күзләренә ак-кара күренми чабалар. Юл хәрәкәте кагыйдәләрен белмәү кайчан да булса бер килеп чыга ул, — ди Арчадан Рамил Ибраһимов.
— Исерек килеш руль артына утырган өчен штраф бик зур сумма булачак, диләр, шулай булса, гаилә бюджетына нык сугачак бит.
— Ул кеше гаилә турында уйлыйдыр, дисезме? Эшләсен, җәяү йөрсен, сабак алсын, — дип сүзгә кушылды М.Абдрахманов.
Бәхеткә, ул көнне исерек килеш руль артына утырган бер генә кеше дә очрамады.
— Бу — юл-патруль хезмәте, эчке эшләр бүлеге хезмәткәрләренең эш нәтиҗәсе дә, — диде Габделхак Касыймов. — Бүген генә түгел, һәрчак шулай булсын, эчкән килеш юлга чыкмасыннар иде. Кемнеңдер юлда йөри белмәве аның үзенә генә түгел, гаиләсенә дә, бер гөнаһсыз кешеләргә дә зыян сала. Шуны истән чыгармасыннар иде. Юлларда мондый тикшерүләр кабатланып торачак әле.
Гөлсинә ЗӘКИЕВА