Яшәү көчләренә сокланырлык

Яшәү көчләренә сокланырлык
Районыбызда Халыкара инвалидлар көне уңаеннан күптөрле чаралар үтә. Алар әле ун көн буе дәвам итәчәк.
3 декабрьдә инвалидларның башлангыч оешмалары рәисләре, начар күрүчеләр җәмгыяте әгъзалары белән түгәрәк өстәл артында сөйләшүдә район башкарма комитеты җитәкчесе урынбасары Надия Мифтахетдинова, район ветераннар советы рәисе Альберт Җамалиев, социаль яклау идарәсе җитәкчесе Рамил Гарифҗанов бу турыда тулы итеп сөйләделәр.
— Районда мөмкинлекләре чикләнгән кешеләр үзләрен җәмгыятьнең тулы хокуклы әгъзалары итеп хис итсеннәр өчен күп эш башкарыла, — диде Надия Равилевна. — Бу мәсьәләне муниципаль район башлыгы Алмас Назиров һәрвакыт игътибар үзәгендә тота. Инвалидлар үзләре дә бик активлар, алар район тормышында мөһим роль уйный.
Соңгы елларда гамәлгә кертелгән “Уңай мохит” программасы мөмкинлек-ләре чикләнгән кешеләр турында чын-чынлап кайгырта башлауның ачык мисалы булып тора. Арчада тротуар җәелгән урамнар күзгә күренеп арта, социаль объектларга керү-чыгу җайлы булсын өчен мөмкинлекләр тудырыла. Инвалидлар яшәгән күп фатирлы йортларга да шундый яңалыклар кертелә башлады.
Социаль яклау идарәсе җитәкчесе Рамил Гарифҗанов, инвалидлар декадасы уңаеннан мөмкинлекләре чикләнгән кешеләр арасында спорт ярышлары, үзешчәннәр чыгышы үткәреләчәген әйтеп, андый чараларда активрак катнашырга чакырды.
— Без сезнең яшәеш турында яхшы хәбәрдар, урыннарда да еш булабыз, — диде район башкарма комитеты җитәкчесе урынбасары Надия Мифтахетдинова. — Шулай да, бер очрашу — бер гомер, диләр. Бүген сезнең фикерләрне белү сезгә дә, безгә дә файдалы булыр, чәй өстәле артында рәхәтләнеп сөйләшеп утырыйк.
Надия Равилевна район тормышы турында да күп мәгълүмат бирде.
Очрашуда катнашкан инвалидлар иң беренче итеп үзләрен онытмаулары өчен район җитәкчелегенә рәхмәтләрен җиткерделәр. Алар мондый очрашуга бик шат иде, билгеле инде, мөмкинлектән файдаланып теләкләрен дә әйтеп үттеләр. Шәһәр урамнары чатларына тавышлы светофор куелса, начар күрүчеләр өчен бик уңайлы булыр иде һ.б. Район үзәк хастаханәсеннән Индира Урманова, Пенсия фонды идарәсеннән Гөлназ Ибәтуллина, кеше хокуклары буенча вәкил, район иҗтимагый совет рәисе Ринат Һидиятов чыгышларын да игътибар белән тыңладылар.
Район Мәдәният йорты, сәнгать мәктәбе хезмәткәрләре чыгышы күңелләрне тагын да күтәреп җибәрде.
Ильяс ФӘТТАХОВ